1, 2. Indi Yehova walumbululaña ñahi muloña waleñeleliyi antu?

ANWVALI akeña anyanawu ahanjekaña hamu nawu nsañu yamuchisaka. Hela chochu, hiyayilejaña nsañu yejimaku. Ayilejaña hohu nsañu yinelukiwu nawu anyanawu akuyitiyisha.

² Munjila yoyimu, Yehova walumbululaña muloña waleñeleliyi antu. Ilaña wasolweli hohu iyi nsañu chelukiliyi nindi yadiña mpinji yatelela. Shinshikenu chantesha Yehova chinamwekeshiyi chalala haWanta mukuhanda kwawantu.

3, 4. Komana Yehova watoñweleli chadimu nindi antu akadikaña nachiyuulu chindi? Lumbululenu.

³ Hakutachika, Wanta wawuMesiya hiwadiña hakachi kankeñelu yaYehovaku. Muloñadi? Yehova hatoñweleli chadimu nindi antu akadikaña nachiyuulu chindiku, muloña wayileñeli nawuswa wakudifuukwila aweni. Dichi walejeli Adama naEva nkeñelu yindi hadi antu nindi: “Semununenu, muvuleña, muwanini heseki, mudovwahishi.” (Kutach. 1:28) Yehova wakeñeleña cheñi nindi alondeleña nshimbi jindi. (Kutach. 2:16, 17) Adama naEva adi kutondahu kwikala ashinshika. Neyi atwalekelihu ashinshika kushilahu nianyanawu, hitwadi kukeña Wanta wudi mumakasa aKristu netu wushikiji nkeñelu yaNzambiku. Mutenowu antu ejima mukaayi adi kwikala awanina, nikudifukulaña kudi Yehova.

⁴ Satana, Adama naEva chadikañiliwu, Yehova walekeli wanyi nkeñelu yindi yakwinzesha iseki nawantu awanina. Ilaña wahimpili njila yakushikijilamu nkeñelu yindi. Nkeñelu yindi hiyidi neyi masuwa yahitaña munjanji yimu hohu kulonda yishiki kuyinakuyaku nawa anateli kuyikañesha kudi yuma yikwawu. Yehova chafuukulayi kwila chuma, kwosi wunateli kumukañesha kuchishikija. (Tañenu Isaya 55:11.) Neyi kumwekena chuma chikukañesha nkeñelu yindi, Yehova wazatishaña njila yacheñi. * (Kwid. 3:14, 15)  Neyi mpinji yakuleja ambuñindi ashinshika njila yinafuukuliyi yakushikijilamu nkeñelu yindi yinashikili, wayilejaña.

5. Indi Yehova wafuukwili hodi chadikañiluwu antu muEdeni?

⁵ Chelili antu adikañi muEdeni, Yehova wafuukwili nindi kwikali Wanta. (Mat. 25:34) Hampinji yamwekeni neyi antu adiña adana mwakwilila, Yehova washimwini njila yikazatishayi hakukuula antu nikufumishahu makabi aletayi Satana muloña wakufwila wanta. (Kutach. 3:14-19) Hela chakwila Yehova washimwini iyi njila, walumbulwili wanyi nsañu yaWanta yejima hohenohu.

6. Yehova wakanini nindidi nawa chumanyi chabuliliyi kulumbulula?

⁶ Yehova wakanini muwuprofwetu watachi nindi, ‘mwana’ wakamuchika kapela kumutu. (Tañenu Kutachika 3:15.) Ilaña, iwu mwana nimwana kakapela hiyayilumbulwili jiika hayina mpinjiku. Ilaña, Yehova walumbulwili chikupu iyi nsañu hanyima yayaaka 2,000. *

7. Muloñadi Abarahama chamutondeleleliwu nawa chumanyi chalema chitwadizilañaku?

⁷ Yehova washimwini nindi iwu mwana wakaniniyi wukafuma muchisaka chaAbarahama. Abarahama amutondeli muloña ‘watiyilili mwizu’ daYehova. (Kutach. 22:18) Iyi nsañu yatudizishaña chuma chalema chakwila nawu, Yehova washimunaña nkeñelu yindi kudi antu amwakamaña.—Tañenu Masamu 25:14.

8, 9. Nsañwinyi yalema yahosha hadi mwana yasolweliyi Yehova kudi Abarahama niYakoba?

