1, 2. Kuhimpikanyi kwadiñi mumagazini yaZion’s Watch Tower yamuJanuary 1895, nawa amanakwetu elili chumanyi?

John A. Bohnet Kadizi waBayibolu chatambwililiyi magazini yaZion’s Watch Tower yamuJanuary 1895, wazañaleli nankashi nachuma chamweniyi. Muloña hefu dahewulu daniyi magazini asonekeliwu yuma yayiha, hadiña kaposhi katoñekeleña chejeji hamankanda akaluñalwiji nakushika tuhu nimuluzwizu mwadiña mwidima. Nsañu yabidikiliwu muniyi magazini haniku kuhimpika yadiña namutu wakwila nawu “Our New Dress.” [“Dilesi Yetu Yayiha”]

² Chineli watiyili kuwaha, Manakwetu Bohnet wamusonekeleli Manakwetu Russell mukanda. Wamulejeli nindi “Watiyili kuwaha hakumona magazini yaKaposhi chiyamwekeneña chiwahi.” Kadizi waBayibolu mukwawu washinshika wejina daJohn H. Brown, wasonekeli kutalisha hefu dahewulu nindi: “Dinakumwekana wutotombu. Chikuku chatuñilawu kaposhi chakola chikupu, mankanda anakudetahu.” Adina ifu dadiha diku kuhimpika kwatachi kwamwenuwu amanakwetu ilaña hikwadiña kwamakumishiluku. Chashikiliwu muNovember kwadiña kuhimpika kukwawu kweneni. Kafwampi, iku kuhimpika kwakundamini hamankanda akaluñalwiji.

3, 4. Indi Kaposhi Kakutalila kaNovember 15, 1895, kasolweli kukalanyi, nawa kuhimpikanyi kweneni kwabidikiliwu?

³ Chibaaba chasonekeliwu muKaposhi Kakutalila kaNovember 15, 1895, chasolweli kukala kwadiñaku: Kukala kudi neyi mankanda kwadiña nakuluwañesha kuwunda kwadiñi mukuloñesha kwawaTudizi aBayibolu. Amanakwetu adiña nakubobola mpinji yejima hansañu yakulombola muchipompelu. Hakwila amanakwetu aleki kumwekesha chaambu, ichi chibaaba chesekejeli kuloñesha kwetu nambopolu. Chashimwini hatooka to-o nawu antu adiña nakulombola akañenyi kukwasha kuloñesha kwadiña neyi mbopolu mumpinji yamankanda. Chumanyi chateleli kwilawu?

⁴ Ichi chibaaba chashimwini nawu mukwakwendesha mbopolu watela kwiluka nindi mumbopolu mudi yuma yatela kuhandisha antu neyi mankanda asweja. Chochimu, antu adiña nakulombola mukuloñesha ateleleli kwiluka chikupu nawu yipompelu yejima yinadiloñeshi kushinda kukala kudi  neyi mankanda asweja. Hakwila ashindi iku kukala, achina chibaaba chabidikili kuhimpika kweneni. Chashimwini nawu kufuma tuhu hayina mpinji, “ateleleli kutonda aeluda muyipompelu yejima” kulonda ‘ahembeña nyikoku.’—Yil. 20:28.

5. (a) Indi ntanjikilu yakutonda aeluda yekalili ñahi chuma chatachi? (b) Tukushinshika hamalwihwinyi?

⁵ Iyi ntanjikilu yakutonda aeluda dichuma chatachi chakwashili chipompelu kulonda chikali chakola. Yakwashili amanakwetu kuvuwa mbopolu chiwahi hampinji yamankanda enjiliku mumpinji yaNjita Yakaayi Yatachi. Muyaaka yalondelelihu, kuhimpika kukwawu kwamwekeni mukuloñesha kwakwashili antu jaNzambi kwikala ashikahu kumukalakela Yehova. Wuprofwetwinyi wamuBayibolu washimwini chumichi? Kuhimpikanyi kwamukuloñesha kumunadimweni namesu kapu? Munahetelimu mwodi?

6, 7. (a) Indi Nsona yaIsaya 60:17 yatalisha mudihi? (b) Indi wuprofwetu washimuna hadi “atulama” ‘niakwakufutisha akwawu’ wamwekeshañadi?

