Akulumpi jawatupristu amutwalili Yesu kuchipañu changuvulu. Pilatu wayihwili nindi: ‘Muloñanyi wumunakumwinka iwu muntu?’ Wena amwakwili nawu: ‘Nakuditena nindi himwanta!’ Pilatu wamwihwili Yesu nindi: “Yeyi Mwanta wawaYudeya?” Yesu wamwakwili nindi: “Wanta wami wambadi yakanu kaayi wanyi.”

Kuhiñahu Pilatu wamutemesheli Yesu kudi Herodi, nyuuli wakuÑaliliya, kulonda amoni neyi wukuwana hakumwinkela muloña. Herodi hamuwaninihu Yesu namuloñaku, nawa wamufuntishili kudi Pilatu. Kufumahu Pilatu walejeli antu nindi: ‘Ami niHerodi hitunamuwanihu iwu muntu namuloñaku. Nukumuumbaku.’ Izaza dawantu dabidikili nawu: ‘Mujahenu! Mujahenu!’ Amashidika amuvupoleli Yesu nachikoti, kumufwijila mazeñi nikumweta. Amuvwikili chibañula chanyiña kumutu nakumusupisha nawu: ‘Handaku, eyi Mwanta wawaYudeya.’ Pilatu walejeli cheñi izaza dawantu nindi: ‘Iwu muntu hinnamuwanihu namuloñaku.’ Ilaña abidikili nawu: “Mujahilenu hamutondu!” Dichi Pilatu wamuhanini kulonda amujahi.

Amutwalili Yesu kwiluña dateneneñawu nawu Gologota, amupopeleli hamutondu nawa awimikili. Yesu walombeli nindi: ‘Tata, yanakeni, muloña hiyaneluki chuma chinakwilawuku.’ Antu amusupishileña Yesu nawu: ‘Neyi wudi Mwana kaNzambi, sulukaku ohu hamutondu! Damwini eyi aweni.’

Kapondu wumu akudikiliwu kwakwihi nayena wahosheli nindi: “Wakañanukaña neyi wuneñili dehi muWanta weyi.” Yesu wamushiikili nindi: “Wakekala nanami muParadisa.” Namwaana, mwituña mwenjili mwidima wasendeli maora asatu. Atumbanji amakwawu emeni kwakwihi namutondu, kushilahu niMariya, mama yaYesu. Yesu wamulejeli Yowanu nindi amuhembeña Mariya neyi mama yindi wamuvwala.

Nkumininaku, Yesu wahosheli nindi: “Yuma yejima yinazatiki dehi!” Wanoñamini nawa wafwili. Hayoyina mpinji, kwenjili mutentanshi weneni. Ihina dadita damutembeli dakwaambula nachu Mwajila  naMwajila Chikupu databukili hayedi. Mukulumpi wawamashidika wahosheli nindi: ‘Mwamweni iwu wadiña Mwana kaNzambi.’