⁸ Yehova chahosheleñayi nebwambu dindi Abarahama kuhitila mudi kañelu, washimwini nindi mwana wakafuma muchisaka chindi diyi wakamuchika kapela. (Kutach. 22:15-17; Yak. 2:23) Hanu dinu iwu mwana wakamuchika ñahi kapela? Hinyi wadiña kapela? Nsañu yalumbulwiliyi Nzambi yakwili awa malwihu.

⁹ Yehova wahosheli nindi mwana wakavwalikila mudi mwizukulwa Abarahama, Yakoba, iyala wakuhweleleli Nzambi chikupu. (Kutach. 28:13-22) Yehova wamulejeli Yakoba nindi Mwana Wakaniniyi, wakafuma muchisaka chaYuda mwana kaYakoba. Yakoba waprofweteli nindi iwu mwana wukafuma mwivumu daYuda wukatambwila “nkuunyi,” dikwila nawu mbwechi yawanta nawa yenowu diyi ‘amba kovwahilawu antu amumatuña.’ (Kutach. 49:1, 10) Yehova washimwini kuhitila muniwu wuprofwetu nindi Mwana Wakaniniyi wakekala nyuuli nawa mwanta.

10, 11. Muloñadi Yehova chashimwiniyi nkeñelu yindi kudi Davidi naDanyeli?

¹⁰ Chimwahitili yaaka 650 kufuma hafwiliyi Yuda, Yehova wamulejeli Mwanta Davidi, wamuchisaka chaYuda nsañu yikwawu yahosha hankeñelu yindi. Yehova wamuteneni Davidi nindi “muntu wakumuchima windi.” (1 Sam. 13:14; 17:12; Yil. 13:22) Chineli Davidi wamwakamineña Nzambi, Yehova watiyañeni nindi chitiyañenu nawa wamukanini  nindi mwana wumu wakafuma muchisaka chindi wakayuula haya nyaaka.—2 Sam. 7:8, 12-16.

¹¹ Chimwahitili yaaka 500, Yehova walejeli kaprofwetu Danyeli kushimuna chaaka chamba kavwalika iwu Wawayishewa hamaseki hela netu Mesiya. (Dan. 9:25) Yehova wamuteneni Danyeli nindi “wasweja kukeñewa.” Muloñadi? Muloña Danyeli wamulemesheli Yehova nankashi nawa watwalekeluhu kumukalakela.—Dan. 6:16; 9:22, 23.

12. Danyeli amulejeli kwila chumanyi nawa muloñadi?

¹² Hela chakwila Yehova walejeli atuprofwetu ashinshika adi neyi Danyeli kusoneka nsañu yayivulu hadi mwana wachikaninu, Mesiya, mpinji yakwila Yehova yasololi iyi nsañu kulonda ambuña indi ayiluki muyatalishili yadiña kanda yishiki. Chakutalilahu, Danyeli chamweniyi chimwenu chahosheleña hakutachika kuyuula kwaWanta waNzambi, amulejeli kujika wuprofwetu kushika nimpinji yatoñweliyi Yehova. Yina mpinji chiyashikili, kwiluka kwakweni kwatachikili ‘kuvula’.—Dan. 12:4.

13. (a) Mwana akaninuwu wadiñanyi? (b) Yesu walumbulwili ñahi wuprofwetu wasonekawu haKutachika 3:15?

¹³ Yehova washimwini jiika nindi Yesu diyi mwana wakaniniyi, wamuchisaka chaDavidi wukayuula neyi Mwanta. (Luka 1:30-33; 3:21, 22) Yesu chatachikiliyi mudimu windi wakushimwina, chadiña neyi kwiji itañwa datoñekeleli hadi antu kulonda eluki chalala hankeñelu yaNzambi. (Mat. 4:13-17) Chakutalilahu, Yesu wakwashili antu kwiluka “kapela” atenawu haKutachika 3:14, 15, chamuteneniyi Diyabolu nindi “mbanji” nawa “tata yakutwamba.” (Yow. 8:44) Muchimwenu chamumwekesheleliyi Yowanu, Yesu wamuteneni “kapela mukulu” nindi diyi “atenañawu nawu Diyabolu nawa Satana.”  * (Tañenu Chimwekeshu 1:1; 12:9.) Muchimwenu chochimu, Yesu, dikwila nawu mwana wakaniniwu, walumbulwili chikashikijayi wuprofwetu washimwinuwu muEdeni nikumuchika Satana kumutu.—Chim. 20:7-10.

