CHIBALU 2
Kushimwina haWanta, Kutandisha Nsañu Yayiwahi Mukaayi Kejima
FWIKIJENU munakudiloñesha kulonda muyi nakushimwina nantentemena hefuku dimunakubula kuya kumudimu. Ilaña munakushintajala muloña munakutiya kuzeya. Munakukeña hohu kunooka. Hanyima yakulomba mwila nikwila nenu mukuya nakushimwina. Muzata ninamuhela wachikulumpi mumudimu wakushimwina nawa kuumika kwindi niluwi lukwetiyi lunayikoleshi. Chimunakuya kwitala nikwitala nakuleja antu nsañu yalala, mukwiluka nenu amanakwenu mukaayi kejima niwena anakuzata mudimu wowumu kuzatisha nyikanda yoyimu nawa wejima wenu mudi nantañishi yowumu. Chimwashika kwitala, mutiya niñovu. Munazañalali muloña himwafuukulahu kushakama hetalaku.
Chayinu mpinji, mudimu wawakwaKristu wakushimwina diwu mudimu walema wakundama kuWanta waNzambi. Yesu washimwini chadimu nindi mudimu wakushimwina wakekala walema nankashi mumafuku akukuminina. (Mat. 24:14) Indi iwu wuprofwetu windi wunashikijewi ñahi? Muchinu chibalu tukushinshika hadi antu, njila, niyozelu yalema yazatishañawu akwaKristu mumudimu wakushimwina, wunakukwasha antu amavulu mukaayi kejima kwiluka nawu Wanta waNzambi walala.
MUCHINU CHIBALU
KAPETULU 6
Antu Ashimwinaña, Akwakushimwina Adihanaña naMuchima Wumu
Muloñadi Yesu chakuhweleleliyi chikupu nindi wakekala nawakwakushimwina akadihana mumafuku akukuminina? Munateli kumwekesha ñahi nenu mwasambilaña kukeña Wanta?
KAPETULU 7
Njila Jakushimwinamu
ilukenu njila jazatishañawu antu jaNzambi hakushimwina antu amavulu nsañu yayiwahi henohu kukuma kanda kwinzi.
KAPETULU 8
Yozelu Yakuzatisha Hakushimwina, Kusoneka Nyikanda Yakuzatisha Mukaayi Kejima
Indi mudimu wetu wakubalumuna wamwekesha ñahi nawu Mwanta watukwashaña? Walalanyi washimuna hanyikanda yetu wayileñela mukuhweleli chikupu nenu Wanta walala?
KAPETULU 9
Yuma Yafumaña Mukushimwina—‘Maha Anatookashani Ashika Dehi haKumuna’
Yesu wayidizishili atumbanji twindi yuma yiyedi yalema kutalisha hamudimu weneni wakwañula kwakuspiritu. Indi iyi yuma yatuleñelaña kwiladi?
