KUDIZA 7
Wanta waNzambi Hichumanyi?
1. Wanta waNzambi hichumanyi?
Yumanyi yamuletesha Yesu kwikala Mwanta watelela?—MAKU 1:40-42.
Wanta waNzambi hinfulumendi yamwiwulu. Wakasinsa hanfulumendi jejima nawa wakela nkeñelu yaNzambi kuzatika mwiwulu nihamaseki. Nsañu yahosha haWanta waNzambi yayiwahi. Katataka Wanta waNzambi wukoñeli antu yuma yinakaankiliwu nachiyuulu chachiwahi. Wakanuña hamu antu ejima ashakama hamaseki.—Tañenu Danyeli 2:44; Matewu 6:9, 10; 24:14.
Wanta wekalaña namwanta. Yehova watonda Mwanindi, Yesu Kristu, kwikala Mwanta waWanta Windi.—Tañenu Chimwekeshu 11:15.
Talenu vidiyo Wanta waNzambi hiChumanyi?
2. Muloñadi Yesu chekalilayi Mwanta watelela?
Mwana kaNzambi hiMwanta watelela muloña wukweti luwi nawa washa muchima hakwila yuma yaloña. (Yowanu 1:14) Cheñi wukweti ñovu nankashi jakukwasha antu muloña wakayuulilaña adinu iseki mwiwulu. Chamusañwiliwu, wayili mwiwulu nakushakama kuchikasa chachidiilu chaYehova nakuhembelela. (Aheberu 10:12, 13) Nkumininaku, Nzambi wamwinkeli wuswa wakutachika kuyuula.—Tañenu Danyeli 7:13, 14.
3. Anyi akayuula naYesu?
Izanvu datenañawu nawu ‘akwakujila’ akayuula chimu naYesu mwiwulu. (Danyeli 7:27) Apostolu aYesu ashinshika diwu adiña akwakujila atachi kutonda. Nikulelu, Yehova wuchidi kutonda akwakujila amayala niambanda ashinshika. Kufwana Yesu, ayisañulaña nanyijimba yaspiritu.—Tañenu Yowanu 14:1-3; 1 Akorinda 15:42-44.
Antu añahi akaya mwiwulu? Yesu wayiteneni nindi ‘kamukanka kanyanya kanyikoku.’ (Luka 12:32) Ejima hamu akekala 144,000. Akayuulaña adinu iseki hamu naYesu.—Tañenu Chimwekeshu 14:1.
4. Chumanyi chamwekeni chelili Yesu yatachiki kuyuula?
Wanta waNzambi watachikili kuyuula mu 1914. * Chuma chatachi cheliliyi Yesu hekaliliyi Mwanta wamunatili Satana niandemoni jindi hamaseki. Satana wahilili nankashi nawa watachikili kuleta yihuñu heseki dejima. (Chimwekeshu 12:7-10, 12) Kufuma hampinji yamunatiluwu, antu anakumona yihuñu yasweja. Njita, nzala yakapwelendendi, yipupu ninyitentanshi yuma yejimiyi ‘hichinjikijilu’ chinakumwekesha nawu Wanta keña wutachiki kuyuula iseki dejima.—Tañenu Luka 21:7, 10, 11, 31.
5. Indi Wanta waNzambi wunakuzata mudimwinyi?
Wanta waNzambi watachika dehi kunuñañesha izaza deneni dakunyuza yejima kuhitila mumudimu wakushimwina wunakuzatawu mukaayi kejima. Yihita yawantu adizoza anakwikala ayilolu jaYesu. Wanta waNzambi wakayikiña hampinji yiwakakisañanaña dinu ituña datama. Antu ejima anakukeña kutambwila nkisu yaWanta waNzambi atela kwikala ayilolu ovwahila aYesu.—Tañenu Chimwekeshu 7:9, 14, 16, 17.
Muyaaka 1,000, Wanta wakakoña nkeñelu yaNzambi yatachi yafuukwililiyi muchidi wawantu. Iseki dejima dakekala paradisa. Nkumininaku, Yesu wakafuntisha Wanta kudi Tata yindi. (1 Akorinda 15:24-26) Kudihu muntu imweluka imunakukeña kulejaku nsañu yaWanta waNzambi?—Tañenu Masamu 37:10, 11, 29.
^ para. 6 Neyi munakukeña kwilukilahu nsañu jikwawu kutalisha hawuprofwetu wamuBayibolu chiwashikijeweli mu 1914, talenu mazu adi kunsa 22 mumukanda waYumanyi Yinateli Kutudizisha Bayibolu?
