KAPETULU 10
Mwanta Watookeshaña Atumbanji Twindi Kuspiritu
1-3. Chumanyi cheliliyi Yesu hampinji yawaniniyi tembeli anakuyitamisha?
YESU walemesheli tembeli yadiña muYerusalema muloña welukili chiyadiña nakwimenaku. Ayina tembeli yadiña iluña dakudifukula kwalala hamaseki. Nawa kudifukula kudi Nzambi wajila, Yehova, kwatela kwikala kutooka nawa kwalala. Fwikijenu Yesu chatiyiliyi, hampinji yeñililiyi mutembeli haNisani 10, 33 C.E., nakuwana tembeli anakuyikisañana. Chumanyi chamwekeneñamu?—Tañenu Matewu 21:12, 13.
2 Muyipañu yawaJentili, akwakulandisha akweti lwisu niakwakuhimpa mali adiña nakudiila akwakudifukula mabula hamutu enjileña hatembeli nakulambula nyilambu kudi Yehova. * Yesu ‘wahañilimu antu ejima alandishileña nikulanda yuma mutembeli, wahinwini nijimesa jawakwakuhimpa mali.’ (Esekejenu Nehemiya 13:7-9.) Yesu wayizuwilili ana amayala akwalwisu hakubalumuna itala daTata yindi kwikala “iyeñu dawatupondu.” Chumichi chamwekeshaña nawu Yesu walemesheli tembeli nichiyemeneneñaku. Eña, kudifukula kudi Tata yindi kwateleleli kwikala kutooka.
3 Chimwahitili yaaka yayivulu, hanyima yakumuswanyika haWanta wawuMesiya, Yesu watookesheli cheñi tembeli, iku kutookesha kwabombelamu ejima anakukeña kudifukula kudi Yehova munjila yatelela. Tembelinyi yatookesheliyi?
Kutookesha “Anyana kaLevi”
4, 5. (a) Atumbanji twaYesu awayishewa ayizakasili nikuyitookesha ñahi kufuma mu 1914 nakushika kumatachikilu a 1919? (b) Komana iku kuzakasa nikutookesha antu jaNzambi dikwadiña kwakukumishaku? Lumbululenu.
4 Neyi chitwadizili muKapetulu 2 kawunu mukanda, hanyima yakumuswanyika mu 1914, Yesu wenjili naTata yindi nakuhempula tembeli yakuspiritu, dikwila nawu kudifukula kwalala. * Hanyima yakuhempula, Yesu wamweni nindi akwaKristu awayishewa, “anyana kaLevi,” akeñekeleña kuyizakasa nikuyitookesha. (Mal. 3:1-3) Kufuma mu 1914 nakushika kumatachikilu a 1919, Yehova Mukwakuzakasa, wetejeli antu jindi kuhita mukweseka nimakabi ashiyashana ayileñeleli ayizakasi nikuyitookesha. Ana awayishewa ashindili kweseka kweneni nikumwekesha nawu ayitookesheli kulonda atumbakeshi Mwanta wawuMesiya.
5 Komana iku kuzakasa nikutookesha antu jaNzambi dikwadiñi kwakukumishaku? Inehi. Munanu mafuku akukumininaku, Yehova nakuzatisha Mwanta wawuMesiya, iwu Mwanta natwalekihu kutookesha atumbanji twindi kulonda atwalekihu kwikala mutembeli yakuspiritu. Mutupetulu tuyedi tunalondelihu, tukudiza Mwanta chinayizakasiyi kulonda ekali nayilwilu yayiwahi nichatookeshayi kuloñesha. Tusambilenu kuhanjeka hakutookesha kwakuspiritu. Chikuhwelelu chetu chakolaña hakumona yuma yinazatiyi Yesu, yitwamonaña namesu niyitwabulaña kumona, hakukwasha atumbanji twindi kwikala atooka kuspiritu.