⁶ Neyi chitwadizili muKapetulu 9, Isaya washimwineñahu dehi nindi Yehova wakakiswila antu jindi kulonda akavuliliku. (Isa. 60:22) Hela chochu, Yehova wakanini nindi wakakoña yuma yayivulu. Muwuprofwetu wowumu washimwini nindi: ‘Muwuneñu nakahiñishamu wuru, muchikuñu nakahiñishamu siliva, mumutondu nakahiñishamu wuneñu, mumalola nakahiñishamu chikuñu. Nakatonda kuwunda kwikala atulama tweyi, akwakufutisha akwawu nakayibalumuna kwikala kuloña.’ (Isa. 60:17) Indi iwu wuprofwetu watalisha mudihi? Watukundama ñahi makonu?

⁷ Wuprofwetu waIsaya washimuna nawu chuma chimu chikahiña chikwawu. Ilaña mwatela kwiluka nenu iku hikuhimpa kwakufuma mukutama nakuya mukuwahaku, ilaña kuwaha nakuwahilaku. Kuhiñisha wuneñu nawuru hikuyilaku hambidi, chochimu nayuma yikwawu yatenawu. Dichi Yehova wazatishili awa mazu ankinji hakushimuna nindi yuma yikawahilañaku chovu-chovu kudi antu jindi. Indi iwu wuprofwetu wahosha hayumanyi yikawahilañaku chovu-chovu? Chateneniyi “atulama” ‘niakwakufutisha akwawu,’ Yehova watalishili mukwila nindi yuma yikawahilañaku chovu-chovu munjila yakwakamenamu antu jindi nikuyipompesha.

8. (a) Hinyi wakojejaña yuma kuyilaku hambidi mukuloñesha neyi chashimunawu muwuprofwetu waIsaya? (b) Twahetelañamu ñahi muniku kuhimpika? (Talenu cheñi chikasha chinakwila nawu “Wetejeli Mwamufumbiliwu.”)

⁸ Hinyi wakakojeja yuma kuyilaku hambidi mukuloñesha? Yehova wahosha nindi: ‘Nakahiñishamu wuru, . . . Nakahiñishamu siliva, . . . Nakatonda kuwunda.’ Eñañi, yuma yinakuwahilaku kutalisha hachalombolañawu chipompelu muloña waYehova bayi antuku. Kufuma tuhu hamuswanyikiliwu Yesu neyi Mwanta, Yehova nakuzatisha Mwanindi hakuwahisha yuma mukuloñesha. Twahetelañamu ñahi muniku kuhimpika? Nsona yoyimu yahosha nawu iku kuyilaku hambidi kukaleta “kuwunda” ‘nikuloña.’ Muloña twovwahilaña wunlombola waNzambi nikuhimpa yuma yikwawu  kuwunda kwekalaña hakachi ketu nawa kukeña yuma yaloña kwatusañumunaña kumuzatila Yehova wateneniyi kapostolu Pawulu nindi “Nzambi wakuwunda.”—Fwi. 4:9.

9. Chikukwinyi chachiwahi chaletaña kuwunda nikunuñañana muchipompelu nawa muloñadi?

⁹ Pawulu wasonekeli nakutena Yehova nindi: ‘Nzambi hiNzambi wakuluwañeshaku, hiNzambi wakuwunda.’ (1 Kor. 14:33) Ilukenu nenu Pawulu hesekejeli kwila yuma mukuheña nakuyila chakubula kuheñaku, ilaña wesekejeli kuluwañesha nakuwunda. Muloñadi? Shinshikenu chumichi: Kwila yuma mukutela nkawaku hikwaletaña kuwundaku. Chakutalilahu, izanvu dawamashidika dinateli kwenda mumusululu chachiwahi hakuya kunjita, hela endi chiwahi ñahi aletaña njita bayi kuwundaku. Dichi etu akwaKristu twatela kwanuka ichi chikuma, hela chakwila yuma yinakwenda mukutela ilaña neyi kuwunda kwosi hiyinateli kutwalekahuku. Kwambukaku, kuwunda kwaNzambi kwaleñelaña yuma yendi mukutela nawa yashimbulaña. Dichi twazañalalaña muloña kuloñesha kwetu akulombolaña kudi “Nzambi wakuwunda.” (Rom. 15:33) Iku kuwunda kwafuma kudi Nzambi dichikuku chatuleñelaña kwila yuma mukutela nikwikala anuñañana muyipompelu yamukaayi kejima.—Mas. 29:11.

10. (a) Kuhimpikanyi kwadiña mukuloñesha kwetu muyaaka yakusambila? (Talenu chikasha chinakwila nawu “Njila Yakulombwelamu Chiyahimpikili.”) (b) Tukuhanjeka hamalwihwinyi?

