Kudi Akwetu Akwakushimwina aWanta:

FWIKIJENU mudi haBeteli kuBrooklyn hachitanu nampinji yantetemena, haOctober 2, 1914. Mudi hamesa himwashakamaña hampinji yakudawula, munakuhembelela Manakwetu C. T. Russell. Kukashimuka chisu chakapeka kakudiila chinashinkuki, Manakwetu Russell hakwiñila. Hakuhudikila chanti neyi chelañayi, hakwimusha chisaka chaBeteli namuzañalu nindi “Muhindukaña mwani.” Ilaña chatela yashakami kumbidi yamesa, hakusakilila kasatu nakubidika nindi: “Mpinji yawaJentili yinamani; mafuku awanyanta jawu anamani!” Munazañalali nankashi muloña munatalili idi ifuku hadi mpinji yeneni. Munatambwili iyi nsañu namuzañalu hamu nawakwenu haBeteli, nawa himukusakilila hadi mpinji yeneni.

 Yaaka yinakotoki kufuma hahosheleliyi Manakwetu Russell awa mazu akuhizumwisha. Yumanyi yinakoñi Wanta kufuma hayina mpinji? Wanta wunakoñi yuma yayivulu. Kuzatisha Wanta, Yehova natookeshi nikudizisha antu jindi, chakwila akwakushimwina anabadiki 7.5 miliyoni kubadika chadiñawu mu 1914. Munahetelimu ñahi chinakuyidizishayi Yehova?

Makonu twatiyaña amanakwetu anakuhosha nawu, “Ikalu daYehova dinakwenda,” atwambaña wanyi. Hela chochu, tweluka netu kufuma mu 1914, ikalu daYehova demenañaku kuloñesha kwaYehova kwabulaña kumwekana, datachikili dehi kwenda lufuchi, neyi chimukumona muwunu mukanda. Hakwila ashimwini nsañu yayiwahi mukaayi kejima, akwakushimwina aWanta anazatishi njila jajivulu, jidi neyi yipapilu yansañu, kusenda yipapilu hadi nsañu yayiwahi, nyevulu, makaadi akushimwina nachu, maphonograph, mawayilesi nimaIntaneti.

Yehova nakukiswila mudimu wetu, tunakusoneka nyikanda yashindamena haBayibolu mumadimi akubadika 670 nawa twayinkaña antu iyi nyikanda chawaana. Akwakuzata adihana anakuzata mudimu wakutuña Matala aWanta, Matala akupompelamu Kupompa Kwamaneni nimatala ahaBeteli, mumatuña aheta niahutwa. Nawa neyi kumwekana wubanji, amanakwetu niahela anyakalaña kuya nakukwasha amanakwawu adi mukukala, nakumwekesha nawu ‘avwalikilaña yakala.’—Yish. 17:17.

Mpinji yikwawu, akulumpi jansakililu niakwakudimbulula aletaña “kukala nawu anakulondela nshimbi,” mpinji yejima chikuhwelelu chetu chakolaña neyi tumona tufuta twawu chitwabalumukaña kwikala yuma yinaleteshi “nsañu yayiwahi kuyilaku hambidi.”—Mas. 94:20; Fwi. 1:12.

Twatiyaña kuwaha kuzatila hamu nanenu, akwetu “amwitala.” Mwani mwatela kwiluka nenu twayikeña nankashi. Tunakulomba netu nsañu yidi muwunu mukanda yiyikwashi kulemesha nankashi wuswana wenu wakuspiritu.—Mat. 24:45.

Tunayimushi,

Yetu amanakwenu,

Izanvu Dalombolaña dawaYinsahu jaYehova