“Ikalenu Atooka”
6. Indi nshimbi jaheniyi Yehova kudi aYudeya adiña muwuduñu jatukwashaña ñahi kwiluka mwatalisha kutooka kwakuspiritu?
6 Kutooka kwakuspiritu kwatalisha mudihi? Hakwila twakuli ilu lwihu, tushinshikenu mazu awuprofwetu ahosheli Yehova hakuyileja aYudeya adiñi kwakwihi nakufuma muwuduñu muBabiloni mu 537 B.C.E. (Tañenu Isaya 52:11.) Ana aYudeya atwaliliwu muwuduñu afuntileña kumukala wawu kuYerusalema kulonda atuñululi tembeli nikutachika cheñi kudifukula kwalala. (Ezera 1:2-4 1:2-4) Yehova wakeñeleña antu jindi abuleña kwila tushidikilu twejima twamukwitiya kwamuBabiloni. Talenu nshimbi jaheniyi mukulondashana: “Bayi mukunka kuchuma chamajiluku,” ‘fumenu mukachi kindi,’ ‘niikalenu atooka.’ Kudifukula kwaYehova kutooka hikwatela kukutamisha nakudifukula kwakutwambaku. Indi kutooka kwakuspiritu kwatalisha mudihi? Kwatalisha mukwila nawu twatela kufuma kuntañishilu nikuyaaku kwamusakililu kwakutwamba.
7. Yesu wazatishañanyi hakukwasha atumbanji twindi kwikala atooka kuspritu?
7 Mwahitili yaaka yantesha kufuma hamuswanyikiliwu Yesu neyi Mwanta, nawa mu 1919 watondeli nduñu wamaana nikashinshi, iwu nduñu diyi wazatishañayi Yesu hakukwasha atumbanji twindi kwikala atooka kuspiritu. Chadiñi chaswayi kumwiluka iwu nduñu. (Mat. 24:45) Chashikileña ichi chaaka, aTudizi aBayibolu adiñi atooka dehi kuntañishilu yamukwitiya kwakutwamba kwakuvulu. Hela chochu, akeñekeleña kuyitookesha cheñi kuspiritu. Kuhitila mudi nduñu washinshika, Yesu natwalekihu kudizisha atumbanji twindi kutalisha hayaaku niyidika yatela kulekawu. (Yish. 4:18) Tuhanjekenu haniyi yidika yikwawu.
Komana akwaKristu Atela Kwanakana Krisimansi?
8. Hayaaka yayivulu, aTudizi aBayibolu elukili chumanyi kutalisha haKrisimansi, hanu atwalekelihu nakwiladi?
8 Hayaaka yayivulu, aTudizi aBayibolu elukili nawu Krisimansi hikudifukula kwawusenji nawa nawu Yesu wavwalikili ha 25 December wanyi. Magazini yateneneñawu nawu Zion’s Watch Tower yaDecember 1881 yahosheli nawu: “Antu amavulu aletawu muchechi afuma muntañishilu yawusenji. Antu wenawa ahimpili hohu majina, muloña atupristu awusenji ekalili atupristu awakwakristu nimafuku akunooka awasenji atachikili kuyitena majina awakwakristu, Krisimansi yekalili hakachi kanawa mafuku akunooka.” Kaposhi Kakutalila kamu 1883, kadiñi namutu wakwila nawu “When Was Jesus Born?” [“Yesu Wavwalikili Mpinjinyi”] kalumbulwili nawu Yesu wavwalikili kumatachikilu akakweji kaOctober. * Ilaña hayina mpinji, aTudizi aBayibolu hiyelukili kulema kwakuleka kwanakana Krisimansiku. Atwalekelihu kwanakana nichisaka chaBeteli chamuBrooklyn. Hela chochu, kufuma mu 1926, yuma yatachikili kuhimpa. Muloñadi?
9. Atudizi aBayibolu elukili chumanyi kutalisha haKrisimansi?
9 Hanyima yakushinshika nakanañachima iyi nsañu, aTudizi aBayibolu elukili nawu Krisimansi niyaaku yejima yakundamaku, yamuneñeshaña Nzambi. Chibaaba chadiña mumagazini yaThe Golden Age yaDecember 14, 1927, chamutu wakwila nawu “The Origin of Christmas,” [“Kwafuma Krisimansi”], chahosheli nawu, Krisimansi hitushidikilu twawusenji, twashindamena hakukeña kudiluñisha nikudifukula kudi anzambi akutwamba. Ichi chibaaba chashimwini hatooka to-o nawu, Kristu hidiyi watachikili Krisimansiku, nawa chakunkulwili nanawa mazu atiyakana ahosha haKrisimansi nawu: “Chineli kaayi, antu niDiyabolu diwu aswejaña kutumbakesha nikwanakana ichi chidika . . . iwu hiwunsahu wunakumwekesha hatooka to-o nawu antu adihana kumuzatila Yehova namuchima wumu, hiyatela kwanakana ichi chidikaku.” Kufuma tuhu hayina mpinji, chisaka chaBeteli chalekeli kwanakana Krisimansi!
