1, 2. Mudimwinyi weneni washimwiniyi Yesu, nawa malwihwinyi alema itwatela kwihula?

ANLOMBOLI JAPOLITIKI kakavulu akanaña yuma yabulaña kushikijawu. Hela tuhu antu ekalaña namuchima wakushikija mwakanañawu akañanyaña kwilamu. Ilaña Mwanta wawuMesiya, Yesu Kristu, wambukaku muloña washikijaña mwakanañayi.

² Chekaliliyi Mwanta mu 1914, Yesu watachikili kushikija wuprofwetu washimwiniyi henohu kuchidi yaaka 1,900. Henohu kunashali dehi mafuku antesha nakufwa, Yesu washimwini nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu.” (Mat. 24:14) Kushikijewa kwanawa mazu kwekala hichinjikijilu chakwinza kwindi muñovu jaWanta. Hela chochu, twatela kwihula lwihu lwalema netu: Indi Mwanta nakufumisha kudihi akwakushimwina amavulu adihana munanu mafuku akukuminina, mudi antu adikeña aweni, abula kukeñaña nawa abula kusha maana kuyuma yakuspiritu? (Mat. 24:12; 2 Tim. 3:1-5) Twatela kwiluka iyi nsañu, muloña ñakwilu yanilu lwihu yakundama kudi akwaKristu alala ejima.

3. Yesu wakuhweleleli chumanyi nawa kudihi kwadizililiyi kwikala nachikuhwelelu chamuchidiwu?

³ Shinshikenu cheñi mazu aYesu awuprofwetu. Komana mazu akwila nawu “akayishimwina” amwekeshaña chikuhwelelu? Eña. Yesu wakuhweleleli chikupu nindi wakekala nawakwakushimwina akadihana mumafuku akukuminina. Wadizilili kudihi kwikala nachikuhwelelu chamuchidiwu? Kudi Tata yindi. (Yow. 12:45; 14:9) Henohu kanda yenzi hamaseki, Yesu wadimweneni namesu kapu nindi Yehova wayikuhwelela akwakudifukula Indi adihanaña namuchima wumu. Tushinshikenu Yehova chamwekesheli nindi wayikuhwelela.

4. Yehova wayilejeli aIsarela kuzata mudimwinyi, chumanyi cheliliwu?

⁴ Anukenu chuma chamwekeni hampinji yamulejeliwu Mosi kudi Yehova nawu yatuñi tabanaka hela itenti dekalili iluña dakudifukwila muza wawaIsarela. Kuhitila mudi Mosi, Yehova walejeli antu ejima kuzata iwu mudimu. Mosi wayilejeli nindi: ‘Yowu wukweti muchima wakuhana yaleti mulambu  waYehova.’ Chumanyi chamwekeni? Antu ‘atwalekelihu kuleta nyilambu yakunyichima yawu awenawu habudidi habudidi.’ Yuma yaleteliwu yavulili chakwila ‘antu ayilekesheli kuleta cheñi.’ (Kwid. 35:5; 36:3, 6) A Isarela amwekesheli nawu Yehova hatwambiliku hakuyikuhwelela.

5, 6. Kwesekeja naMasamu 110:1-3, Yehova niYesu akuhwelela nawu akwakudifukula awu alala akamwekesha chililwinyi mumafuku akukuminina?

