Sawulu wadiña mwini Roma wavwalikilili muTarusa. Wadiña kaFwarisi welukili chikupu Nshimbi jawaYudeya nawa waheleli akaKristu. Wayikokañesheleña akaKristu, amayala niambanda nakuyifumisha mumatala awu nawa wayishileña mukaleya. Mpinji yimu wemeni kwakwihi nakutala izanvu dawantu azuwili chamwasileñawu kambanji Stefwanu malola nakumujaha.

Ilaña Sawulu hakeñeleña hohu kukwata akaKristu adiña muYerusalemaku. Walombeli kudi kapristu muneni nindi amutemeshi kumusumba waDamakasa kulonda akakeñakeñi akaKristu kwenoku. Sawulu chashikiliyi kwakwihi namusumba, hohenohu chejeji chatamuka chamutoñekeleli nawa wadimbukili heseki. Watiyili izu nawu: ‘Sawulu, muloñadi chiwunakunkabishila?’ Yena wehwili nindi: ‘Yeyinyi?’ Wamwakwili nindi: ‘Yami Yesu. Yaña kuDamakasa, nawa wukwiluka chuma chiwatela kwila.’ Hohenohu Sawulu walekeli kumona, nawa amukwatili kuchikasa nakumutwala mumusumba.

MuDamakasa, mwadiña mukaKristu washinshika wejina daAnaniya. Yesu wamulejeli muchimwenu nindi: ‘Yaña kwitala daYudasi mumukwakwa watenañawu nawu Woloka, kulonda wakamukeñakeñi Sawulu.’ Ananiya wahosheli nindi: ‘Mwanta, neluka nsañu yejima hadi iwu iyala! Nakushaña atumbanji tweyi mukaleya!’ Ilaña Yesu wahosheli nindi: ‘Yaña wakamuwani. Namutondi Sawulu kulonda ashimwini nsañu yayiwahi kunyuza yayivulu.’

Dichi Ananiya wamuwanini Sawulu nawa wamulejeli nindi: ‘Sawulu, manakwami, Yesu nantemeshi kulonda nukukwashi wutachiki kumona cheñi.’ Hohenohu, Sawulu watachikili kumona cheñi. Wadizili hadi Yesu nawa wekalili mukakumulondela. Chapapatisheweliyi nakwikala mukaKristu, Sawulu watachikili  kushimwina mumasinagogi nawakwawu akaKristu. AYudeya ahayamini nankashi hakumona Sawulu nakuyidizisha antu nsañu yahosha hadi Yesu. Ahosheleña nawu: ‘Iwu muntu hidiyi ona wakabishileña atumbanji twaYesuku?’

Hadi yaaka yisatu, Sawulu washimwinineña antu ashakamineña muDamakasa. AYudeya amuheleli nawa akwatili kafuta nawu amujahi. Ilaña amanakwetu elukili aka kafuta nawa amukwashili kulonda atemuki. Amushili mubasiketi nakumuzenzumwina mwipwata damumbañu yamusumba.

Sawulu chayiliyi kuYerusalema, wakeñeleña kudibomba nawamanakwetu kwenoku. Ilaña amutiyileña woma. Kuhiñahu, kambanji wadiña naluwi wejina daBaranaba wamutwalili Sawulu kudi apostolu nawa wayikwashili kwiluka nawu Sawulu nahimpi chikupu. Sawulu watachikili kushimwina nsañu yayiwahi neyena hamu nachipompelu muYerusalema. Mukuhita kwampinji, atachikili kumutena nawu Pawulu.