Hampinji yamukasiliwu kapostolu Yowanu hachituutu chaPatamosa, Yesu wamumwekesheleli yimwenu 16 yalondankeni, hela yuma yikamwekana kumbidi. Iyi yimwenu yamwekesheli ijina daYehova chakadijilikawu, Wanta windi chiwakenza ninkeñelu yindi chakayilawu hamaseki neyi chayilañawu mwiwulu.

Muchimwenu chimu, Yowanu wamweni Yehova wudi hetanda dindi dakulema mwiwulu. Adinyeñumukili kudi akulumpi 24 avwalili yakuvwala yitooka nawa kunyitu yawu kwadiña yibaaba yawuru. Kunidi itanda kwafumini nzaji nichivumina chakudidima. Awa akulumpi 24 anoñamini chamesu heseki kumesu aYehova nakudifukula kudi yena. Muchimwenu chikwawu, Yowanu wamweni izaza deneni dinafumi kunyuza yejima, antu ejima nimadimi ejima adifukulaña kudi Yehova. Mwana kaMukoku, Yesu, nakuyibiña nawa nakuyitwala kumenji awumi. Chimwahitili mpinji, muchimwenu chikwawu, wamweni Yesu natachiki kuyuula neyi Mwanta mwiwulu, hamu nawakulumpi 24. Muchimwenu chalondelelihu, Yowanu wamweni Yesu nakuzuña nachanzañombi, Satana, niandemoni jindi. Yesu wayinatilili heseki, kufuma mwiwulu.

 Kuhiñahu Yowanu wamweni mwevulu walubanji waMwana kaMukoku hamu nawa 144,000 anemani haMpidi yaZiyona. Wamweni cheñi kañelu nakutuuka muluzwizu, nakuleja antu nindi amutiyi Nzambi woma nikumulemesha.

Muchimwenu chalondelelihu, wamweni kudi njita yaAmagedoni. Muniyi njita, Yesu hamu nawamashidika indi anamushindi Satana ninowu amuhakwilañaku. Muchimwenu chakukumishaku, Yowanu wamweni yuma yayiwahi hamaseki neyi yamwiwulu. Satana ninowu amulondelaña anayijilumuni chikupu. Ejima mwiwulu nihamaseki anakujilika ijina daYehova nikudifukula kudi yena hohu.