⁵ Komana Yehova wakuhweleli nindi wakekala nawantu akweti muchima wakudihana dikwila nawu akwakudifukula indi munanu mafuku akukuminina? Eña. Yehova wamoneneni Davidi kusoneka mpinji yakatachikayi kuyuula Mesiya, henohu kunashali yaaka 1,000 hakwila Yesu yavwalika hamaseki. (Tañenu Masamu 110:1-3.) Yesu Mwanta wamuha wukekala nawayilumbu akamudiwula. Ilaña, wukekala cheñi nawakwakushimwina amavulu. Hiyakayikanjikija kumukalakela Mwantaku. Niatwansi niwena akadihana aweni namuchima wumu nakwikala izaza deneni chakwila ayesekeja nachavulaña wuumi wekalaña kumatahu nantentemena. *

⁶ Yesu welukili nindi wuprofwetu wasonekawu haMasamu 110, wahosheli hadi yena. (Mat. 22:42-45) Dichi, wakuhweleleli chikupu nindi wakekala nawakwakushimwina ashinshika akadihana aweni namuchima wumu kulonda akashimwini nsañu yayiwahi heseki dejima. Indi nsañu yakunyima yamwekeshañadi? Komana mwalala Mwanta nakupompesha akwakushimwina amavulu anakudihana munanu mafuku akukuminina?

7. Chamuswanyikiliwu kwikala Mwanta, yumanyi yeliliyi Yesu hakuloñesha atumbanji twindi kulonda akazati mudimu weneni kumbidi?

⁷ Chamuswanyikiliwu neyi Mwanta, Yesu watachikili kuloñesha atumbanji twindi kulonda azati mudimu weneni. Neyi chitwadizili muKapetulu 2, wenjili nakutala nikuzata mudimu wakutookesha kufuma mu 1914 nakushika  kumatachikilu a 1919. (Mal. 3:1-4) Kuhiñahu, mu 1919, watondeli nduñu washinshika kulonda yalomboleña atumbanji twindi. (Mat. 24:45) Kufuma tuhu muchina chaaka, nduñu watachikili kuhana yakuda yakuspiritu kuhitila mujimpanji jahakupompa kwamaneni ninyikanda yasonekeleñawu yakonkomweneneña akwaKristu ejima kuzataku mudimu wakushimwina.

8-10. Kupompa kwakonkomweneni ñahi hamudimu wakushimwina? Shimunenu chakutalilahu. (Talenu cheñi chikasha chinakwila nawu “Kupompa Kwamaneni Kwakusambila Kwakonkomweneneña haMudimu Wakushimwina.”)

⁸ Mpanji yahakupompa kweneni. Chineli akeñeleña nankashi kuyilombola, aTudizi aBayibolu apompeli haCedar Point, Ohio, muAmerica, kufuma haSeptember 1 nakushika ha 8, 1919, iku dikwadiña kupompa kwawu kweneni kwatachi hanyima yaNjita Yakaayi Yatachi. Hefuku damuchiyedi, Manakwetu Rutherford wayilejeli antu apompeli mumpanji yindi yahanini nindi: “Mudimu wukweti mukwaKristu hanu hamaseki . . . hikushimwina nsañu yaWanta waMwanta.”

⁹ Chuma chalema nankashi chamwekeni hefuku damuchisatu mumpanji yahaniniyi Manakwetu Rutherford yakwila nawu “Address to Co-laborers,” (“Kuhosha Kudi Akwetu Akwakushimwina”), ayisonekeli nimuKaposhi Kakutalila kakwila nawu “Announcing the Kingdom” (“Kanakubidika Wanta.”) Wahosheli nindi: “Mpinji yikwawu mukwaKristu wadihulaña nindi, Muloñadi chinekalila hamaseki? Watela kwakula nindi, Mwanta wañilisha kwikala kañanda kindi kakushimuna nsañu yakukundamisha antu amukaayi kudi Nzambi, dichi nikweti mudimu wakushimwina iyi nsañu.”

¹⁰ Muyina mpanji yalema, Manakwetu Rutherford wabidikili nindi magazini yayiha yaThe Golden Age (yitwatenaña makonu netu Awake!), akuyisonekaña kulonda yikwasheña antu kwiluka nawu Wanta diwu wakamanisha kukala kwawu. Kuhiñahu wehwili antu apompeli neyi chakwila akeñeleña kuzataku mudimu wakuhana yina magazini. Chileji chakupompa chalumbulwili nawu: “Antu azañaleli hama. Antu akushika ku 6,000 ejima anyamukilili hamu.” * Mwamweni, Mwanta wadiñi nawakwakushimwina akeñeleña kutiyakesha Wanta windi.

