1, 2. (a) Muloñadi atumbanji chinahayaminuwu? (b) Yesu wateneneña kumuna kwamuchidinyi?

ATUMBANJI anahayami. Yesu nayileji nindi: “Fumbulenu mesu enu kulonda mutali maha, chiyanatookashaniwu dehi to-o, anashiki dehi hampinji yakwaañula.” Ilaña chiyaneli nawu atali kunakwinyikayi Yesu, anakumona hohu maha munenzali bali yinafumi tuhu hakututuka bayi yitookaku. Hadaha adihwili nawu ‘kwaañulanyi kunakutenayi?’ ‘Hakuhita tukweji twatuvulu hakwila chilaaka chakwaañula chishiki.’—Yow. 4:35.

² Hela chochu, Yesu wateneneña kwaañula mbutu yayeni wanyi. Ilaña, wadizishileña atumbanji twindi yikuma yiyedi yalema kutalisha hakwaañula kwakuspiritu, dikwila nawu kwaañula antu. Yikumanyi yeniyi? Tushinshikenu iyi nsañu kulonda twiluki yikuma yayidizishileñayi Yesu.

3. (a) Chumanyi chamuleñeleli Yesu kuhosha nindi ‘maha anatookashani dehi’? (Talenu tumazu twaheshina.) (b) Indi Yesu walumbulwili ñahi mazu indi ahosheliyi?

³ Yesu wahanjekeli nawatumbanji twindi iyi nsañu kukumana kwa 30 C.E., kwakwihi namusumba waSika wamuSamariya. Chayiliwu atumbanji twindi mumusumba, Yesu washalili heshima nakuhanjeka yuma yakuspiritu namumbanda washikeneni kwiluka kulema kwayuma yamutañishileñawu. Chafuntiliwu atumbanji kudi Yesu, mumbanda wayili lufuchi kuSika kulonda yakaleji antuñi nindi yuma yayiwahi yadiziliyi. Antu azañaleli nankashi chatiyiliwu mujimbu waleteli iwu mumbanda, dichi antuñi nindi amavulu ayili kwishima kwadiñayi Yesu. Hadaha Yesu chataliliyi mumaha, wamweni izaza dawaSamariya dinakwinza kwadiñayi, dihafumini hakuhosha nindi: ‘Talenu maha, chiyanatookashaniwu dehi to-o, anashiki dehi hampinji yakwaañula.’ * Kuhiñahu, hakwila yalumbululi nindi hateneneña kwaañula mbutu yayeniku ilaña wateneneña kwaañula kwakuspiritu, Yesu wahosheli nindi: ‘Mukwakumuna nakupompesha nyikabu yawumi wahaya nyaaka.’—Yow. 4:5-30, 36.

4. (a) Yumanyi yiyedi yalema yatañishiliyi Yesu kutalisha hamudimu wakwañula? (b) Malwihwinyi itukuhanjekahu?

⁴ Yikumanyi yiyedi yalema yadizishileñayi Yesu kutalisha kwaañula kwakuspiritu? Chatachi, mudimu watela kuzatewa mukunyakashana. Yesu chahosheliyi nindi “mumaha mwatookashana dehi to-o, ashika dehi hampinji yakwaañula,” wayisañumwini atumbanji twindi kuzata nañovu. Hakukwasha  atumbanji twindi kulonda azati mukunyakashana, Yesu wahosheli nindi: “Mukwakumuna natachiki dehi kutambula wufwetu.” Mwamweni, kwañula kwadiña kwatachika dehi, dichi hiyateleleli kumba mpinjiku. Chamuchiyedi, akwakuzata ekala namuzañalu. Yesu wahosheli nindi, akuwaña niakwakwaañula ‘akazañalela hamu.’ (Yow. 4:35b, 36) Neyi chazañaleliyi Yesu hakumona nindi “aSamariya amavulu amukuhweleleli,” atumbanji twindi niwena akekala namuzañalu weneni chakazatañawu mudimu wakumuna namuchima wejima. (Yow. 4:39-42) Iyi nsañu yalema nankashi kudi etu, muloña yamwekeshaña yuma yinakumwekana makonu kutalisha hamudimu weneni wakwaañula kwakuspiritu. Kwaañula kwamakonu kwatachikili mpinjinyi? Anyi azatañaku iwu mudimu? Yumanyi yafumamu?

