Yezebeli wadiña namwana wamumbanda wejina daAtaliya, wadiña watama neyi mama yindi. Ataliya wasumbukili kudi mwanta waYuda. Nfumwindi chafwiliyi, mwanindi weyala watachikili kuyuula. Ilaña mwanindi chafwiliyi, Ataliya wadilishili yomwenindi kwikala mwanta waYuda. Kuhiñahu wakeñeleña kujaha ejima ateleleli kuswana hawanta. Wajahileña muntu wejima wateleleli kumusinsa, kushilahu niejikulwindi awamayala. Antu ejima amutiyileña woma.

Kapristu Muneni Yehoyada niñodindi Yehosheba, elukili nawu yuma yelileñayi Ataliya yadiña yatama nankashi. Ashili wumi wawu muwubanji kulonda asweki mwijikulu aAtaliya weyala, mukeki wejina daYehowashi. Amukulishilileña hatembeli.

Yehowashi chashikijiliyi yaaka 7, Yehoyada watambikili anlomboli ejima niaLevi nawa wayilejeli nindi: ‘Hembenuña yiisu yakutembeli nawa bayi mwiteja muntu hela wumu kwiñilaku. Kuhiñahu Yehoyada wamwilishili Yehowashi kwikala mwanta waYuda nawa wamuvwikili chibañula kumutu. Antu amuYuda abidikili nawu: ‘Mwanta ahandi yaaka yayivulu!’

Mwanta wamumbanda Ataliya watiyili ipumba dawantu nawa wayili lufuchi kutembeli. Chamweniyi mwanta wamuha, wabidikili nindi: “Anakasi kafuta! Anakasi kafuta!” Anlomboli amukwatili iwu mwanta wamumbanda watama, amutwalili kwakulehi nawa amujahili. Hanu dinu chumanyi chamwekeni kuyuma yatama yakojejeliyi muza kwila?

Yehoyada wakwashili muza kutiyañana chitiyañenu naYehova chashiikiliwu nawu akudifukulaña  hohu kudi Yena. Wayilejeli nindi ahumuni tembeli yaBayali nikufumpa ankishi. Watondeli atupristu niaLevi akuzatila hatembeli kulonda antu atachiki kudifukwilahu cheñi. Wenkeli akakuhemba kuchiisu mudimu wakuhemba tembeli kulonda kubuli kwiñila muntu wudi wejima wamajilu. Kuhiñahu Yehoyada nawanlomboli amutwalili Yehowashi kuchipañu nawa amushili hetanda. Antu amuYuda azañaleli. Nkumininaku, atachikili kumukalakela Yehova chakadi kuyikañesha kudi Ataliya watama nawa alekeli kudifukula kudi Bayali. Wunamoni kuhamuka kwaYehoyada chikwakwashili antu amavulu?