KUDIZA 10
Munateli Kwiluka Ñahi Kudifukula Kwalala?
1. Komana kwekala nsakililu yalala yimu hohu?
“Babelenu atuprofwetu akutwamba.”—MATEWU 7:15.
Yesu walejeli atumbanji twindi nsakililu yimu hohu, nsakililu yalala. Yidi neyi njila yaya kuwumi wahaya nyaaka. Yesu wahosheli nindi: “Ayimonaña antesha.” (Matewu 7:14) Nzambi weteja kudifukula kumu hohu kwashindamena Hezu dindi Bayibolu. Akwakudifukula alala akuhwelela yuma yimu.—Tañenu Yowanu 4:23, 24; 14:6; Aefwesesa 4:4, 5.
Talenu vidiyo Komana Nzambi Wetejaña Kwitiya Kwejima?
2. Indi Yesu wahosheli nindidi hadi akwaKristu akutwamba?
“Ahoshaña nawu twamwiluka Nzambi, ilaña nyidimu yawu yaya mwacheñi.”—TITUSA 1:16.
Yesu wahosheli nindi atuprofwetu akutwamba akaluwañesha akwaKristu. Amwekanaña hanji neyi hiyakwakudifukula alala. Machechi awu ahoshaña nawu hiyakwaKristu. Ilaña munateli kwiluka antu amuchidiwu chekalawu. Mukuyiluka ñahi? Mukudifukula kwalala dimwekala akwaKristu alala akweti yililu yayiwahi nawa alondelaña nshimbi.—Tañenu Matewu 7:13-23.
3. Munateli kwiluka ñahi akwakudifukula alala?
Talenu haniyi yinjikijilu yitanu yakuyilukilaku:
-
Akwakudifukula alala alemesha Izu daNzambi Bayibolu. Afwilaña kulondela nshimbi jamuBayibolu. Nsakililu yalala yaambuka nansakililu yashindamena hamaana awantu. (Matewu 15:7-9) Akwakudifukula alala akoñaña yuma yashimwinañawu kudi antu.—Tañenu Yowanu 17:17; 2 Timotewu 3:16, 17.
-
Atumbanji twaYesu alala alemeshaña ijina daNzambi, daYehova. Yesu walemesheli ijina daNzambi kuhitila mukudishimuna kudi antu. Wakwashili antu kulonda amwiluki Nzambi nawa wayilejeli kulombela ijina daNzambi nawu adilemeshi. (Matewu 6:9) Nsakililu yimu yidihi yatiyakeshaña ijina daNzambi kumwashakamaña?—Tañenu Yowanu 17:26; Aroma 10:13, 14.
-
AkwaKristu alala ashimwinaña nsañu yaWanta waNzambi. Nzambi wamutemesheli Yesu kulonda yashimwini nsañu yayiwahi yaWanta. Wanta waNzambi diwamba kakuula antu. Yesu watwalekeluhu nakuleja antu nsañu yaWanta ndo-o nikukufwa. (Luka 4:43; 8:1; 23:42, 43) Wahosheli nindi atumbanji twindi akashimwinaña nsañu yaWanta. Neyi muntu nenzi nakuyishimwina nsañu yaWanta waNzambi, watela wakundama kunsakililu yimu yidihi?—Tañenu Matewu 24:14.
-
Atumbanji twaYesu hiyekala kabadi kadinu ituña datamaku. Munateli kuyiluka muloña hiyadiñijaña mumapolitiki hela muyikonkojola yetuñaku. (Yowanu 17:16; 18:36) Cheñi, hiyembujolaña yililu yatama yawantu amudinu ituñaku.—Tañenu Yakoba 4:4.
-
AkwaKristu alala adikeña nankashi. Hamuloña wakudiza Izu daNzambi, alemeshaña antu akunyuza yejima. Hela chakwila nsakililu yakutwamba yavula kukwasha nankashi njita jasañawu akamatuña, akwakudifukula alala adiñijañamu wanyi. (Mika 4:1-3) Ilaña, akwaKristu alala azatishaña mpinji yawu nimali kukwasha nachu antu nikuyikolesha chakadi kumwekesha chaambu.—Tañenu Yowanu 13:34, 35; 1 Yowanu 4:20.
4. Munateli kwiluka nsakililu yalala?
Nsakililu yimu yidihi yatañishaña kushindamena Hezu daNzambi, yalemeshaña ijina daNzambi nawa yashimwinaña Wanta waNzambi nawu diwu wakakuula antu? Izanvu dimu didihi mwekala antu akeñañana nawa abulaña kuya kunjita? Anyi imunakutoñojoka?—Tañenu 1 Yowanu 3:10-12.