5. Hinyi walombolaña mudimu wakumuna mukaayi kejima, nawa chimwenu chaYowanu chamwekeshaña ñahi nawu mudimu watela kuzatewa mukunyakashana?

⁵ Yehova wamulejeli Yowanu muchimwenu nindi, wamwinka Yesu wuswa wakulombola mudimu wakwaañula antu wamukaayi kejima. (Tañenu Chimwekeshu 14:14-16.) Munichi chimwenu, Yesu amumwekesha navwali chibaaba nawa nakwati nichikwakwa. “Chibaaba chawuru chidi kumutu waYesu” chamwekeshaña ñovu yikwetiyi yakuyuula neyi Mwanta. “muchikasa chindi mwadiña chikwakwa chatwa” chamwekeshaña nawu Himukwakumuna. Yehova chahosheliyi kuhitila mudi kañelu nindi “mbutu yahamaseki yakwañula yinahi nankashi,” wamwekesheli nindi mudimu watela kuzatewa mukunyakashana. Eña, “mpinji yakumuna yinashiki dehi”—hitwatela kumba mpinjiku. Hakwovwahila lushimbi lwaNzambi lwakwila nawu “Tachikaku kumuna nachikwakwa cheyi,” Yesu wahitishilimu chikwakwa chindi, nawa iseki atachikili kudimuna dikwila nawu antu ahamaseki anakuyimuna. Ichi chimwenu chachiwahi chatwanukishaña cheñi nawu ‘maha atookashana dehi to-o, ashika dehi hampinji yakwañula.’ Komana ichi chimwenu chinateli kutukwasha kwiluka mpinji yatachikili iku kumuna kwamukaayi kejima? Eña.

6. (a) Mpinjinyi yatachikili “chilaaka chakumuna”? (b) Indi mudimu “wakumuna mbutu yaheseki” watachikili mpinjinyi? Lumbululenu.

⁶ Chineli chimwenu chaYowanu chekala mumukanda waChimwekeshu kapetulu 14 chamwekeshaña Yesu, Mukwakumuna, navwali chibaaba (vasi 14), komana adiña amutonda dehi neyi Mwanta mu 1914. (Dan. 7:13, 14) Chimwahitili mpinji, Yesu amulejeli kutachika kumuna (vasi 15). Iyi yuma chiyamwekeni mundonda dichi chiyekala nimuchishimu chaYesu chakumuna tidiku, mwahosheliyi nindi: “Kwaañula dikukuma kwanshakaminu yamakonu.” Dichi, chilaaka chakumuna nikukuma kwanyaka yinu kwatachikili hampinji yoyimu mu 1914. Kuhiñahu, “mumpinji yakwaañula,” mudimu wakumuna watachikili. (Mat. 13:30, 39) Kwesekeja nachitweluka, tunateli kukunkulula netu Yesu chatachikiliyi kuyuula neyi Mwanta mwahitiliyi yaaka nawa mudimu wakumuna watachikili. Chatachi, kufuma mu 1914 nakushika kumatachikilu a 1919, Yesu watachikili mudimu  wakutookesha atumbanji twindi awayishewa. (Mal. 3:1-3; 1 Pet. 4:17) Kuhiñahu mu 1919, mudimu “wakumuna mbutu yahamaseki” watachikili. Chakadi nikulaba, Yesu wamuzatishili nduñu wamaana watondeliyi kulonda yakwashi amanakwetu kuzata mudimu wakushimwina mukunyakashana. Shinshikenu yuma yamwekeni.