11, 12. Kaposhi Kakutalila kamu 1920 kahosheli nawu mudimu washimwiniyi Yesu adi kuwuzata mpinjinyi?

¹¹ Nyikanda yapulintileñawu. Mudimu walema wateneniyi Yesu wakushimwina nsañu yayiwahi yaWanta awilukili nankashi kuhitila muKaposhi Kakutalila. Talenu yakutalilahu yikwawu yamuma 1920.

¹² Nsañwinyi yadi kutiyakeshawu hakushikija kwansona yaMatewu 24:14? Iwu mudimu adi kuwuzata mpinjinyi? MuKaposhi Kakutalila kaJuly 1, 1920, mwadiña chibaaba chahosheleña nawu “Gospel of the Kingdom,” (“Nsañu Yayiwahi yaWanta”) ichi chibaaba chalumbulwili nawu “Nsañu yayiwahi yinakuhosha hakukuma kwanyaka yamakonu nikutachika kwawanta wawuMesiya.” Ichi chibaaba chashimwini hatooka to-o nawu: “Iyi nsañu atela kuyishimwina hakachi kampinji  yanjita yeneni yakaayi [Njita Yakaayi Yatachi] ‘nalukadi lweneni.’” Dichi, ichi chibaaba chahosheli nawu: “Yinu diyi mpinji . . . yakutiyakesha mwahita Kristendomu mwejima iyi nsañu yayiwahi.”

13. Kaposhi Kakutalila kamu 1921 kakolesheli ñahi akwaKristu adihanini?

¹³ Komana antu jaNzambi adi kuyikanjikija kuzata mudimu washimwiniyi Yesu? Inehi. MuKaposhi Kakutalila kaMarch 15, 1921 mwadiña chibaaba chahosheleña nawu “Be of Good Courage,” (“Ikalenu Ahamuka”) chayikolesheli akwaKristu awayishewa adihanini aweni. Muntu nimuntu amukolesheli kudihula nindi: “Komana iku hikukooleka kweneni kunikweti kwakuzata iwu mudimu weneniku?” China chibaaba chatwalekelihu kuhosha nawu: “Neyi dichimunakumona [hikukooleka nankashi kuzata iwu mudimu] ninenu mukutiyaña neyi chatiyiliyi Yeremiya, watiyileña mudimu waMwanta neyi kesi kadiña nakumwocha mumuchima windi ‘kajikiliwu mumafwahindi,’ kamutiyishileña iyena dakuya nakushimwina.” (Yere. 20:9) Awa mazu akukolesha amwekesheli nawu Yehova niYesu akuhwelela akwakushimwina aWanta ashinshika.

14, 15. Kaposhi Kakutalila kamu 1922, kakolesheli akwaKristu awayishewa kwila chumanyi?

¹⁴ Indi akwaKristu alala atela kushimwina ñahi antu nsañu yaWanta? MuKaposhi Kakutalila kaAugust 15, 1922, mwadiña chibaaba chachihi chahosheleña nawu “Service Essential,” (“Kuzata Kwalema”) chakolesheli akwaKristu awayishewa “kuzata nañovu hakuleja antu iyi nsañu, nikuyishimwina kumatala awu nakuyileja nawu wanta wamwiwulu wudi kwakwihi.”

¹⁵ Mwalala, kufuma tuhu mu 1919, Kristu nakuzatisha nduñu wamaana nikashinshi hakukonkomwena nindi mudimu wukweti mukwaKristu wejima hanu hamaseki, hikushimwina nsañu yaWanta. Hanu dinu, aTudizi aBayibolu elilidi chayikolesheliwu kuzata mudimu wakushimwina nsañu yaWanta?

