Mukanda waNsona Jatukwashaña Kumukalakela Yehova wukuyikwashaña kuwana swayi mavasi ninsañu yamuBayibolu yinateli kuyikwasha kumanisha kukala kumunakumona. Cheñi wukuyikwashaña kuwana swayi nsañu yamuBayibolu yimunateli kuzatisha hakukolesha akwenu kulonda muyikwashi kufuukula yuma yikumuzañalesha Yehova. Chakwila, yenu hamutu wansañu wumunakukeña, mukuwana hadi malwihu nimazu antesha akuyikwasha kwiluka nsañu yamuBayibolu yimwatela kuzatisha. (Talenu chikasha “ Chakuzatisha Iwu Mukanda.”) Mudi yishina yayivulu yinashindameni Hezu daNzambi yinateli kuyikwasha muchihandilu chenu. Mudi niyishina yamuBayibolu yimunateli kuzatisha hakufumba nikukolesha akwenu.

Neyi muwana mutu wansañu bayi neyi nsona jidihu dijejima jahosha hanowu mutuku. Ilaña iwu mukanda wukuyikwashaña nankashi kusandujola. (Yis 2:​1-6) Neyi munakukeña kwilukilahu nsañu yikwawu, talenu chahosha nsona jikwawu jamuBayibolu ninsañu yakudiza yidi muBayibolu yaNsona jaKaayi Kakaha. Zatishenu Chitwa chaKukwasha aYinsahu jaYehova haKusandujola Nsañu hela Watch Tower Publications Index kulonda mwiluki mwatalisha nsona nichakuyizatisha. Talenu nsañu yinedishiwu katataka kulonda mwiluki neyi nsañu yamuNsona yimunakutaña yalala.

Iwu mukanda waNsona Jatukwashaña Kumukalakela Yehova wukuyikwasha kuwuna namaana akutiyishisha nikwiluka nsañu yekala muNyikanda Yajila. Chimukuzatishaña iwu mukanda, mukwiteja chikupu nenu mwamweni “Izu daNzambi dadumi nawa dikweti ñovu chikupu.”—Heb. 4:12.