7. (a) Nsonanyi jakwashili amanakwetu kwiluka nawu atela kushimwina mukunyakashana? (b) Amanakwetu ayikolesheli kwiladi?

⁷ Kaposhi Kakutalila kaChizungu kaJuly 1920, kahosheli nawu: “Hanyima yakushinshika jiNsona tuneluki netu chechi yikweti kukooleka kwakushimwina nsañu yaWanta.” Chakutalilahu, mazu ahosheliyi Isaya muwuprofwetu akwashili amanakwetu kwiluka nawu atela kushimwina nsañu yaWanta mukaayi kejima. (Isa. 49:6; 52:7; 61:1-3) Elukili wanyi chadi kuzatawu iwu mudimu ilaña akuhweleleli nawu Yehova wakayileja chakushimwina. (Tañenu Isaya 59:1.) Chelukiliwu nawu atela kuzata mudimu wakushimwina mukunyakashana, amanakwetu ayikolesheli kulonda azateña hakumina ñovu jawu. Amanakwetu elilidi?

8. Yikumanyi yiyedi yelukiluwu amanakwetu kutalisha hamudimu wakushimwina mu 1921?

⁸ Kaposhi Kakutalila kaChizungu kaDecember 1921 kahosheli nawu: “Chinu chaaka tunadikiti nankashi; antu amavulu anatiyi nsañu yalala kubadika yaaka yejima yakunyima.” Aka Kaposhi kabombelelihu nawu: “Kuchidi mudimu weneni. . . . Dichi lekenu tuwuzati namuchima wejima.” Shinshikenu amanakwetu chelukiliwu yikuma yiyedi yalema yalejeliyi Yesu apostolu indi kutalisha hamudimu wakushimwina nindi: Iwu mudimu ateleli kuwuzatamukunyakashana, nawa akwakuzata ekala namuzañalu.

9. (a) Kaposhi Kakutalila kamu 1954, kahosheli nawudi hamudimu wakumuna nawa muloñadi? (b) Indi akwakushimwina anavuliluku ñahi hayaaka 50 yinahitihu? (Talenu chati yinakwila nawu “Kuvula kwawaKwakushimwina Mukaayi Kejima.”)

⁹ Muyaaka yamuma 1930, amanakwetu chelukiliwu nawu izaza deneni dawanyikoku acheñi dikatiya nsañu yaWanta, atachikili kuzata nañovu mumudimu wakushimwina. (Isa. 55:5; Yow. 10:16; Chim. 7:9) Mwafumini yumanyi? Antu adiña nakushimwina nsañu yaWanta avulililiku, mu 1934 adiña 41,000 ilaña kushika mu 1953 ashikili 500,000. Kaposhi Kakutalila kaChizungu kaDecember 1, 1954, kahosheli nawu: “Spiritu yaYehova niñovu Yezu dindi diyi yinatukwashi kuzata iwu mudimu weneni wakumuna wamukaayi kejima.” *—Zek. 4:6.

10, 11. Muchakutalilahu chaluchacha lwamostadi, yumanyi yinatenuwu mukukula kwanaka kaluchacha?

¹⁰ Muyishimu yahosha haWanta, Yesu wahosheli hatooka to-o yuma yikafuma mumudimu wakumuna. Tuhanjekenu hachakutalilahu chalucha lwamostadi nicheluñi. Tukushinshika nankashi iyi yishimu chiyashikijewa mumpinji yakukuminina.

¹¹ Chakutalilahu chaluchacha lwamostadi. Muntu natumbi luchacha lwamostadi. Hilukukula nakwikala mutondu kwawilaña atujila. (Tañenu Matewu 13:31, 32.) Yumanyi yinateniwu mukukula kwaluchacha munichi chakutalilahu? (1) Luchacha lwakulili nankashi. “luchacha lwakehelamu hanchacha jejima,” lwekalili mutondu “nanyitayi yamaneni.” (Maku 4:31, 32) (2) Mukwakutumba wakuhweleleli nindi lukakula. “Chakulutumbawu, [luchacha] lwakulaña.” Yesu hahosheli nindi, “Hadaha lukakulaku.” Ilaña, wahosheli nindi: “lwakulaña.” Kwosi chuma chinateli kulukañesha kukulaku. (3) Iwu mutondu wekala nawulelu chakwila enyi adiluñishaña kushakamamu. “Atuda amuluzwizu enzaña” nawa “ashakamaña muwulelu windi ” Indi iyi yuma yisatu yinakundami ñahi kukumuna kwakuspiritu kwamakonu?