16. Indi aeluda amakwawu elilidi chayilejeliwu nawu azateña mudimu wakushimwina?

¹⁶ Muma 1920 nimuma 1930, amakwawu akaanineña chayilejeliwu nawu akwaKristu awayishewa ejima atela kuzata mudimu wakushimwina. Kaposhi Kakutalila kaNovember 1, 1927, kalumbulwili yuma yamwekeneña nawu: “Makonu kudi antu amuchechi [muchipompelu] akweti yifulu yawueluda . . . akaanaña kukolesha amanakwawu kushimwina, nawa akaanaña cheñi kuzata mudimu wakushimwina. . . . Adimbululaña mwayilejeliwu nawu atela kushimwinaña kwitala nikwitala mazu aNzambi, hadi Mwanta windi niwanta kudi antu”. Kaposhi kahosheli cheñi nawu: “Mpinji yinashiki kulonda antu ashinshika eluki antu wenawa nikuyitondolwela nakuyileja nawu hiyanateli kwikala cheñi aeludaku.” *

17, 18. Antu amavulu muchipompelu elilidi nawunlomboli wafumini kudi nduñu washinshika, nawa antu amavulu ela chumanyi hayaaka 100 yinahitihu?

 ¹⁷ Ilaña, antu amavulu muchipompelu etejeli namuchima wumu wunlomboli wafumini kudi nduñu washinshika. Elukili nawu kuzataku mudimu wakushimwina nsañu yaWanta hikukooleka chikupu. Kaposhi Kakutalila kaMarch 15, 1926, kahosheli nawu: “Ashinshika akadihanaña . . . kuleja antu iyi nsañu.” Awa antu ashinshika elili neyi chochahosha mazu awuprofwetu ekala haMasamu 110:3 nawa amwekesheli nawu hiyakwakushimwina aMwanta wawuMesiya adihana.

¹⁸ Hayaaka 100 yinahituhu, antu amavulu anadihani namuchima wumu kulonda azati mudimu wakushimwina Wanta. Mutupetulu tunalondelihu, tukuhanjeka chashimwinañawu, njila niyozelu yazatishañawu hakushimwina niyuma yafumamu. Tukusambila kuhanjeka muloña waletesha antu amavulu adihani kulonda azati mudimu wakushimwina Wanta hela chakwila adi mukaayi mudi antu adikeña aweni. Chitukuhanjekaña hamuloña waletesha ashimwineña, twatela kudihula netu, ‘Muloñadi chinashimwinaña nsañu yayiwahi kudi amakwawu?’

19. Muloñadi wutwovwahilaña kufumba kwaYesu kwakwila nawu “kusambila kukeña Wanta”?

¹⁹ Yesu wayilejeli atumbanji twindi “kusambila kukeña Wanta.” (Mat. 6:33) Muloñadi wutwovwahilaña iku kufumba? Muloña tweluka netu Wanta, dichuma chalema nankashi munkeñelu yaNzambi. Neyi chitwadizili mukapetulu kanafumihu, spiritu yajila yasolweleña chovu-chovu nsañu yalala yahosha haWanta. Neyi chalala chaWanta chitushika hamuchima, chatusañumunaña kusambila kukeña Wanta.

20. Indi chishimu chaYesu chachuma chalema chaswekawu chamwekeshaña ñahi chovwahilañawu atumbanji twindi kufumba kwakwila nawu kusambila kukeña Wanta?

