KUDIZA 93
Yesu Nafunti Mwiwulu
MuÑaliliya, Yesu wadibulakeni nawakakumulondela. Wayinkeli lushimbi lwalema nindi: ‘Yenu mwakelishi antu ekali atumbanji mumatuña ejima. Muyidizisheña yuma yinayidizishili nikuyipapatisha.’ Kuhiñahu wayishiikili nindi: ‘Mwanukeña nenu, nukwikalaña nenu mpinji yejima.’
Mumafuku 40 ashakaminiyi hanyima yakumusañula, Yesu wamwekeni kudi atumbanji twindi amavulu muÑaliliya nimuYerusalema. Wayidizishili yuma yalema nawa welili yihayamisha yayivulu. Kuhiñahu Yesu wadibulakeni nawapostolu indi kakukumishaku, haMpidi yaNyiolivi. Wayilejeli nindi: ‘Bayi mufuma muYerusalemaku. Hembelelenuña chuma chakaniniyi Tata.’
Apostolu indi atiyili mwatalishiliyi wanyi. Amwihwili nawu: ‘Ichi dinu wunakwikala Mwanta waIsarela?’ Yesu wayakwili nindi: ‘Mpinji yafuukulayi Yehova nindi niikali Mwanta kanda yishiki. Katatakichi spiritu yajila yikuyinka ñovu nawa mukwikala aYinsahu jami. Yenu nakushimwina muYerusalema, muYudeya, muSamariya nikwakumina iseki dejima.’
Kuhiñahu Yesu amutwalili mwiwulu nawa ivu damubutili. Atumbanji twindi atwalekelihu kutala mwiwulu, nawa walekeli kumwekana.
Atumbanji afumini kuMpidi yaNyiolivi nakuya kuYerusalema. Mpinji yejima apompeleña mukapeka kahewulu nikulomba. Adiña nakumuhembelela Yesu kulonda ayinki nshimbi jikwawu.
“Iyi nsañu yayiwahi yaWanta akayishimwina mwahita iseki dejima mwashakamawu antu kulonda yakekali wunsahu kunyuza yejima, kuhiñahu dinu kukuma kwakenzi.”—Matewu 24:14
You May Also Like
YESU—DIYI NJILA, CHALALA, NIWUMI
Antu Amavulu Anamumoni Henohu Pentekosta Kanda
Kufuama hamusañulawu nakushika mpinji yakuya mwiwulu Yesu natwalekihu kuyikonkomwena atumbanji twindi chuma chikatambwilawu nichikachizatishawu.