10. (a) Nsañwinyi yaKrisimansi yasolweliwu haDecember 1928? (Talenu chikasha chinakwila nawu “Indi Krisimansi Yafuma Kudihi?”) (b) Antu jaNzambi ayisoñamishili ñahi hamafuku akunooka niakwanakana ateleliwu kuleka? (Talenu chikasha chinakwila nawu “Kusolola Mafuku Akunooka niAkwanakana.”)
10 Chaaka chalondelelihu, aTudizi aBayibolu atambwilili nsañu yayivulu yahosheleña haKrisimansi. HaDecember 12, 1928, Manakwetu Richard H. Barber, wazatilileña hakasanji keneni, wahanini mpanji hachikunzulemba yasolweli yaaku yatama yanichi chidika. Indi antu jaNzambi elili ñahi haniwu wunlomboli wafumini kukasanji keneni? Manakwetu Charles Brandlein chanukiliyi mpinji yalekeliwu kwanakana Krisimansi hamu nachisaka chindi, wahosheli nindi: “Komana twaneñeli hakuleka ichi chidika chawusenji? Inehi! . . . Chadiñi tuhu neyi kusubula chakuvwala chinatami nakuchinata.” Manakwetu Henry A. Cantwell wazatili neyi nkoñi wañinza, niyena washimwini chatiyileñayi nindi: “Twazañaleli hakwiluka netu twalekeli kwanakana ichi chidika kulonda tumwekeshi netu twamukeña Yehova.” Atumbanji twaKristu ashinshika etejeli iwu wunlomboli nawa aleka kwanakana ichi chidika chafuma kukudifukula kwatama. *—Yowanu 15:19; 17:14.
11. Tunateli kumukwasha ñahi Mwanta wawuMesiya?
11 Ana aTudizi aBayibolu ashinshika atwimikila chakutalilahu. Chitwatoñojoka hanichi chakutalilahu, twatela kudihula netu: ‘Namonaña ñahi wunlomboli wafumaña kudi nduñu washinshika? Komana netejaña nikuzatisha yuma yinadizaña?’ Neyi twiteja namuchima wumu tukumwekesha netu twamukwashaña Mwanta wawuMesiya, wazatishaña nduñu washinshika kutuloñeshela yakuda yakuspiritu hampinji yatelela.—Yil. 16:4, 5.
Komana akwaKristu Atela Kuzatisha Kulusu?
Chifwikija chakulusu nichibaaba (Talenu maparagilafu 12 ni 13)
12. Hayaaka yayivulu, aTudizi aBayibolu amweneña ñahi kulusu?
12 Hayaaka yayivulu, aTudizi aBayibolu amweneña kulusu nawu hichinjikijilu chatelela kudi akwaKristu. Amweni nawu hiyateleleli kuzatisha kulusu hakudifukulaku, muloña elukili nawu kupesha kwatama. (1 Kor. 10:14; 1 Yow. 5:21) Kumatachikilu achaaka cha 1883, Kaposhi Kakutalila kahosheli hatooka to-o nawu “Nzambi wahela chikupu kupesha kwejima.” Ilaña aTudizi aBayibolu hiyamweni kutama mukuzatisha kulusuku. Chakutalilahu, avwalileña baji yakuyilukilaku hadiñi kulusu nichibaaba. Iyi baji yadiñi nakumwekesha nawu neyi atwalekahu ashinshika nikukufwa, akatambwila chibaaba chawumi. Kutachika mu 1891, baji yeniyi yatachikili kumwekana hefu dahewulu daKaposhi Kakutalila.
13. Nsañwinyi yayivulu yayilejeluwu atumbanji twaKristu kutalisha hakulusu? (Talenu cheñi chikasha chinakwila nawu “Elukili Nsañu Yayivulu Yahosha Hakulusu.”)