²⁰ Yesu welukili nindi atumbanji twindi akwovwahilaña lushimbi lwayilejeliyi lwakusambila kukeña Wanta. Shinshikenu hachishimu chindi chachuma chalema chaswekawu. (Tañenu Matewu 13:44.) Iwu ndimi wamuchishimu, chazatileñayi mudimu windi wawanini chuma chalema chaswekawu, hohenohu welukili kulema kwachu. Chumanyi cheliliyi? “Hamuloña wamuzañalu, hakuya nakulandisha yuma yejima yikwetiyi nakulanda oyu mpata.” Chumanyi chitukudizilaku? Neyi tuwana chalala chaWanta nikwiluka chichalema, twazañalalaña nawa twazataña hakumina ñovu yetu kulonda tusambileña kukeña Wanta muchihandilu chetu. *

21, 22. Akwakushimwina aWanta ashinshika amwekeshaña ñahi nawu asambilaña kukeña Wanta? Shimunenu chakutalilahu.

²¹ Akwakushimwina aWanta ashinshika amwekeshaña nawu asambilaña kukeña Wanta kuhitila muyuma yelañawu kubadika kuhosha hohu hakanwa. Adihanaña muwumi wawu kuzatisha ñovu jawu nimahetawu mumudimu wakushimwina Wanta. Amavulu adihana chikupu kulonda azateña mudimu wampinji yejima. Awa akwakushimwina adimwena namesu kapu nawu Yehova wakiswilaña antu asambilaña kukeña Wanta. Tuhanjekenu chakutalilahu chawantu adiñaku hakusambila.

 ²² Avery niLovenia Bristow atachikili kuzata wupayiniya kukumana kwamuma 1920, azatilileña kukabeta kachidiilu kuUnited States. Chimwahitili yaaka, aLovenia anukili nawu: “Ami niAvery twekala namuzañalu nankashi muchihandilu chetu kufuma tuhu hitwatachikili wupayiniya. Mpinji yikwawu twelukileña wanyi kukufuma mali akulanda nachu manji amumotoka niyuma yikwawu yakuzatisha. Ilaña, Yehova watukwashileña mpinji yejima muyuma yitwakeñeleña. Dichi twatwalekelihu kuzata wupayiniya. Nawa mpinji yejima twadiña nayuma yitwakeñeleña.” A Lovenia anukaña mpinji yimu hazatilileñawu kuPensacola, muFlorida, nawu adiña namali ashikilamu wanyi akulanda yuma yakeñeleñawu. Chashikiliwu kukaditala kawu ketemba, awanini mapakumuna ayedi amaneni mwadiña yuma yakudikwasha nachu hamu nikamukanda kasonekeliwu nawu: “Chawaana chinafumi kuKampani yaPensacola.” * A Lovenia chatoñojokeliwu hayaaka yejima yinazatiwu mumudimu wampinji yejima ahosheli nawu: “Yehova hamba katushiyaku. Watwakamenaña muloña twamukuhwelela.”

23. Mwatiyaña ñahi hachalala chaWanta chimwawana, nawa munakufwila kwila chumanyi?

²³ Bayi neyi wejima wetu tunateli kwesekana chitwazataña mumudimu wakushimwinaku. Muloña chihandilu chashiyashana. Hela chochu, wejima wetu twamonaña netu kushimwina nsañu yayiwahi namuchima wejima hikukooleka kweneni. (Kol. 3:23) Muloña wakwila twalemesha chalala chaWanta chitwawana, twadihanaña namuchima wumu kulonda tushimwineña hakumina ñovu jetu jejima. Komana ichi dichuma chimwafwilaña kwilaku?

24. Mudimwinyi weneni wunakuzata Wanta munanu mafuku akukuminina?

²⁴ Kubadika hayaaka 100 yinahitihu, Mwanta nakushikija mazwindi awuprofwetu asonekawu haMatewu 24:14. Nawa nakwila mwenimu chakubula kukanjikija atumbanji twindi. Hanyima yakwambuka nakaayi mudi antu adikeña, atumbanji twindi adihanaña namuchima wumu kulonda ashimwineña. Mudimu wakushimwina nsañu yayiwahi wunakuzatika mukaayi kejima hichinjikijilu chakwinza kwaYesu muñovu jaWanta, nawa diwu mudimu weneni wunakuzata Wanta munanu mafuku akukuminina.