KUDIZA 4
Yesu Kristu Hinyi?
1. Indi chihandilu chaYesu chatachikili ñahi?
Yililwinyi yadiñi naYesu yakokweleña antu kwinza kudi yena?—MATEWU 11:29; MAKU 10:13-16.
Kwambukaku nawantu, Yesu wadiña mwiwulu namujimba waspiritu henohu kanda yenzi nakuvwalika hamaseki. (Yowanu 8:23) Diyi asambililiwu kuleña kudi Nzambi, nawa amuzatishili hakuleña yuma yikwawu yejima. Yena nkawindi diyi aleñeliwu hohu kudi Yehova nawa dichamutenenañawu nawu Mwana kaNzambi “wumu hohu.” (Yowanu 1:14) Yesu wadiña Mukwakumuhoshelaku Nzambi, dichamutenenañawu cheñi nawu “Izu.”—Tañenu Yishimu 8:22, 23, 30; Akolosi 1:15, 16.
2. Muloñadi Yesu chenjililiyi hamaseki?
Nzambi watemesheli Mwanindi hamaseki kuhitila mukutuntulula wumi windi kufuma mwiwulu nakuwisha mwivumu damujiki kaYudeya wejina daMariya. Dichi, Yesu hadiña natata yindi wamuntuku. (Luka 1:30-35) Yesu wenjili hamaseki (1) nakuleja antu chalala kulonda amwiluki Nzambi, (2) nakuhana chakutalilahu chakwila nkeñelu yaNzambi hela chakwila tudi muyihuñu (3) nikuhana wumi windi wawanina neyi ‘ifutu danyiloña.’—Tañenu Matewu 20:28.
3. Muloñadi chitwakeñelaña ifutu danyiloña?
Ifutu danyiloña hiwuseya wafwetañawu hakukuula nachu muntu anakukeña kujahawu. (Kwidika 21:29, 30) Hatachi, Nzambi haleñeli antu nindi ashinakajeña nikufwaku. Tuneluki ñahi? Nzambi walejeli iyala watachi, Adama, nindi neyi yakoña chuma chatenaña Bayibolu nawu “nshidi,” wakafwa. Dichi neyi Adama havulumwinuku, kachi wafwa wanyi. (Kutachika 2:16, 17; 5:5) Neyi chahoshaña Bayibolu, kufwa ‘kweñilili’ mwituña mwashakamawu antu kuhitila mudi Adama. Adama niyena wasambwishili nshidi nikufwa kudi anyanindi ejima. Tunakukeña ifutu danyiloña kulonda atukuuli nachu kukufwa kutwaswana kudi Adama.—Tañenu Aroma 5:12; 6:23.
Hinyi wunateli kuhana ifutu danyiloña kulonda atukuuli kukufwa? Neyi tufwa, twafwetaña wuloku wanshidi yetu. Kwosi muntu wabula kuwanina wunateli kukuula akwawu kunshidi.—Tañenu Masamu 49:7-9.
4. Muloñadi chafwililiyi Yesu?
Kwambukaku nanetu, Yesu wadiña wawanina. Dichi hateleli kufwa kukoola nshidi yindiku, muloña hadiñi nanshidiku. Ilaña, Yesu wafwili kukoola nshidi jawantu. Nzambi wamwekesheli nindi wakeña antu nankashi kuhitila mukutemesha Mwanindi kulonda yatufwili. Yesu wamwekesheli cheñi nindi watukeña kuhitila mukumwovwahila Tata yindi nikuhana wumi windi kukoola nshidi jetu.—Tañenu Yowanu 3:16; Aroma 5:18, 19.
Talenu vidiyo Muloñadi Chafwililiyi Yesu?
5. Chumanyi chinakwilayi Yesu hayinu mpinji?
Hampinji yadiñayi hamaseki, Yesu wokili akata, wasañwili afu nikupulwisha antu adiña muwubanji weneni. Chumichi chamwekesheli yuma yakakoñelayi antu ejima ovwahila kumbidi. (Matewu 15:30, 31; Yowanu 5:28) Chafwiliyi Yesu, Nzambi wamusañwili cheñi namujimba wakuspiritu. (1 Petulu 3:18) Kufumahu Yesu washakamini nakuhembelela kuchikasa chaNzambi chachidiilu sampu nichamwinkeluwu wuswa kudi Yehova wakuyuula neyi Mwanta heseki dejima. (Aheberu 10:12, 13) Chayinu mpinji, Yesu hiMwanta wunakuyuula mwiwulu nawa atumbanji twindi anakushimwina nsañu yayiwahi mwahita ituña dejima.—Tañenu Danyeli 7:13, 14; Matewu 24:14.
Yesu keña yazatishi ñovu yindi yaWanta kulonda yajiyishi makabi ejima niantu ayiletaña. Antu ejima amukuhwelelaña Yesu kuhitila mukumwovwahila akaluña nawumi muparadisa hamaseki.—Tañenu Masamu 37:9-11.