Munsakililu jejima mudi antu amawahi. Nsañu yayiwahi yakwila nawu Nzambi wayimonaña nikuyakamena. Chawushona, yuma yatama anakuyilila mwijina dansakililu. (2 Akorinda 4:3, 4; 11:13-15) Kwesekeja nayileji yawakwayikuzulemba, nsakililu yadiñijaña munsañu yakujaha antu nanyitenda nzumbu, kujaha nyuza yawantu, njita nikukabisha anyana. Yumiyi yaneñeshaña antu amukuhwelela Nzambi chikupu!​—Tañenu Matewu 24:3-5, 11, 12.

Ilaña nsakililu yalala yamushimekaña Nzambi, nsakililu yakutwamba yamuneñeshaña. Yatañishaña antu nsañu yabula muBayibolu, ntañishilu yakutwamba yahosha hadi Nzambi nihadi afu. Ilaña Yehova nakukeña nindi antu amwiluki.​—Tañenu Ezekeli 18:4; 1 Timotewu 2:3-5.

Nzambi waneñaña nansakililu yahoshaña nawu yamukeña henohu yasweja kukeña ituña daSatana. (Yakoba 4:4) Izu daNzambi datenaña nsakililu yakutwamba yejima nawu “Babiloni Muneni.” Babiloni hiijina dafuma kumusumba wakushankulu mwatachikilili nsakililu yakutwamba hanyima yaDibaji dadiñaku mumafuku aNowa. Nzambi keña yajilumuni munjila yakukasumwisha nsakililu yadimbaña nikukabisha antu.​—Tañenu Chimwekeshu 17:1, 2, 5, 16, 17; 18:8.

Kudi cheñi nsañu yayiwahi. Yehova hajimbala antu ashinshika apalañena munsakililu yakutwamba mukaayi kejimaku. Nakuyipompesha kuhitila mukuyidizisha chalala.​—Tañenu Mika 4:2, 5.

Yehova wakamenaña antu akeña yuma yalala niyayiwahi. Wayikonkomwenaña nindi afumi munsakililu yakutwamba. Antu amukeña Nzambi anakuhimpa yililu yawu kulonda amuzañaleshi.​—Tañenu Chimwekeshu 18:4.

Muyaaka nkulakaji yatachi, antu ashinshika chatiyiluwu nsañu yayiwahi kudi apostolu, etejeli namuzañalu. Ekalili nachihandilu chachiwahi chayilejeliwu kudi Yehova, chihandilu chamuzañalu, chihandilu chachiwahi chakuchiñeja. Atushila chakutalilahu chachiwahi muloña etejeli nsañu yayiwahi kuhitila mukumutwamijaku Yehova muchihandilu chawu.​—Tañenu 1 Atesalonika 1:8, 9; 2:13.

Yehova watambwilaña antu afumaña munsakililu yakutwamba nakwinza muchisaka chawantu jindi akwakudifukula. Neyi mwiteja mutambi waYehova, mukwikala ibwambu dindi nawa mukwikala muchisaka chachiha chawakwakudifukula aYehova nawa mwakatambwila wumi wahaya nyaaka.​—Tañenu Maku 10:29, 30; 2 Akorinda 6:17, 18.

Nsañu yayiwahi yidi yakwila nawu mpinji yakusompesha nsakililu yakutwamba yinakwinza. Yakakuula antu kuyihuñu yinakumonawu mukaayi kejima. Nsakililu yakutwamba hiyamba kadimba cheñi antu nikuyambulaku. Antu ejima akapuluka akadifukulaña hamu kudi Nzambi walala wumu hohu.​—Tañenu Chimwekeshu 18:20, 21; 21:3, 4.