1-3. Yesu watandishili ñahi mudimu wakushimwina, nawa malwihwinyi itwatela kwihula?

HADI yaaka yiyedi, Yesu washimwinini mwahita Ñaliliya yejima. (Tañenu Matewu 9:35-38.) Wahitili munyikala nimunyisumba yejima, nakuyitañisha mumasinagogi nikushimwina nsañu yayiwahi yaWanta. Kwejima kwadiña nakushimwinayi kwapompeleña antu amavulu. Yesu wamweni nindi “mudimu wakwaañula weneni,” dichi akwakukalakala akeñekeleña.

² Yesu waloñesheli chiwahi kulonda yatandishi mudimu wakushimwina. Munjilanyi? Watemesheli apostolu indi 12 kulonda ayi “nakushimwina Wanta waNzambi.” (Luka 9:1, 2) Hekwawu apostolu elukili wanyi chatela kuzatawu iwu mudimu. Dichi henohu kanda yayitemeshi, Yesu wayidizishili chiwahi neyi chochu chamudizishiliwu kudi Tata yindi.

³ Dichi iyi nsañu yaleñelaña twihuli malwihu amavulu: Indi Yesu amudizishilidi kudi Tata yindi? Yesu wayidizishilidi apostolu indi? Indochu makonu, komana Mwanta wawuMesiya nakudizisha atumbanji twindi kuzata mudimu wawu wakushimwina? Neyi dimu, nakuyidizisha ñahi?

4. Yesu amulejeli kudi Tata mpinjinyi nawa kudihi?

⁴ Yesu wahosheli hatooka to-o nindi amudizishili kudi Tata yindi. Hampinji yashimwinineñayi, Yesu wahosheli nindi: “Kwesekeja nayuma yanlejeliwu kudi Tata, diyuma yinahoshaña.” (Yowanu 8:28) Yesu amulejeli mpinjinyi nawa kudihi? Chakadi nikujina, Mwana kaNzambi wawedi atachikili kumuleja hampinji yamuleñeliwu. (Kol. 1:15) Hampinji yadiñayi naTata yindi mwiwulu, Mwana washakamini yaaka yakadi kutwesha kuchinda nakutiyilila kudi ‘Ntañishi Muneni.’ (Isa. 30:20) Chafuminimu, Mwana amudizishili yilwilu yayiwahi, nyidimu ninkeñelu yaTata yindi.

5. Indi Tata wamudizishili ñahi Mwana chakuzata mudimu windi hanu hamaseki?

⁵ Mukuhita kwampinji, Yehova wamulejeli Mwanindi mudimu wazatiliyi hamaseki. Shinshikenu wuprofwetu walumbulula wubwambu wekala hadi Ntañishi Muneni naMwanindi wawedi. (Tañenu Isaya 50:4, 5.) Iwu wuprofwetu wahosha nawu Yehova wamuhindwishileña Mwanindi “habudidi habudidi.” Awa  mazu ashimunaña chuma chelañayi ntañishi wahindwishaña kadizi kindi habudidi nankashi kulonda yamutañishi. Mukanda wumu wahosha haBayibolu washimuna nawu: “Yehova . . . wamutwalileña kushikola neyi chamutwalañawu kadizi, nakumudizisha nsañu yakuhosha nichakushimwina.” Muyina “shikola” yamwiwulu, Yehova wamudizishili Mwanindi ‘yuma yatela kushimunayi nikuhosha.’ (Yow. 12:49) Yehova wamulejeli cheñi Mwanindi chakutañisha. * Chenjiliyi hamaseki, Yesu wazatishili chiwahi yuma yejima yamudizishiliwu, bayi neyi kuhitila mukuzata mudimu windi hohuku ilaña nikudizisha atumbanji twindi kukalakala mudimu wawu.

6, 7. (a) Yesu wayidizishili ñahi apostolu indi nawa yuma yayidizishiliyi yayikwashili kwiladi? (b) Indi Yesu nakumwekesha ñahi nindi nakudizisha atumbanji twindi makonu?

⁶ Neyi chashimunawu kumatachikilu, Yesu wayidizishilidi apostolu indi? Kwesekeja naMatewu kapetulu 10, wayidizishili nshimbi jakuzatisha mumudimu wakushimwina kushilahu ninshimbi jinalondelihu: iluña kwakushimwina (mavasi 5, 6), nsañu yakushimwina (vasi 7), kumukuhwelela Yehova (mavasi 9, 10), chakuhanjeka naweni matala (mavasi 11-13), yuma yateleleli kwilawu neyi eni matala akaana (mavasi 14, 15), nichiyateleleli kwilawu neyi anakuyikabisha (mavasi 16-23). * Iyi nshimbi yayidizishiliyi Yesu apostolu indi yayikwashili chikupu kushimwina nsañu yayiwahi mumafuku awu.

