Nzambi walala diyi Nleñi wayuma yejima. Hadiña nantachikiluku nawa hamba kekala nansaku. (Masamu 90:2) Diyi Nsulu yansañu yayiwahi yidi muBayibolu. (1 Timotewu 1:11) Chineli Nzambi diyi watwinka wumi, twatela kulomba kudi yena hohu.​—Tañenu Chimwekeshu 4:11.

Kwosi muntu wamumonahu dehi Nzambiku muloña hiSpiritu, dikwila nawu hiwumi wambukaku chikupu nayileñaleña yitwamonaña yekala hamaseki. (Yowanu 1:18; 4:24) Hela chochu, tunateli kwiluka yililu yaNzambi kuhitila muyileñaleña yindi. Chakutalilahu, nyikabu yashiyashana ninkenu yamwekeshaña nawu watukeña nawa wukweti maana. Kutoha kwamawulu nimaseki kwatulejaña nawu wukweti ñovu.​—Tañenu Aroma 1:20.

Tunateli cheñi kwiluka yililu yaNzambi neyi tutaña muBayibolu. Chakutalilahu, Bayibolu yatulejaña yuma yakeñayi Nzambi niyahelayi, chahembañayi antu nichelañayi neyi antu anamuvulumuni.​—Tañenu Masamu 103:7-10.

Yesu wahosheli nindi: ‘Tata yetu wekala mwiwulu, ijina deyi dijili.’ (Matewu 6:9) Hela chakwila Nzambi wukweti nkumbu jajivulu, ilaña wukweti ijina dimu hohu. Aditenenaña munjila jamboka-mboka kwesekeja namadimi. MuLunda aditenaña nawu “Yehova.” Ilaña antu amakwawu aditenaña nawu “Yahweh.”​—Tañenu Masamu 83:18.

MumaBayibolu amavulu ijina daNzambi adifumishamu nakuhiñishamu nkumbu jidi neyi Mwanta hela Nzambi. Ilaña hasonekeleñawu Bayibolu, ijina daNzambi damwekeni kwakwihi namapampa 7,000. Yesu walejeleña antu ijina daNzambi hampinji  yayitañishileñayi kulonda amwiluki Nzambi.​—Tañenu Yowanu 17:26.

Talenu vidiyo Komana Nzambi Wukweti Ijina?

Chineli antu mukaayi kejima anakumona yihuñu, dikwila nawu Yehova hiNzambi wabulaña kutwakamena? Antu amakwawu ahoshaña nawu watukabishaña kulonda yatweseki, ilaña dimu wanyi.​—Tañenu Yakoba 1:13.

Nzambi watulemesha kuhitila mukutwinka wuswa wakudifuukwila. Komana hitwasakililaña hakutwinka wuswa wakufuukulahu kumukalakela Nzambiku? (Yoshuwa 24:15) Ilaña antu amavulu akeñaña kwila akwawu katama, dihanafumi yihuñu kuvula nankashi. Yehova waneñaña hakumona antu anakwila yuma yatama.​—Tañenu Kutachika 6:5, 6.

Yehova hiNzambi watwakamenaña. Wakeñaña nindi tudiluñisheña. Katataka yafumishuhu yihuñu niantu ejima anakuleta yihuñu. Chayinu mpinji, kudi chuma chinaleteshi yeteji yihuñu yitwalekihu hakapinji kantesha. Twakadiza hanichi chuma muKudiza 8.​—Tañenu 2 Petulu 2:9; 3:7, 13.

Yehova natutambiki nindi tukundami kwakwihi nayena kuhitila mukuhosha nindi mukulomba. Watukeña hamuntu-hamuntu. (Masamu 65:2; 145:18) Wudi namuchima wakutwanakena. Welukaña nindi tunakufwila kumuzañalesha hela chakwila mpinji jikwawu twakañanyaña. Hela chakwila tudi akwanshidi, tunateli kwikala nawubwambu wawuwahi naNzambi.​—Tañenu Masamu 103:12-14; Yakoba 4:8.

Chineli Yehova watwinka wumi, twatela kumukeña nankashi kubadika chitwakeña antu amakwawu. (Maku 12:30) Chimukumwekeshaña nenu mwamukeña Nzambi kuhitila mukudiza hadi yena nikwila yuma yinakukeñayi, mukusweja kukundama kwakwihi nayena.​—Tañenu 1 Timotewu 2:4; 1 Yowanu 5:3.