Kwadiña iyala wumu wabulileña kwenda nawa washakamineña kuchiisu chatembeli nakulomba-lomba hefuku-hefuku. Ifuku dimu namwaana, wamweni aPetulu naYowanu anakwiñila mutembeli. Wayilili nindi: ‘Mwani nyinkenuhu chuma chidi chejima.’ Petulu wamulejeli nindi: ‘Nikweti chuma chabadika mali chinukukwinka. Mwijina daYesu, nyamukaku wendi!’ Kuhiñahu Petulu wamukwashiliku kunyamuka nawa watachikili kwenda! Izaza dawantu dazañaleli nankashi nanichi chihayamisha chakwila antu amavulu cheñi etiyili.

Ilaña atupristu nawaSadusi ahilili. Ayikwatili apostolu, ayitwalili kuchota nawa ayihwili nawu: ‘Hinyi wayinka ñovu yakuuka iwu iyala?’ Petulu wayakwili nindi: ‘Twatambwila ñovu kudi Yesu Kristu, ona imwajahili.’ Akulumpi jakwitiya abidikili nawu: ‘Lekenu kuhosha hadi Yesu!’ Ilaña apostolu ahosheli nawu: ‘Twatela kuhosha hadi yena. Tukuleka wanyi.’

Chelili ayuumbiku hohu aPetulu naYowanu, ayili kudi akwawu atumbanji nawa ayilejeli chuma chamwekeni. Alombeleli hamu, nakumwila Yehova nawu: ‘Mwani tukwashi twiikali ahamuka kulonda tutwalekihu kuzata mudimu weyi.’ Yehova wayinkeli spiritu yindi yajila nawa atwalekelihu kushimwina nikuuka antu. Antu amavulu etiyili. ASadusi atiyili ichima chikupu chakwila ayikwatili apostolu nakuyisha mukaleya. Ilaña nawufuku, Yehova watemesheli kañelu, washinkwili yiisu yakukaleya nawa wayilejeli apostolu nindi: ‘Funtenu kutembeli, kulonda mwakatañishi kwenoku.’

Hadodenodu ifuku nantetemena, akaSanihedirini, chota chawakulumpi jakwitiya, ayilejeli nawu: ‘Kukaleya kuchidi kwakukiya, ilaña ana amayala imwakwata anayi! Adi mutembeli, anakutañisha antu!’ Cheñi ayikwatili apostolu nakuyileta kudi akaSanihedirini. Kapristu muneni wahosheli nindi: ‘Twayilejeli netu bayi  muhosha hadi Yesuku!’ Ilaña Petulu waakwili nindi: “Nzambi diyi nyuuli wutwatela kwovwahila bayi antuku.”

Akulumpi jakwitiya ahilili nankashi chakwila akeñeleña kujaha apostolu. Ilaña kaFwarisi wejina daGamaleli wemeni nakuhosha nindi: ‘Babalenu! Hadaha Nzambi wudi nanawa amayala. Mwamweni munakukeña kuzuña naNzambi?’ Atiyilili mwayilejeliyi. Hanyima yakuyeta apostolu yikoti, ayilejeli cheñi nawu aleki kushimwina nawa ayuumbiliku nawu ayeña. Ilaña chumichi hichayilekesheli apostolu kushimwinaku. Atwalekelihu kushimwina nsañu yayiwahi nakuhamuka, mutembeli nikwitala niitala.