12. Indi chakutalilahu chaluchacha lamostadi chakundama ñahi kumudimu wakumuna wamakonu? (Talenu cheñi chati yinakwila nawu “Kuvulilaku Kwawatudizi aBayibolu.”)

¹² (1) Luchacha Lwakulili nankashi: Ichi chakutalilahu chamwekeshaña kutanda kwansañu yaWanta nikukula kwayipompelu yawakwaKristu. Kufuma tuhu mu 1919, akwakushimwina adikita anayipompeshi muchipompelu chawakwaKristu chatookeshawu. Hayina mpinji, naambala yawakwakuzata yadiñi yantesha ilaña yavulililiku nankashi. Kafwampi iyi naambala yavulililiku nankashi kufuma muyaaka yamuma 1900 nakushika makonu. (Isa. 60:22) (2) Mukwakutumba wakuhweleleli: Chipompelu chawakwaKristu chinatwalekihu nakukula chakadi kuchilekesha. Hela chakwila ayilumbu jaNzambi atwalekelihu kuyikañesha, ilaña mbutu yatwalekelihu nakukula nawa yashindili kukala kwejima. (Isa. 54:17) (3) Kushakamamu: “Atuda amuluzwizu” ashakamaña kumutondu emenañaku antu amavulu ashinshika afuma mumatuña 240 atambwila nsañu yaWanta nakwikala muchipompelu chawakwaKristu. (Ezek. 17:23) Munichi chipompelu atambwilaña yakuda yakuspiritu, ayikoleshaña nikuyikiña.—Isa. 32:1, 2; 54:13.

13. Muchakutalilahu cheluñi, yumanyi yinateniwu mukuvuvumuka kweluñi?

¹³ Chakutalilahu cheluñi. Chelili mumbanda yanoni iluñi nakudibomba nawuña, wuña wejima weñilili iluñi nakuvuvumuka. (Tañenu Matewu 13:33.) Yumanyi yinateniwu mukuvuvumuka munichi chakutalilahu? Tushinshikenu hohu hayuma yiyedi. (1) Kuvuvumuka kwaleñelaña kubalumuka. Iluñi datandili nakuleñela ‘wuña wejima kwiñila iluñi.’ (2) Kuvuvumuka kwatandili kwejima. Iluñi davuvumukili “mumabañu awuña asatu” ejima. Indi iyi yuma yiyedi yakundama ñahi kumudimu wakumuna kwakuspiritu makonu?

14. Kuvuvumuka kweluñi kwakundama ñahi kumudimu wakumuna makonu?

¹⁴ (1) Kubalumuka: Iluñi demenañaku nsañu yaWanta, wuña wemenañaku antu. Neyi chochu chavuvumukaña iluñi  chadibombawu nawuña, ninsañu yaWanta yabalumunaña nyichima yawantu etejaña iyi nsañu. (Rom. 12:2) (2) Kutanda kwejima: Kuvuvumuka kweluñi kwemenañaku chatandaña nsañu yaWanta. Iluñi chideñila mumuvuba, datandaña muwuña wejima. Munjila yoyimu, nsañu yaWanta yinatandi “kwakumina iseki dejima.” (Yil. 1:8) Yuma yinateniwu munichi chakutalilahu yamwekeshaña nawu nimumatuña mwalekeshawu mudimu wetu, nsañu yaWanta yinakutanda hela chakwila antu amunowu matuña hiyanateli kumona mudimu wetu wakushimwinaku.

