CHIBALU 1
Chalala chaWanta—Kuhana Yakudya yakuSpiritu
TWILI netu kadizi wenu waBayibolu nazañalali muloña natiyishi mwatalisha nsona yimunatañi. Hakuyihula mumesu awunda nindi, “Komana chalala munakunleja nenu Bayibolu yatañishaña nawu tunateli kushakama haya nyaaka muParadisa, hohanu hamaseki?” Mukwenu imunakushimwina nindi hakumwemweta nakumwihula nindi, “Bayibolu yinahoshi nawudi?” Kadizi hakudipukumuna kumutu nakuhosha nindi, “Nahayami hakuwana nami kanda andizisheñahu dehi nsañu yamuchidiwu!” Mwanuka nikwanuka nenu wahosheli nsañu yoyimu nyilungu yantesha yinahituhu chadiziliyi nindi Nzambi ijina dindi diyi Yehova.
Komana mwamonahu dehi chuma chamuchidiwu? Antu jaNzambi amavulu amonahu dehi chumichi. Yuma yamuchidiwu yatuleñelaña kulemesha chawaana chitwatambwila dikwila nawu chalala. Dihulenu nenu: Nadizili ñahi ichi chalala? Muchinu chibalu tukudiza hanilu lwihu. Antu jaNzambi chelukañawu kutiyisha kwakuha chovu-chovu, hiwunsahu wakwila nawu Wanta waNzambi walala. Hayaaka 100 yinahituhu, Mwanta waniwu Wanta Yesu Kristu, nakuzata nañovu hakudizisha antu jaNzambi chalala.
MUCHINU CHIBALU
KAPETULU 3
Yehova Wasololaña Nkeñelu Yindi
Komana Wanta wadiña hankeñelu yaNzambi yatachi? Indi Yesu walumbulwili ñahi chalala haWanta?
KAPETULU 4
Yehova Natuumbakeshi Ijina Dindi
Yumanyi yinakoñi Wanta kutalisha hejina daNzambi? Yumanyi yimunateli kwila kulonda mujiliki ijina daNzambi?
KAPETULU 5
Mwanta Natoñeki Chejeji haWanta
Kwiluka walala kutalisha haWanta waNzambi, anyuuli niantu akayuulawu niyuma yakeñekaña hakwikala ashinshika.