14-16. Komana atumbanji amumafuku awapostolu elukileña mwatalishileña chalala chayilejeleñayi Yesu? Lumbululenu.

¹⁴ Neyi chitwamona muKapetulu 1 kawunu mukanda, Yesu wahosheli nankashi haWanta. Bayi neyi mpinji yejima wayilejeleña atumbanji twindi nsañu yakeñeleñawu kwilukaku. Nihampinji yayilejeliyi nsañu yikwawu, mwahitileña yaaka yayivulu hakwila nawu atumbanji twaKristu atachiki kwiluka mwatalishili chalala chayilejeliyi Mwanta wawu. Talenu yakutalilahu.

¹⁵ Mu 33 C.E., Yesu washimwini jiika nindi akayuula hamu naMwanta waWanta waNzambi akafuma hamaseki nawa akayisañula nakwikala yileñeleña yakuspiritu mwiwulu. Ilaña atumbanji twindi elukili wanyi mwatalishiliyi.  (Dan. 7:18; Yow. 14:2-5) Muchaaka chochimu, Yesu wazatishili yishimu hakulumbulula nindi hakahita mpinji yayilehi kufuma hakayayi mwiwulu hakwila nawu Wanta wakatachiki kuyuula. (Mat. 25:14, 19; Luka 19:11, 12) Atumbanji hiyelukili ichi chikuma chalemaku, dichi amwihwili Yesu asañwiliwu nawu: “Wunakufuntisha wanta kudi aIsarela hayoyinu mpinji tahindi?” Yesu hayilejeli nsañu yikwawu hayina mpinjiku. (Yil. 1:6, 7) Yesu washimwini cheñi nindi kukekala “anyikoku amakwawu,” akabula kwikala amwiyinda ‘damukanka wanyikoku wanyanya’ dawakwawu anyuuli. (Yow. 10:16; Luka 12:32) Atumbanji twaKristu elukili wanyi antu ateleleli kwikala munawa mazaza ayedi ilaña enjili nakwiluka hanyima ya 1914 hatachikili Wanta kuyuula.

¹⁶ Yesu wadi kuyileja atumbanji twindi nsañu yayivulu hampinji yadiñayi hamaseki, ilaña welukili nindi hiyakutwesha kuyilukaku. (Yow. 16:12) Chakadi nikujina, nsañu yayivulu yahosha haWanta ayisolweli mumpinji yawapostolu. Ilaña, mpinji yadiña kanda yishiki hakwila nawu eluki nsañu yamuchidiwu.

17. Twatela kwila ñahi kulonda tutiyishi chalala chahosha haWanta, nawa yumanyi yikwawu yakeñekaña?

¹⁷ Yehova wamukanini Danyeli nindi ‘mumpinji yakukuminina,’ antu amavulu ‘akatambatamba nawa kwiluka kwakweni’ hankeñelu yaNzambi kwakavula. (Dan. 12:4) Antu akeñaña iku kwiluka atela kuzata nañovu hakwila eluki. Mukanda wumu wahosha nawu izu dachiHeberu dabalumunawu nawu ‘kutambatamba’ datalisha kudi muntu wunakushinshika mukanda nakanañachima. Hela tukutaña Bayibolu nakanañachima ñahi, neyi Yehova kutukwasha nehi hitukwiluka chalala chaWantaku.—Tañenu Matewu 13:11.

18. Indi antu amwakamaña Yehova amwekeshaña ñahi chikuhwelelu nikudizoza?

 ¹⁸ Neyi chochasolweleñayi Yehova chalala chaWanta chovu chovu muyaaka yakuleta mu 1914, natwalekihu kwila chochimu nimumpinji yakukuminina. Neyi chitwakadiza muTupetulu 4 na 5 twawunu mukanda, hayaaka 100 yinahituhu antu jaNzambi ahitulukaña muyuma yadizañawu nakuyolola kapampa kakavulu. Komana chumichi chinayi mukwila nawu Yehova wayikwashaña wanyi? Inehi. Wayikwashaña. Muloñadi? Muloña antu amwakamaña Yehova amwekeshaña yilwilu yiyedi yakeñayi, chikuhwelelu nikudizoza. (Heb. 11:6; Yak. 4:6) Ambuña Yehova akuhwelela nawu yikaninu yejima yekala Mwizu daNzambi yikashikijewa. Amwekeshaña kudizoza neyi eteja nawu alumbulwili mwaluwa kutalisha chiyikashikijewa iyi yikaninu. Kaposhi Kakutalila kaMarch 1, 1925 kamwekesheli nawu adizoza, muloña kahosheli nawu: “Tweluka netu Mwanta yomweni diyi walumbululaña, nawa wakayilumbulwila antu jindi Izu dindi munjila yayiwahi nawa hampinji yatelela.”