¹⁰ Chikasha chinakwila nawu “Njila Yakulombwelamu Chiyahimpikili” chashimuna kuhimpika kwadiña mukuloñesha kwetu muyaaka yakusambila chikwatukwasha. Kuhimpikanyi ‘kwakufuma muwuneñu nakuhiñishamu wuru’ kunaletiyi Yehova muyaaka yamakonu kuhitila mudi Mwanta wetu? Indi njila yakulombwelamu chiyahimpika yakolesha ñahi kuwunda nikunuñañana muyipompelu yamukaayi kejima? Indi iku kuhimpika kunakuyikwasha ñahi kumukalakela “Nzambi wakuwunda”?

11. (a) Kushinshika chahosha Nsona kwaleñeleli ahimpi yumanyi mukutiyisha kwetu? (b) Amanakwetu amwizanvu dalombolaña afwilileña kwiladi?

¹¹ Kutachika mu 1964 nakushika mu 1971, izanvu dalombolaña datachikili mudimu wakutala nsañu jajivulu jamuBayibolu, hakachi kansañu jeniji hadiña nikutala chalombweleñawu chipompelu chawakwaKristu chamumafuku awapostolu. * Kutalisha hamudimu wakulombola, amweni nawu yipompelu yamumafuku awapostolu ayilombweleña kudi izanvu dawaeluda bayi neyi eluda wumu hohuku. (Tañenu Afwilipi 1:1; 1 Timotewu 4:14.) Chiyatiyishiliwu iyi nsañu, Izanvu Dalombolaña damweni nawu Mwanta wawu, Yesu, wadiñi nakuyilombola nakuwahisha njila yakulombwelamu antu jaNzambi, dichi amanakwetu Amwizanvu Dalombolaña afukwilihu kwila mwayilejeliyi Mwanta wawu. Chakadi nikumba mpinji, ahimpili njila yakulombwelamu mukuloñesha kulonda alondeleña chahosha Nsona kutalisha hachakutonda aeluda. Kuhimpikanyi kwamwekeni muyaaka yamuma 1970?

12. (a) Kuhimpikanyi kwamwekeni mwizanvu dalombolaña? (b) Lumbululenu chazataña Izanvu Dalombolaña makonu. (Talenu chikasha chinakwila nawu “Izanvu Dalombolaña Chidazataña Mudimu waWanta,” mafu 130.)

¹² Kuhimpika kwatachi kwakundamini kwizanvu  dalombolaña. Muyina yaaka yejima, mudina izanvu dawamanakwetu awayishewa mwadiñi mamembala 7 akalakeleña neyi adayilekita aWatch Tower Bible and Tract Society of Pennsylvania. Ilaña mu 1971, mwizanvu dalombolaña mwekalili mamembala 11 nawa alekeli kuyitena nawu izanvu dawadayilekita. Awa mamembala adimweneña nawu ejima wawu esekana nawa atachikili kuhimpashana wucheyamani mundonda.

13. (a) Ntanjikilwinyi yadiñaku hayaaka 40 yahitilihu? (b) Izanvu Dalombolaña delili chumanyi mu 1972?

¹³ Kuhimpika kwalondelelihu kwakundamini yipompelu yejima. Munjilanyi? Kufuma mu 1932 nakushika mu 1972, manakwetu wumu hohu diyi wadiñi nakulombola nyidimu yamuchipompelu. Iwu manakwetu amuteneneña nawu nkoñi wakulombola nyidimu kushika nimu 1936. Kuhiñahu atachikili kumutena nawu nkoñi wakampani, kutwala muna nawu nkoñi wachipompelu, nkumininaku nawu nlomboli wachipompelu. Awa amanakwetu adikita akameneneña nankashi nyikoku kuspiritu. Nlomboli wachipompelu kakavulu wafuukwileña nsañu yamuchipompelu kankawindi chakubula kwihula akwawu ankoñi muchipompelu. Ilaña chashikili chaaka cha 1972, Izanvu Dalombolaña dahimpili njila yakulombwelamu. Ahimpili yumanyi?

14. (a) Kuloñeshanyi kwatachikili kuzatika haOctober 1, 1972? (b) Nloñeshi wezanvu dawaeluda wazatishaña ñahi kufumba kwekala haAfwilipi 2:3?

