MuFwilipi, mwadiña kansi wamumbanda nduñu wadiña nandemoni. Iwu ndemoni wamuzatishileña kushimuna yuma yakumbidi, nawa chumichi chaletesheleña aweni iwu kansi kwikala namali amavulu. APawulu naSilasi chashikiliwu kuFwilipi, iwu kansi wayilondeleli hadi mafuku amavulu. Iwu ndemoni wamuletesheli abidiki nindi: “Awa amayala hiyanduñu jaNzambi Mukakubadika Chikupu.” Nkumininaku, Pawulu wamulejeli ndemoni nindi: ‘Mwijina daYesu, fumaku mudi iwu mumbanda!’ Hohenohu ndemoni wafuminimu.

Aweni iwu kansi wamumbanda chelukiliwu nawu hakuyiletelaña cheñi maliku, ahilili nankashi. Ayikokañesheli aPawulu naSilasi nakuyitwala kudi anyuuli amumusumba, nakuhosha nawu: ‘Awa amayala anakufumpa nshimbi nikuhilisha antu mumusumba wejima!’ Awa anyuuli ahanini lushimbi nawu aPawulu naSilasi ayeti nawa ayishi mukaleya. Mukakuhemba kaleya wayishili mukapeka kamukaleya kaheshina, mwadiña mwidima chikupu nawa wayihatili mumpompa.

APawulu naSilasi amushimekeleña Yehova natumina iku akwawu atuyili anakutiyilila. Hohenohu, mukachi kawufuku, kwenjili mutentanshi weneni wanyinkesheli kaleya kufuma kwiwulu nakushika kwishina. Yenzelu yakukaleya yenzunukili, nawa macheni mwayikasiliwu atuyili nimpompa jasopokeli. Mukakuhemba kaleya wayili lufuchi mukaleya kamukachi nawa wawanini yenzelu yenzunuka. Wanoneli mpoku yakabali nindi adijahi, muloña watoñojokeleña nindi atuyili ejima anatemuki.

Hohenohu, Pawulu wabidikili nindi: ‘Bayi wudijahaku! Wejima wetu tudi mwomu!’ Mukakuhemba kaleya weñilili lufuchi mukachi nawa wadimbukilili kunyendu yaPawulu naSilasi. Wayihwili nindi: “Yumanyi yinatela kwila kulonda akañamwini?” Wena amwakwili nawu: ‘Eyi hamu niamwitala deyi mwatela kumukuhwelela Yesu.’ Kuhiñahu ayidizishili izu daYehova kudi aPawulu naSilasi, dichi mukakuhemba kaleya niamwitala dindi ejima apapatisheweli.