Chimwahitili mpinji kufuma hamwekeniyi Yesu kudi apostolu, Petulu wafuukwilihu kuya nakukwata inshi muKaluñalwiji kaÑaliliya. Tomasi, Yakoba, Yowanu niatumbanji amakwawu ayili hamu nindi. Achishili wufuku wejima chakadi kukwatahu inshi.

Ifuku dalondelelihu nantetemena nankashi, amweni muntu nemani kuchikumu. Wayitambikili iku adi hamenji nindi: ‘Munakwatihu inshi yidi yejima?’ Amwakwili nawu: “Inehi!” Wayilejeli nindi: “Lalumwinenu kaleñi kenu kukabadi kawatu kakuchidiilu.” Chakilalumwiniwu, kaleñi kenzeli nanshi jajivulu chakwila akañenyi kukikokela muwatu. Yowanu washikeneni kwiluka nindi iwu iyala wadiña Yesu nawa wahosheli nindi: “Mwanta diyi!” Hohenohu, Petulu wadumbilili mumenji nawa wasalili nakushika kuchikumu. Atumbanji amakwawu amulondeleli nawatu.

Chashikiliwu kuchikumu, amweni mankendi ninshi jidi hakesi. Yesu wayilejeli nindi aletelihu inshi jikwawu. Kuhiñahu wahosheli nindi: ‘Twayenu mudawuli.’

 Chamanishiliwu kudawula, Yesu wamwihwili Petulu nindi: ‘Komana wankeña kubadika mudimu wakukwata inshi?’ Petulu waakwili nindi: “Eña Mwanta, weluka neyi nakukeña.” Yesu wahosheli nindi: ‘Komana diishaña anyana kanyikoku ami.’ Yesu wamwihwili cheñi nindi: ‘Petulu, komana wankeña?’ Petulu waakwili nindi: ‘Mwanta, weluka neyi nakukeña.’ Yesu wamulejeli nindi: “Biñaña anyikoku ami anyanya.” Yesu wamwihwili kamuchisatu. Petulu waneñeli chikupu. Waakwili nindi: ‘Mwanta, weluka yuma yejima. Weluka neyi nakukeña.’ Yesu wamulejeli nindi: “Diishaña anyikoku ami anyanya.” Kuhiñahu wamulejeli Petulu nindi: “Twalekakuhu kunlondela.”