Nsañu yayiwahi yafumaña kudi Yehova, Nzambi wamuzañalu, wakeñaña nindi yisaka yikali namuzañalu. (1 Timotewu 1:11) Diyi watachikili maluwi. Maluwi etejewa munshimbi aletaña muzañalu muchisaka muloña hichiswamu mwakukulishila anyana chiwahi. AkwaKristu atela kulemesha nshimbi jamwituña mwashakamawu jahosha hansañu yakusonekesha maluwi.​—Tañenu Luka 2:1, 4,5

Indi Nzambi wahoshahu nindidi hansañu yamaluwi? Wakeñaña nindi adisumbula atwalekihu kwikala mumpanda yimu. Yehova wakeñaña adisumbula kwikala nakashinshi mukachi kawu. (Aheberu 13:4) Wahela kudiseña. (Malaki 2:16) Ilaña wayiteja akwaKristu kudiseña nakusumbula hela kusumbuka cheñi neyi mwinikwawu neli wuvumbi.​—Tañenu Matewu 19:3-6, 9.

Yehova waleñeli amayala nawambanda nindi adikwasheña mumaluwi awu. (Kutachika 2:18) Chineli iyala diyi mutu wachisaka, wukweti mudimu weneni wakukeñela chisaka chindi yuma yakumujimba nikuyidizisha kulonda amwiluki Nzambi. Watela kudihana hakwila nawu yamukeñi iñodindi. Adisumbula atela kudikeña nikudilemesha. Chineli wejima wawu awanina wanyi, neyi anakukeña kwikala namuzañalu mumaluwi awu atela kwikala namuchima wakudanakena.​—Tañenu Aefwesesa 4:31, 32; 5:22-25, 33; 1 Petulu 3:7.

Neyi mumaluwi enu mudi wufwinda, mwatela kudikeña wonsu wenu. (1 Akorinda 13:4, 5) Izu daNzambi hidahoshaña nawu antu atela kumanisha kukala kwekala mumaluwi neyi ambukaku.​—Tañenu 1 Akorinda 7:10-13.

Yehova nakukeña nindi muzañalaleña. Wayifumbaña chiwahi kulonda mwiluki chimwatela kudiluñisha muwansi wenu. Nakukeña nindi mwovwahileña anvwali jenu muloña akweti maana nawa eluka yuma yayivulu. (Akolose 3:20) Yehova nakukeña cheñi nindi muzañalaleña hakwila yuma yakeñañayi Nleñi yenu niMwanindi.​—Tañenu Mukwakutaŋisha 11:9–12:1; Matewu 19:13-15; 21:15-16.

Mwatela kuzata kulonda mukeñeleña anyanenu yakudya, hakukama niyakuvwala. (1 Timotewu 5:8) Hakwila anyanenu ekali namuzañalu, mwatela kuyidizisha kulonda amukeñi Nzambi nikwiteja yayidizisheña. (Aefwesesa 6:4) Neyi mumukeña Nzambi nimwanenu wukusweja kumukeña. Neyi mukufumbaña mwanenu kuzatisha Izu daNzambi, wukwikala nayitoñojoka yayiwahi.​—Tañenu Kuhituluka 6:4-7; Yishimu 22:6.

Anyana atiyaña neyi munakuyihameka nikuyikolesha. Mwatela cheñi kuyifumba nikuyibabesha. Kufumba anyana muniyi njila kwayikiñaña kuyililu yinateli kuyineñesha. (Yishimu 22:15) Hela chochu, bayi mubabesha mwana munjila yawukatuku.​—Tañenu Akolose 3:21.

A Yinsahu jaYehova asoneka nyikanda yayivulu yinateli kukwasha sweje-e anvwali nianyana. Iyi nyikanda yashindamena haBayibolu.​—Tañenu Masamu 19:7, 11.