Yesu chafwiliyi, iyala wumu samaheta wejina daYosefu wamulombeli Pilatu nindi amwiteji afumishi mujimba waYesu hamutondu. Yosefu wanoneli mujimba nakuwuvuñila mwihina dadiwahi, washiliku yuma yevumba dadiwahi nawa wawukaamikili mwijamu dadiha. Walañumwinini ilola deneni kuchiisu chejamu. Akulumpi jawatupristu amulejeli Pilatu nawu: ‘Tunakuchiina netu atumbanji twaYesu amakwawu amba kanona mujimba windi nakuhosha nawu nasañuki.’ Dichi Pilatu wayilejeli nindi: ‘Koleshenu kwijamu nawa mudihembeña.’

Chimwahitili mafuku asatu, nantetemena nankashi, ambanda amu ayili kwijamu nawa awanini ilola anadilañumuniku. Cheñililiwu mwijamu, kañelu wayilejeli nindi: ‘Bayi mutiya womaku. Yesu anamusañuli dehi. Yenu mwakayileji atumbanji twindi kulonda akadibulakani nindi kuÑaliliya.’

Mariya Mandaleni wayili lufuchi nakuyiwana aPetulu naYowanu. Wayilejeli nindi: ‘Kudi muntu wunasendi mujimba waYesu!’ APetulu naYowanu afuntili lufuchi kwijamu. Chawaniniwu mujimba mwosi, afuntili kumatala awu.

Mariya chafuntiliyi kwijamu wamweni añelu ayedi adi mukachi nawa wahosheli nindi: ‘Neluki wanyi kunamutwaliwu Mwanta wami.’ Kuhiñahu wamweni iyala wumu nawa watoñojokeleña nindi hindimi. Mariya wamwilili nindi: ‘Mwanta, nleji kuwunamutwali.’ Ilaña iwu iyala chahosheliyi nindi, “Mariya!” hohenohu Mariya welukili nindi Yesu diyi. Wabidikili nindi: “Ntañishi!” kuhiñahu wamukwatili. Yesu wamulejeli nindi: ‘Yaña wuyileji amanakwami neyi wunammoni.’ Hohenohu, Mariya wayili lufuchi kudi atumbanji nawa wayilejeli nindi namumoni Yesu.

Chimwahitili mpinji namwaana, atumbanji ayedi afumineña kuYerusalema nakuya kuEmawusi. Iyala wumu watachikili kwendela hamu nawu nawa wayihwili nsañu yahanjekeleñawu. Wena ahosheli nawu: ‘Komana oyu nsañu eyi hiwunayitiyiku? Mafuku asatu anahitihu, akulumpi jawatupristu amujahili Yesu. Ilaña kudi ambanda anakuhosha nawu wamumi!’ Iwu iyala wayihwili nindi: ‘Komana enu  himwayikuhwelela atuprofwetuku? Ahosheli nawu Kristu wakafwa, kuhiñahu akamusañula.’ Watwalekelihu kuyilumbulwila chahosha Nsona. Chashikiliwu kuEmawusi, atumbanji amulejeli iwu iyala nawu ayi nawu hamu. Hakuda kwamelela chalombeliyi hadinkendi, elukili nawu wadiña Yesu. Kuhiñahu wajimañeni.

Awa atumbanji ayedi ayili lufuchi muYerusalema kwitala kwapompeleliwu apostolu nawa ayilejeli yuma yamwekeni. Hadiñawu kwenoku mwitala, Yesu wamwekeni kudi wejima wawu. Hakusambila, apostolu akuhweleli wanyi nawu wadiña Yesu. Kuhiñahu wayilejeli nindi: ‘Talenu makasa ami; nkwatenu. Chasonekewa nawu Kristu wakasañuka mudi afu.’