¹⁴ Nyidimu yamuchipompelu atachikili kuyizata kudi izanvu dawaeluda atondeleñawu, dashikahu kwesekeja nayuma  yakeñekaña yamuNsona. Wejima wawu azatilaña hamu hakulombola chipompelu chawu. Iku kuloñesha kwatachikili kuzatika ha October 1, 1972. Makonu nloñeshi wezanvu dawaeluda hadimonaña nindi wabadika akwawuku, ilaña nindi ‘wakehelamu.’ (Luka 9:48) Awa amanakwetu adizoza akwashaña chikupu amanakwawu mukaayi kejima!—Fwi. 2:3.

15. (a) Ntanjikilu yakwikala nawaeluda muchipompelu yaleñela mufumi yumanyi yayiwahi? (b) Chumanyi chamwekeshaña nawu Mwanta wetu wazatili munjila yamaana?

¹⁵ Aeluda chiyadinkañawu nyidimu yashiyashana muchipompelu mwizanvu dawu, chamwekeshaña nawu hikuhimpika kwakuwahi. Shinshikenu iyi yuma yisatu yitwahetelañamu: Chatachi, iku kuloñesha kwakwashaña aeluda kwiluka nawu hela chakwila akweti nyidimu yayivulu, atela kwiluka nawu Yesu diyi Mutu wachipompelu. (Efwes. 5:23) Chamuchiyedi, Yishimu 11:14 yahosha nawu: “kwavula akwakushakama hampuña kwekala kuhanda.” Chineli aeluda azatilaña hamu hansañu yachipompelu nikutiyilila yuma yinakuhosha akwawu aeluda, afuukulaña yuma yesekana nanshimbi jamuBayibolu. (Yish. 27:17) Yehova wayikiswilaña nawa azataña chiwahi. Chamuchisatu, muloña wakwikala nawamanakwetu ashikahu akalakalaña neyi aeluda, kuloñesha kwetu kwekala nawanlomboli akamenaña nikulombola yipompelu yetu yinakuvulilaku. (Isa. 60:3-5) Toñojokenu chumichi; yipompelu yetu yinakuvulilaku, mu 1971 twadiña nayipompelu yakubadika 27,000, mu 2013 yabadikili 113,000. Chakadi  nikujina, Mwanta wetu wukweti maana, wayinka atumbanji twindi atubiña akeñekaña hampinji yatelela.—Mika 5:5.

16. (a) Aeluda akweti mudimwinyi? (b) Indi aTudizi aBayibolu amweni ñahi kufumba kwaYesu ‘kwakubiña nyikoku’?

¹⁶ Mumafuku Awatudizi aBayibolu, aeluda elukili nawu akweti mudimu wakukwasha akwawu kutwalekahu kumukalakela Nzambi. (Tañenu Añalija 6:10.) Dichi mu 1908, chibaaba chadiñi muKaposhi Kakutalila chahosheli hamazu aYesu akwila nawu: “Biñaña anyikoku ami anyanya.” (Yowanu 21:15-17) Achina chibaaba chalejeli aeluda nawu: “Twatela kulemesha nankashi kufumba kwaMwanta kwakubiña nyikoku, kulemesha iku kukooleka kuhitila mukudisha nikubiña atumbanji twaMwanta.” Mu 1925, Kaposhi Kakutalila kakonkomweneni cheñi hakulema kwakukalakala neyi atubiña kuhitila mukuyanukisha aeluda nawu: “Chechi yekala yaNzambi, . . . dichi ejima enkawu kukooleka kwakukalakela amanakwawu akayihula.”

17. Indi anlomboli anayikwashi ñahi kwikala atubiña ashikahu?

¹⁷ Indi kuloñesha kwaYehova kunakwashi ñahi aeluda kuhimpa wuswa wawu wakubiña kufuma muchikuñu nakwikala siliva? Kuhitila mukuyidizisha. Mu 1959, Shikola Yamudimu waWanta yawaeluda yatachikili. Chibalu chimu chamuniyi shikola chadiñi namutu wakwila nawu “Giving Personal Attention,” [“Kwakamena Antu Hamuntu Hamuntu”]. Ana amanakwetu adiñi nanyidimu muchipompelu ayikolesheli “kwikala nandandanda yakuyendela akwakushimwina kumatalawu.” Achina chibalu chakwashili atubiña kwiluka njila jambokamboka jakuhempwilamu. Mu 1966, muShikola yaMudimu waWanta abombelelimu nsañu yikwawu. Iyi nsañu yahosheleña hamutu wakwila nawu “Importance of the Shepherding Work” [“Chalemena Mudimu Wakubiña.”] Chikumanyi  cheneni chadiña munichi chibalu? Antu alombolaña “atela kwakamena nyikoku yaNzambi munjila yayiwahi nawa hiyatela kudiwula yisaka yawu nimudimu wakushimwinaku.” Chayinu mpinji kudi mashikola amavulu awaeluda. Yumanyi yafumaña muniku kudizisha kwatanjika kuloñesha kwaYehova? Makonu, muyipompelu yawakwaKristu mudi aeluda amavulu akalakalaña neyi atubiña akuspiritu.

