Kudi Antañi:

Etu akakudifukula aYehova twakeña Izu dindi, Bayibolu. Tweluka netu mwekala nsañu yalala yakunyaaka, nsañu yinateli kuwahisha chihandilu niwunsahu wawuwahi wamwekeshaña nawu Yehova wakeña antu. (Isamu 119:105; Luka 1:3; 1 Yowanu 4:19) Twakeñaña kukwasha antu eluki chalala chekala Mwizu daNzambi. Hamuloña wachumichi, tudi namuzañalu wakwidisha wunu mukanda wunakwila nawu, “Yuma Yimunateli Kudiza muBayibolu.” Talenu nsañu yidimu.

Nsañu yayivulu yidimu anayisonekeli atwansi. Hela chochu, yinateli kukwasha niakulumpi anakukeña kudiza nsañu yayivulu yamuBayibolu. Nawa chineli Bayibolu ayisonekela antu ejima, chakadi nikujina, kutaña nsañu yekalamu kukutukwasha wejima wetu, chumichi chikutuzañalesha chikupu.

Mpanji jamuBayibolu jidi muwunu mukanda jikutuleja nsañu yahosha hadi antu kufuma hayileñeliwu kuya nikumbidi. Nawa nsañu yamuBayibolu anayisoneki munjila yapela nawa yaswayi kutiya, aneseki kuyisoneka mundonda kwesekeja nachiyamwekeni.

Hela chochu, awunu mukanda bayi neyi wunahoshi hohu nsañu yamuBayiboluku. Nyevulu ninsañu yidimu anayiloñeshi munjila yikuyikwasha nawa yinakumwekesha chatiyileñawu antu ashimunawu.

Awunu mukanda wukutukwasha kwiluka netu Bayibolu himukanda wahosha hadi antu amwovwahilili Yehova niabulili kumwovwahila. Nawa chikutukwasha kudizila kudi wena. (ARoma 15:4; 1 AKorinda 10:6) Awunu mukanda wukweti yibalu 14. Kumatachikilu achibalu-hichibalu kudi yikuma yamaneni yinasonekiwu muwihi yitunateli kudizilaku.

Neyi mudi anvwali, munateli kutaña kudiza namwanenu nikuhanjeka hanyevulu yidimu. Kuhiñahu munateli kutaña nsañu yamuBayibolu  hanashindameni oku kudiza. Mukwashenu mwanenu kusumbwañesha nsañu yinakutañayi muBayibolu nayidi mukudiza kudi mukanda. Njila yoyimu yinateli kuzatika cheñi hakukwasha mukulumpi kulonda eluki nsañu yamuBayibolu.

Tunakuhweleli netu iwu mukanda wukukwasha ejima adi nanyichima yayovu, atwansi niakulumpi kudiza Izu daNzambi nikuzatisha yuma yinadiziwu muchihandilu chawu. Chikufumamu, niwena akutachika kudifukula kudi yena nawa akwikala muchisaka chindi chakeñayi.