13 ATudizi aBayibolu ayilemesheli chikupu iyi baji hadiñi kulusu nichibaaba. Hela chochu, kutachika muyaaka yamuma 1920, atumbanji twaKristu atachikili kuyileja yuma yayivulu kutalisha hakulusu. Manakwetu Grant Suiter, wazatiluku Mwizanvu Dalombolaña, wanukili kupompa kwamu 1928 kwadiña muDetroit, Michigan, U.S.A., nindi: “Haniku kupompa ashimwini nawu kulusu nichibaaba hiyuma yatama nawa hitwatela kuyizatisha mukudifukulaku.” Hayaaka yalondelelihu, atulejeli nsañu yikwawu. Chamwekeni hatooka to-o nawu akwakudifukula alala hiyateleli kuzatisha kulusuku.
14. Indi antu jaNzambi elili ñahi hansañu yayivulu yayilejeleñawu kutalisha hakulusu?
14 Indi antu jaNzambi elili ñahi hansañu yayivulu yayilejeleñawu chovu-chovu kutalisha hakulusu? Komana atwalekeluhu kuzatisha chifwikija chakulusu nichibaaba chakeñeluwu? Lela Roberts wamuzatilili Yehova hayaaka yayivulu wanukili nindi, “Twalekeli kuchizatisha chitwelukili netu chatama.” Muhela mukwawu washinshika wejina daUrsula Serenco, wahosheli chatiyileñawu antu amavulu nindi: “Twelukili netu chifwikija chitwalemesheli netu chemeneneñaku kufwa kwaMwanta wetu, chamwekesheleña kudihana kwawakwaKristu, chadiñi chifwikija chawusenji. Kwesekeja nachahosha mukanda waYishimu 4:18, twelukili netu njila yadiñi nakutooñeka.” Atumbanji twaKristu ashinshika hiyakeñeleña kudibomba muyaaku yatama yamukwitiya kwakutwambaku.
15, 16. Tunateli kumwekesha ñahi netu tunakufwila kuhemba tembeli yaYehova yakuspiritu yahamaseki yitooka?
15 Anetu makonu hitwelaña yaaku yatama yamukwitiya kwakutwambaku. Tweluka netu Kristu nakuzatisha njila yitweluka dikwila nawu nduñu wamaana nikashinshi, hakukwasha atumbanji twindi kwikala atooka kuspiritu. Dichi chatusoñamishawu kuhitila muyakudya yakuspiritu yitwatambulaña nawu yidika yikwawu niyaaku hela tushidikilu twamukwitiya kwakutwamba twatama, twatela kuleka hohenohu nikwovwahila wunlomboli. Kufwana amanakwetu niahela adiñuku hatachikiliyi kuyuula Kristu, twafwilaña kuhemba tembeli yaYehova yakuspiritu yahamaseki yitooka.
16 Munanu mafuku akukuminina, Kristu nakukoña yuma yitwabulaña kumona kulonda yakiñi chipompelu chawantu jaYehova kuchiina kuchitamisha. Nakwila ñahi mwenimu? Tutalenu.
Kwambula “Atama Mudi Aloña”
17, 18. Muchakutalilahu chakaleñi, indi awa mazu atalisha mudihi (a) kulalumwina kaleñi mukaluñalwiji, (b) ‘kupompesha inshi jamuchidi wejima’ (c) kupompesha inshi yayiwahi mumabañu, ni (d) kunata inshi yatama?
17 Mwanta Yesu Kristu wakiñaña chipompelu chawantu jaNzambi heseki dejima. Munjila jitunateli kubula kwiluka, Kristu niañelu anakuzata mudimu wakwambula. Yesu walumbulwili iwu mudimu muchishimu chindi chakaleñi. (Tañenu Matewu 13:47-50.) Ichi chishimu chatalisha mudihi?