18. (a) Aeluda ayinka kuzata mudimwinyi walema? (b) Indi aeluda adikitaña nañovu ayikeñeladi kudi Yehova niYesu?

¹⁸ Ntanjikilu yakwikala nawaeluda ayishaku kudi Yehova kuhitila mudi Mwanta wetu Yesu, kulonda azateña mudimu walema. Ekala namudimwinyi? Azataña mudinu wakulombola antu jaNzambi munanu mafuku akala. (Efwes. 4:11, 12; 2 Tim. 3:1) Yehova niYesu wayikeña awa aeluda adikitaña nañovu muloña awa amanakwetu ovwahilaña kufumba kwamuNsona kwakwila nawu: “Biñenuña mukanka wanyikoku yaNzambi wunayikunjikiwu . . . namuchima wakudihana . . . , mukudikeñela chikupu; ikalenuña akutalilahu kudi mukanka wanyikoku.” (1 Pet. 5:2, 3) Tushinshikenu hohu hanjila jiyedi mwekalilawu atubiña akwaKristu yakutalilahu kudi anyikoku nichaletañawu kuwunda nimuzañalu muchipompelu.

19. Twatiyaña ñahi kuzata hamu nawaeluda mumudimu wakushimwina?

¹⁹ Chatachi, aeluda azatilaña hamu nawantu amuchipompelu. Luka nsoneki waNsañu Yayiwahi wahosheli kutalisha hadi Yesu nindi: “Wayili kumusumba nimusumba nikumukala nimukala, nakushimwina nsañu yayiwahi yaWanta waNzambi. Nawa wadiña hamu nawapostolu 12.” (Luka 8:1) Neyi chochu chazatileñayi Yesu hamu nawapostolu indi, makonu aeluda ekala chakutalilahu azatilaña hamu nawakwawu akwakwitiya mumudimu wakushimwina. Eluka nawu  kwila mwenimu kwaleñelaña chipompelu kwikala chamuzañalu. Antu amuchipompelu atiyaña ñahi kwikala nawaeluda amuchidiwu? Muhela wejina daJeannine, wunabadiki dehi yaaka 80, wahosheli nindi: “Kuzatila hamu nawaeluda mumudimu wakushimwina kwanyinkaña kukooleka kwakuhanjeka nawu nikuyiluka chiwahi.” Manakwetu Steven, wudi muyaaka yamuma 30 wahosheli nindi: “Neyi tunakuzata hamu naeluda mumudimu wakushimwina kwitala nikwitala, namonaña nami nakukeña kunkwasha. Nazañalalaña chikupu hakunkwasha muniyi njila.”

20, 21. Indi aeluda anateli kwimbujola ñahi kabiña wamuchishimu chaYesu? Shimunenu chakutalilahu. (Talenu cheñi chikasha chinakwila nawu “Kuhempula Mulungu niMulungu Mwafumini Yuma Yayiwahi.”)

²⁰ Chamuchiyedi, kuloñesha kwaYehova kunakudizisha aeluda kulonda akamenaña antu amuchipompelu azeya. (Heb. 12:12) Muloñadi aeluda chatela kukwashilawu antu azeya kuspiritu nawa atela kuyikwasha ñahi? Chishimu chaYesu chahosha hadi kabiña nimukoku wajimbala chakulaña. (Tañenu Luka 15:4-7.) Iwu kabiña wamunichi chishimu chamonayi nindi mukoku wumu najimbali, wawukeñakeñaña chakwila neyi kwiji wukweti mukoku wumu hohu. Indi aeluda akwaKristu makonu embujolaña ñahi iwu kabiña wamuchishimu? Neyi chochu chalemeshaña kabiña mukoku windi wunajimbali, niaeluda niwena amonaña nawu antu amuchipompelu azeya alema. Amonaña antu azeya kuspiritu nawu hiyanyikoku ajimbala kubadika kumona nawu kuyikeñakeña hikuumba mpinji. Kubombelahu, neyi chochayañayi kabiña “nakukeñakeña owu mukoku wunajimbali,” dichi aeluda niwena aditachikilañahu aweni kuya nakukeña antu ajimbala nikuyikwasha.

