Nzambi watambikaña antu ejima kulonda akundami kwakwihi nayena mukulomba. (Masamu 65:2) Ilaña, hatiyaña hela kwiteja kulomba kwejimaku. Chakutalilahu, kulomba kwamuntu wazondojolaña ñodindi hikwashikañaku. (1 Petulu 3:7) Cheñi, chelili aIsarela atwalekihu kwila yuma yatama, Nzambi wakaanini kutiya kulomba kwawu. Eñañi, kulomba hikukooleka kweneni. Hela chochu, Nzambi wetejaña kulomba kwawantu anakoñi nshidi yahamesu bwi-i neyi abalumuka mumuchima.​—Tañenu Isaya 1:15; 55:7.

Talenu vidiyo Komana Nzambi Watiyaña Kulomba Kwejima?

Kulomba himbadi yakudifukula kwetu, dichi twatela kulomba hohu kudi Nleñi yetu Yehova. (Matewu 4:10; 6:9) Chineli hitwawaninaku, twatela kulombela mwijina daYesu muloña wafwili kukoola nshidi jetu. (Yowanu 14:6) Yehova hakeñaña nindi tuhitulukeña mukulomba kwokumu hela kwasonekawu munyikandaku. Wakeñaña nindi tulombeña chakufuma hamuchima.​—Tañenu Matewu 6:7; Afwilipi 4:6, 7.

Nleñi yetu nateli kutiya nikulomba kutwalombaña wumweneni. (1 Samweli 1:12,13) Watulejaña kulomba mpinji yejima, chidi neyi hakuhinduka nihakukama, hakudya nawa neyi tudi mukukala.​—Tañenu Masamu 55:22; Matewu 15:36.

Kukundama kwakwihi naNzambi hichuma chaswayiku muloña twashakamaña nawantu abula kumukuhwelela Nzambi nawa asekeshaña chikaninu chindi chakuleta  kuwunda hamaseki. (2 Timotewu 3:1, 4; 2 Petulu 3:3, 13) Dichi twakeñaña akwetu akakwitiya atukolesheña muloña atukeña.​—Tañenu Aheberu 10:24, 25.

Kudikunda nawantu amukeña Nzambi kwatukwashaña kukundama kwakwihi naNzambi. Kupompa kwawaYinsahu jaYehova hinjila jajiwahi mwatukoleshelañawu akwetu.​—Tañenu Aroma 1:11, 12.

Munateli kukundama kwakwihi naYehova kuhitila mukutoñojoka chikupu hayuma yimunadizi Mwizu dindi. Toñojokenu hanyidimu yindi, hakufumba kwindi nihayikaninu yindi. Kulomba nikutoñojoka kwatukwashaña kwiluka nawu kukeña kwaNzambi nimaanindi hiyuma yalema.​—Tañenu Yoshuwa 1:8; Masamu 1:1-3.

Munateli kukundama kwakwihi naNzambi neyi mumukuhwelela chikupu. Ilaña chikuhwelelu chidi neyi chuma chikweti wumi chakeñaña kudya. Mwatela kudyisha chikuhwelelu chenu kuhitila mukutoñojoka hayuma yayileñelaña mwikali nachikuhwelelu.​—Tañenu Matewu 4:4; Aheberu 11:1, 6.

Yehova wakamenaña antu amukeña. Nateli kuyikiña kuyuma yejima yinateli kuluwañesha chikuhwelelu chawu nikuchiñeja kwawu kwakushakama nawumi haya nyaaka. (Masamu 91:1, 2, 7-10) Watukaanishaña kwila yuma yinateli kutuletela wubanji kumujimba nakubula kuzañalala. Yehova watulejaña chitwatela kuhanda.​—Tañenu Masamu 73:27, 28; Yakoba 4:4, 8.