Kaleñi kemenañaku nsañu yaWanta yinakushimwinawu antu amukaayi kejima (Talenu paragilafu 18)
18 Kulalumwina ‘kaleñi kekokela mukaluñalwiji.’ Kaleñi kemenañaku nsañu yaWanta yinakushimwinawu antu amukaayi kejima. ‘Kukwata inshi yeñi nayeñi.’ Nsañu yayiwahi yakokaña antu ashiyashana dikwila nawu antu ayilañaku hambidi nakwikala akwaKristu alala, niantu amavulu amwekeshaña mpwila hakusambila ilaña akañanyaña kufuukulahu kwikala mukudifukula kwalala. * Kusakula inshi “jajiwahi nakujisha munyitoña.” Antu akweti nyichima yayiwahi ayipompeshelaña mumabañu dikwila nawu muyipompelu mwadifukwilañawu chachiwahi kudi Yehova. Kunata ‘inshi yatama.’ Munanu mafuku akukuminina, Kristu niañelu anakwambula “atama mudi aloña.” * Chumichi chinaleñeli antu abula kwikala nanyichima yayiwahi, abulaña kuleka tushidikilu twatama, hiyayilekaña kulonda atamishi yipompeluku. *
19. Mwatiyaña ñahi hayuma yinakuyikoñelayi Kristu hakukiña antu jaNzambi kulonda atwalekihu kwikala atooka mukudifukula?
19 Kwiluka netu Mwanta Yesu Kristu wakiñaña antu akamenañayi chatukoleshaña. Chatukundejaña kwiluka netu Yesu wuchidi kutookesha nikukiña akwakudifukula alala neyi chocheliliyi hampinji yatookesheliyi tembeli. Twasakililaña muloña Kristu nakuzata nañovu hakukiña antu jaNzambi kulonda atwalekihu kwikala awunyonji nikudifukula kwalala kutwalekuhu kutooka kuspiritu. Tunateli kumwekesha netu twatumbakeshaña Mwanta niWanta windi neyi tuleka tushidikilu twejima twamukwitiya kwakutwamba.
^ para. 2 A Yudeya enyi azatishileña mali acheñi hakufweta nyisonku yakutembeli yahachaaka, akwakuhimpa mali afwetesheleña antu hakuhimpa mawayawaya namali akeñeleñawu. Cheñi, enyi alandileña anyama akuhana mulambu. Yesu wateneni akwakulandisha nindi “amakombi” muloña adiilileña antu hanyitu
^ para. 4 Antu jaYehova adifukulaña muyipañu yaheseki, tembeli yindi yeneni yakuspiritu.
^ para. 8 Muchinu chibaaba asonekelimu nawu ifuku davwalikiliyi Yesu “hidesekana nansañu yashimunawu nawu atubiña adiña mwisaña nakuhemba nyikoku yawuku.”—Luka 2:8.
^ para. 10 Mumukanda windi wasonekeliyi haNovember 14, 1927, Manakwetu Frederick W. Franz washimwini nindi: “Chinu chaaka hitukwanakana Krisimansiku. Chisaka chaBeteli chinafuukulihu nawu hichamba kanakana cheñi Krisimansiku.” HaFebruary 6, 1928, Manakwetu Franz wasonekeli mukanda wukwawu nindi: “Mwanta nakututookesha chovu-chovu kulonda tufumi kumajilu aDiyabolu amuntañishilu yaBabiloni.”
^ para. 18 Chakutalilahu, mu 2013, akwakushimwina ashikili 7,965,954, nawa antu enjili kuChanukishu adiñi 19,241,252.
^ para. 18 Kwambula inshi yayiwahi nayatama hikwesekana nakwambula anyikoku nawampembuku. (Mat. 25:31-46) Kwambula anyikoku nawampembi kwakekalaku hampinji yalukadi lwasweja. Chayinu mpinji, antu adi neyi inshi jatama anateli kufunta cheñi kudi Yehova nakuyipompeshela mumabañu, dikwila nawu muyipompelu.—Mal. 3:7.
^ para. 18 Nkumininaku, atama akayumbila muluteñu lwakesi lwachifwikija lwemenañaku chakayijilumunawu kumbidi.
You May Also Like
KAPOSHI KAKUTALILA—KAKUDIZAMU
Komana Mwalemeshaña Wuswana Wetu Wakuspiritu?
KAPOSHI KAKUTALILA—KAKUDIZAMU
Komana ‘Mweluka Muchalumbulukila’?
Indi yishimu yaYesu yamukwakukuwa wakamaña, kaleñi nimwana wajimbeli yatalisha mudihi?