19. Yehova natukwashi kwilukadi makonu nawa muloñadi?

¹⁹ Wanta chiwatachikili kuyuula mu 1914, antu jaNzambi elukili wanyi chikupu chakashikijewa wuprofwetu wahosha haWanta. (1 Kor. 13:9, 10, 12) Chineli twakeñaña nankashi netu yikaninu yaNzambi yishikijewi, mpinji yikwawu twashimunaña mwaluwa. Hayaaka yayivulu yinahituhu, twamona netu mazu asonekeluwu muKaposhi Kakutalila kitwatena muparagilafu yinafumuhu alala. Aka Kaposhi kahosheli nawu: “Twatela kwiteja netu hitunateli kutiyisha iwu wuprofwetuku, sampu wunashikijewi hela hampinji yiwunakushikijewa.” Chineli tunakushakama chikupu mumafuku akukuminina, wuprofwetu wawuvulu wahosha haWanta wunashikijewi nawa wuchidi kushikijewa. Yehova watukwasha kwiluka nkeñelu yindi muloña antu jindi adizoza nawa etejaña kuyifumba. Kwiluka kwakweni kunavuli.

20, 21. Indi kulumbulula nsañu munjila yayiha kwesekeli ñahi chikuhwelelu chawakwaKristu adiñaku mumafuku awapostolu?

²⁰ Yehova chalumbululayi nsañu yitweluka munjila yayiha, chikuhwelelu chetu chekalaña mukweseka. Komana chikuhwelelu nikudizoza kukutukwasha kuhimpa? AkwaKristu adiñaku hakachi kampinji yawapostolu niwena ayesekeli. Chakutalilahu, fwikijenu nenu mudi kaYudeya mukwaKristu hayina mpinji. Mwalemesha Nshimbi jaMosi nawa mwazañalalaña hakwikala mumuza wawaIsarela. Ilaña munatambwili nyikanda yonenawu kufuma kudi kapostolu Pawulu yinakushimuna nawu himukulondelaña Nshimbiku nawa Yehova nayikaani aIsarela akumujimba kulonda yapompeshi aIsarela akuspiritu mudi aYudeya niaJentili. (Rom. 10:12; 11:17-24; Ñal. 6:15, 16; Kol. 2:13, 14) Mwadi kwila ñahi?

²¹ AkwaKristu adizoza etejeli nsañu yoneneniwu yalumbulwiliyi Pawulu nawa Yehova wayikiswilili. (Yil. 13:48) Ilaña amakwawu akaanini nsañu yahosheliyi nawa akakeleli kuyuma yelukiliwu. (Ñal. 5:7-12) Neyi kuhimpa yitoñojoka yawu nehi, adi kujimbesha kukoleka kwawu kwakuyuula hamu naKristu.—2 Pet. 2:1.

22. Mwatiyaña ñahi hakutiyisha kwakuha kwahoshaña hankeñelu yaNzambi?

²² Yaaka yinahitihu, Yehova nalumbululi nsañu yitweluka haWanta munjila yayiha. Chakutalilahu, watukwasha kwiluka mpinji yakaambulayi antu akayuulawu kudi Wanta nawantu abulaña kutiyilila neyi chambulañawu anyikoku nawa mpembi. Watuleja cheñi mpinji yikashikila naambala yawa 144, 000, mwatalisha yishimu yahosha haWanta yatiliyi Yesu nimpinji yakasañulayi wawayishewa wakukumishaku nakumutwala mwiwulu. * Mwatiyaña ñahi haniku kutiyisha kwakuha? Komana chikuhwelelu chenu chakolaña? Mwamonaña iku kutiyisha nenu hiwunsahu wakwila nawu Yehova nakutwalekahu kudizisha antu jindi adizoza? Kapetulu kanalondelihu kakuyikwasha kukuhwelela chikupu nenu Yehova natwalekuhu kusolola nkeñelu yindi chovu-chovu kudi antu amwakamaña.