²¹ Indi kabiña wamunichi chishimu welañadi neyi nawani mukoku wajimbala? Wamunyamunaña chachiwahi, ‘nakumusha hamafwiji indi’ kulonda yawumufuntishi hamukanka wawanyikoku. Chochimu neyi eluda yamwekesha nindi wakamenaña, nateli kuhizumwisha muntu wazeya kuspiritu nakumukwasha kufunta muchipompelu. Dichi chuma chamwekeneni manakwetu wamuAfrica wejina daVictor, walekeli kudikunda nachipompelu. Washimwini nindi: “Hayaaka 8 yinekalili wazeya, aeluda atwalekelihu kunkwasha.” Chumanyi chamushikili hamuchima? Walumbulwili nindi: “Ifuku dimu, eluda wejina daJohn, mutwadiñilileña hamu muShikola yaMudimu wawuPayiniya, wañendeleli nawa wanleja nyevulu yitwakwatili hitwadiñi muniyi shikola. Nyevulu yeniyi yañanukishili yuma yayivulu yayiwahi chakwila natachikili nikwanuka muzañalu wunadiña nawu hampinji yinamuzatilileña Yehova.” Victor watachikili cheñi kupompa hanyima yakumwendela kudi John. Chayinu mpinji wakalakalaña cheñi neyi payiniya. Eñañi, aeluda akwaKristu akamenaña atukwashaña kwikala namuzañalu.—2 Kor. 1:24. *

22. Indi kuwunda nikuloña kwaleñelaña ñahi chipompelu chawakwaKristu kwikala chanuñañana? (Talenu cheñi chikasha chinakwila nawu “Twahayamini.”)

²² Neyi chashimunawu kumatachikilu, Yehova washimwineñahu dehi nindi kuloña nikuwunda kwakavulilañaku chovu-chovu hakachi kawantu jaNzambi. (Isa. 60:17) Iyi yilwilu yejima yiyedi yaleñelaña chipompelu kwikala chanuñañana. Munjilanyi? Kutalisha hakuloña, ‘Nzambi hiYehova wumu hohu.’ (Kuhit. 6:4) Nshimbi jindi jaloña hijambuka kwesekeja nachipompelu chimu chamunodu ituña nachipompelu chikwawuku. Nshimbi jindi jahosha hayuma yayiwahi niyatama jekala jojimu neyi chekala “muyipompelu yejima yawakwakujila.” (1 Kor. 14:33) Dichi chipompelu chinateli kuyilaku hambidi neyi azatishaña nshimbi jaNzambi. Kutalisha hakuwunda, Mwanta wetu wakeñaña nindi tudiluñisheña kuwunda muchipompelu nikwikala “aletaña kuwunda.” (Mat. 5:9) Dichi “tufwileña yuma yaletaña kuwunda.” Twatachikilañahu kumanisha kukala kunateli kumwekana hakachi ketu. (Rom. 14:19) Chumichi chatukwashaña kwikala awunda nawa anuñañana muchipompelu chetu.—Isa. 60:18.

23. Twadiluñishaña yumanyi etu ambuña Yehova makonu?

²³ MuNovember 1895, Kaposhi Kakutalila chikabidikili ntanjikilu yatachi yakutonda aeluda, amanakwetu alombweleña ahosheli yuma yadiñi munyichima yawu. Hiyumanyi? Afwilileña nawa alombeleña nawu iyi ntanjikilu yayiha yamukuloñesha yikukwasha antu jaNzambi “kunyakala kwikala anuñañana muchikuhwelelu.” Neyi tushinshika hanyima, twazañalalaña hakwiluka netu iyi ntanjikilu yayiha yakulombwelamu, yaleteliyi Yehova kuhitila mudi Mwanta wetu, yaleñela twikali anuñañana mukudifukula kwetu. (Mas. 99:4) Chumichi chaleñela antu jaYehova mukaayi kejima makonu kwenda mwaya ‘yitoñojoka yoyimu,’ nikwila “yuma yoyimu,” nikumukalakela “Nzambi wakuwunda” “namuchima wawu wumu.”—2 Kor. 12:18; tañenu Zefwaniya 3:9.