Nsañu yayiwahi yakwila nawu antu akashakama haya nyaaka hamaseki ayisoneka muBayibolu. (Masamu 37:29) Bayibolu yatuñewa nanyikanda yanyanya 66. Nzambi wazatishili antu ashinshika 40 kusoneka Bayibolu. Nyikanda yatachi yitanu ayisonekeli kudi Mosi nawa munahiti yaaka kwakwihi na 3,500. Mukanda wakukumishaku awusonekeli kudi kapostolu Yowanu nawa munahiti yaaka kubadika ha 1,900. Ansoneki aBayibolu asonekeli yitoñojoka yanyi? Nzambi wahosheli nawansoneki aBayibolu kuhitila muspiritu yindi yajila. (2 Samweli 23:2) Asonekeli yitoñojoka yaNzambi, bayi yawuku. Komana Yehova diyi Nsoneki yaBayibolu.​—Tañenu 2 Timotewu 3:16; 2 Petulu 1:20, 21.

Talenu vidiyo Hinyi Nsoneki yaBayibolu?

Tuneluki netu Bayibolu ayisoneka kudi Nzambi muloña yashimuna jiika yuma yakamwekana kumbidi. Kwosi muntu wunateli kushimuna mwenimuku. (Yoshuwa 23:14) Nzambi Wañovu Yejima diyi hohu wunateli kushimuna chikupu yuma yakamwekena antu kumbidi.​—Tañenu Isaya 42:9; 46:10.

Chakadi nikujina, mukanda wasonekayi Nzambi watela kwambukaku nawa dichi wudi. Yihita nayihita yamaBayibolu anayipulinti mumadimi amavulu nankashi. Hela chakwila yinashimbuli, Bayibolu yendelaña hamu nansañu jasayansi. Cheñi, nsañu yasonekeliwu ansoneki 40 aBayibolu hiyaditadikishañaku. * Nsañu yahosha Bayibolu kutalisha hakukeña yinateli kufuma kudi Nzambi walala hohu, Nzambi wakukeña. Nawa yikweti ñovu yakuhimpa chihandilu  chawantu. Yumiyi yinaleteshi antu amavulu kwiteja nawu Bayibolu Hiizu daNzambi.​—Tañenu 1 Atesalonika 2:13.

Talenu vidiyo Yumanyi Yatukwashaña Kwiluka Netu Bayibolu hiMukanda Walala?

Bayibolu yahoshaña hansañu yayiwahi nawu Nzambi wayifuukwila antu yuma yayiwahi. Nsona yalumbulula chajimbesheli antu kukooleka kwakushakama muparadisa hamaseki hatachi nichakafuntishayi cheñi paradisa.​—Tañenu Chimwekeshu 21:4, 5.

Mwizu daNzambi mudi cheñi nshimbi, yishina nikufumba. Cheñi, Bayibolu yashimuna wunsahu wamwekeshaña Nzambi chahembeleñayi antu nawa yumiyi yinatukwashi kwiluka chekalayi Nzambi. Dichi, Bayibolu yinateli kuyikwasha kumwiluka Nzambi. Yashimuna chimunateli kwikala ibwambu dindi.​—Tañenu Masamu 19:7, 11; Yakoba 2:23; 4:8.

Ayinu buloshuwa yikuyikwashaku kwiluka nsañu yidi muBayibolu kuhitila mukuzatisha jinjila jojimu jazatishileñayi Yesu. Wazatishileña nsona yamuBayibolu nankashi nawa ‘walumbulwileña muNyikanda yajila.’​—Tañenu Luka 24:27, 45.

Kudi yuma yantesha hohu yatuzañaleshaña neyi chatuzañaleshaña nsañu yayiwahi yakufuma kudi Nzambi. Ilaña antu amakwawu ayidiwulaña, amakwawu niwena ahilaña. Dichi bayi muneñaku. Kuchiñeja kwenu kwakushakama nawumi haya nyaaka hamaseki kwashindamena hakumwiluka Nzambi.​—Tañenu Yowanu 17:3.