15. Indi mazu ekala haIsaya 60:5, 22 anakushikijewa ñahi? (Talenu cheñi chikasha chinakwila nawu “Yehova Diyi Watukwashili,” hefu 93, nichikasha chinakwila nawu “‘Wanyanya Chinekaliyi Muza Wañovu,’” hamafu 96-97.)

¹⁵ Mwahitili yaaka 800 henohu Yesu kanda yahoshi iyi yakutalilahu, Yehova wahosheleli kuhitila mudi Isaya mazu akubula kuvulamena kutalisha hakutanda kwamudimu wakumuna kwakuspiritu wamakonu nimuzañalu wakafuma muniwu mudimu. * Yehova washimwini nindi antu ‘akafuma kwakulehi’ nakuhwila mukuloñesha kwindi. Wadesekejeli yomweni “namumbanda” wemenañaku awahishewa hanu hamaseki makonu nindi: ‘Wakamona, wakatamuka, muchima weyi wakazaala,  wakatoheshewa nayalumbama mukaluñalwiji yakabalumukila kudeyi, nimaheta anyunza akeza kudeyi.’ (Isa. 60:1, 4, 5, 9, NW) Awa mazu anakushikijewa makonu. Ambuña Yehova anamuzatili hampinji yayilehi anakutamuka namuzañalu hakumona naambala yawakwakushimwina aWanta yadiñi yantesha chiyinakuvulilaku mumatuñawu.

16, 17. Chumanyi chateshaña ‘mukwakukuwa nimukwakumuna kuzañalela hamu’? (Talenu cheñi chikasha chinakwila nawu “Matilakiti Ayedi Chashikiliwu haNyichima Yawantu Ayedi muAmazoni.”)

¹⁶ Anukenu nenu Yesu walejeli apostolu indi nindi: “Mukwakumuna natachiki dehi kutambula wufwetu nikupompesha nyikabu yawumi wahaya nyaaka; kulonda mukwakukuwa nimukwakumuna wejima wawu azañaleli hamu.” (Yow. 4:36) Munjilanyi ‘mutwazañalelaña hamu’ mumudimu wakumuna wamukaayi kejima? Twazañalalaña muyuma yayivulu. Tushinshikenu hohu hayuma yisatu.

¹⁷ Chatachi, twazañalalaña hakumona Yehova chatukwashañayi kuzata iwu mudimu. Neyi tunakushimwina nsañu yaWanta, twatumbaña mbutu. (Mat. 13:18, 19) Neyi tumukwasha muntu kwikala kambanji kaKristu dikwila nawu twañulaña nyikabu. Nawa wejima wetu twazañalalaña nankashi hakumona Yehova chakojejañayi mbutu yaWanta “yamenaña nakukula” muchihayamisha. (Maku 4:27, 28) Mbutu yaWanta yikwawu yitwakuwaña yakulaña mukuhita kwampinji nawa ayañulaña kudi amakwawu. Hekwawu ninenu mwamonahu dehi chuma chidi neyi chamweni muhela mukwaKristu Joan wakuBritain wapapatisheweli yaaka 60 yinahituhu. Wahosheli nindi: “Nawanaña antu anlejaña nawu natumbili mbutu munyichima yawu chinayishimwinini yaaka yakunyima. Chakadi ami kwiluka, aYinsahu amakwawu ayidizishileña Bayibolu nakuyikwasha kwikala ambuña Yehova. Nazañalalaña hakwiluka nami mbutu yinatumbuli yakulili nawa ayañwili.”—Tañenu 1 Akorinda 3:6, 7.

18. Chumanyi chaletaña muzañalu chatenawu ha 1 Akorinda 3:8?

¹⁸ Chamuchiyedi, twazataña namuzañalu neyi twanuka netu Pawulu wahosheli nindi: ‘Wejima wetu twakatambwila wufwetu wetu kwesekeja nanyidimu yetu etu aweni, muntu nawufwetu windi, muntu nawufwetu windi.’ (1 Kor. 3:8) Wufwetu awuhanaña kwesekeja namudimu bayi neyi nayuma yafumaña mumudimuku. Chumichi chatela kuzañalesha antu ashimwinaña mumaluña mwabulañawu kutambwila nsañu yalala. Nzambi wamonaña nindi Chinsahu wejima wazatañaku mudimu wakukuwa namuchima wumu “wasoñaña nyikabu yayivulu” dichi watela kuzañalala.—Yow. 15:8; Mat. 13:23.

19. (a) Indi wuprofwetu waYesu wekala haMatewu 24:14 watuleñelaña ñahi kwikala namuzañalu? (b) Chumanyi chitwatela kwanuka hela chakwila tunakañanyi kwilisha kambanji?

¹⁹ Chamuchisatu, twazañalalaña hakwiluka netu mudimu wetu washikijaña wuprofwetu. Shinshikenu Yesu chayakwiliyi apostolu indi chamwihwiliwu nawu: “Tuleji, mpinjinyi yakamwekana yumiyi, nawa chinjikijilwinyi chikamwekesha kwikalahu kweyi nikukuma kwanshakaminu yamakonu?” Washimwini nindi chuma chimu munichi chinjikijilu chikekala mudimu  wakushimwina wamukaayi kejima. Komana wadiña nakutena mudimu wakwilisha atumbanji? Inehi. Wahosheli nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima.” (Mat. 24:3, 14) Mwamweni, kushimwina nsañu yaWanta, dikwila nawu kukuwa mbutu hichuma chimu chamunichi chinjikijilu. Dichi neyi tunakushimwina nsañu yayiwahi yaWanta, twatela kwanuka netu hela chakwila tunelishi kambanji wanyi, tunazati mudimu wakuhana “wunsahu.” * Eñañi, hichikweti muloña nachakulañawu antuku ilaña twazataña mudimu washikijaña wuprofwetu waYesu nawa tukweti kukooleka kwakuzata neyi “akwakukalakala hamu naNzambi.” (1 Kor. 3:9) Chumichi chatela kutuzañalesha.

20, 21. (a) Indi mazu ekala haMalaki 1:11 anakushikijewa ñahi? (b) Chumanyi chimunakufwila kwila kutalisha hamudimu wakumuna, nawa muloñadi?

²⁰ Mumafuku awapostolu, Yesu wayikwashili apostolu indi kwiluka nawu ateleleli kuzata mudimu wakumuna mukunyakashana. Kufuma mu 1919 Yesu nakukwasha atumbanji twindi makonu kwiluka nawu atela kuzata mudimu wakumuna mukunyakashana. Antu jaNzambi anakuzata nañovu nyidimu yawu. Nawa mudimu wakumuna wunatwalekihu. Neyi chashimwineñahu dehi kaprofwetu Malaki, mudimu wakushimwina anakuwuzata makonu “kufumisha kwatuntukilaña itañwa nakushikija kudahuminaña.” (Mal. 1:11) Eña, kufuma kwatuntukilaña itañwa nakushika kudahuminaña, dikwila nawu kumusela nikumujika, kwejima kwashakamawu aYinsahu hanu heseki, akuwaña niamunaña azañalelaña hamu. Mwamweni, kufuma kwatuntukilaña itañwa nakushika kudahuminaña, dikwila nawu kufuma ntetemena nimelela, twazataña mukunyakashana.

²¹ Neyi tushinshika hayaaka 100 yinahitihu nakumona izanvu danyanya dawambuña Nzambi chidi nakuli nakwikala ‘munza wañovu,’ nyichima yetu ‘yaswejaña kuzañalala chikupu’. (Isa. 60:5, 22) Eñañi, muzañalu weniwu nikukeña kutwamukeña Yehova, “Mwini mudimu wakwaañula,” kutusañumuneña wejima wetu kuzata iwu mudimu weneni wakwaañula.—Luka 10:2.