⁷ Indochu munanu mafuku? Yesu, Mwanta waWanta waNzambi, wayinka atumbanji twindi nyidimu yalema chikupu yakushimwina “Nsañu iyi yayiwahi yaWanta . . . mwahita iseki dejima mwashakamawu antu kulonda yikekali wunsahu kudi akwanyuza yejima.” (Mat. 24:14) Komana Mwanta natudizishi chakuzata iwu mudimu walema? Eña natudizishi! Mwiwulu mwadiyi Mwanta, nadizishi atumbanji twindi kulonda eluki chakushimwina antu abula kwikala muchipompelu nichakuzata nyidimu yadimena yamuchipompelu.

8, 9. (a) Indi Shikola Yawakwakushimwina yekala nankeñelwinyi? (b) Shikola Yawakwakushimwina yinayikwashi ñahi kuzata chiwahi mudimu wenu?

⁸ Hayaaka yayivulu, kuloñesha kwaYehova kunadizishi antu jaNzambi kulonda azateña mudimu wakushimwina kuhitila mukupompa kwanyanya, kwamaneni nikupompa kwachipompelu chidi neyi Kupompa kwaChihandilu niMudimu Wanetu akwaKristu. Kutachika tuhu muma 1940, amanakwetu alombweleña hakasanji keneni, atanjikili njila yakudizishilamu kuhitila mumashikola ambokamboka.

⁹ Shikola Yawakwakushimwina. Neyi chitwadiza mukapetulu kanafumihu, iyi shikola ayitachikili mu 1943. Komana iyi shikola yekalilaku kulonda yidizisheña atudizi kuhana chiwahi jimpanji hakupompa kwachipompelu? Inehi. Kutachika tuhu kunyaaka, iyi shikola yekala hohu nankeñelu yimu, dikwila nawu kudizisha antu jaNzambi kuzatisha chawaana chawu chakuhosha hakumuhameka Yehova mumudimu wakushimwina. (Mas. 150:6) Iyi shikola yakwashaña amanakwetu niahela ejima asonekesha kulonda ekali akwakukalakala aWanta ashikahu.  Chayinu mpinji tunakudiza iyi yuma kuhitila mukupompa kwamukachi kamulungu.

10, 11. Anyi atela kusonekesha chayinu mpinji muShikola yaGileyadi nawa yuma yadizañawu yekala nankeñelwinyi?

¹⁰ Shikola yaWatchtower Yakudiza Bayibolu yaGileyadi. Iyi Shikola yitwatenaña makonu netu Shikola yaWatchtower Yakudiza Bayibolu yaGileyadi yatachikili haChimu, February 1, 1943. Iyi shikola yekala nankeñelu yakudizisha apayiniya niankoñi amumudimu wampinji yejima kulonda akalakeleña mudimu wawumishonali kumatuña acheñi. Ilaña kufuma muOctober 2011, antu atela kusonekesha chiña adi dehi mumudimu wadimena wampinji yejima chidi neyi apayiniya adimena, ankoñi endaña niañodi jawu, akaBeteli niamishonali abulahu dehi kuhita muniyi shikola.

¹¹ Yuma yadizañawu muShikola yaGileyadi yekala nankeñelwinyi? Ntañishi wumu wunashimbuli wahosheli nindi: “Iyi shikola yakoleshaña chikuhwelelu chawatudizi chineli adizaña chikupu Izu daNzambi nawa yayikwashaña kwikala nayilwilu yakeñekaña hakushinda kukala kwamonañawu munyidimu yawu. Chuma chikwawu chalema chadizañawu muniyi shikola chekala chakuyikolesha atudizi kwikala neyena nankashi dakuzata mudimu wawu wakushimwina.”—Efwes. 4:11.

12, 13. Yumanyi yayiwahi yafuma mumudimu wakushimwina mukaayi kejima muloña waShikola yaGileyadi? Shimunenu chakutalilahu.

¹² Yumanyi yayiwahi yafuma mumudimu wakushimwina mukaayi kejima muloña waShikola yaGileyadi? Kufuma tuhu mu 1943, antu akushika ku 8,500 ayidizisha muniyi shikola, * nawa amishonali adizishawu muniyi shikola yaGileyadi anazatili mumatuña akubadika ha 170 mukaayi kejima. Amishonali azatishaña chiwahi yuma yayidizishañawu, hakuzata nañovu mumudimu wakushimwina nikudizisha amakwawu kwila mwomumu. Kakavulu amishonali anatwali mudimu wakushimwina hambidi mumaluña mwabulili akwakushimwina aWanta hela mwadiñi antesha.

¹³ Shinshikenu chuma chamwekeni muJapan, mudimu wakushimwina kumaluña kwekala antu amavulu wamwekeneña neyi wunakumana mumpinji Yanjita Yakaayi Yamuchiyedi. MuAugust 1949, muJapan mwadiña akwakushimwina kwakwihi nekumi. Ilaña, kukumana kwanichi chaaka, amishonali akushika ku 13 afumini kushikola yaGileyadi adiña nakushimwina muJapan. Amishonali amakwawu ashikili. Hakutachika, amishonali ashili maana hakushimwina munyisumba yamaneni, kuhiñahu atachikili cheñi kushimwina munyisumba yikwawu. Amishonali adiña nakukolesha atudizi awu aBayibolu niamakwawu kulonda atachiki kuzata mudimu wawupayiniya. Muloña wakwila amishonali adiña nakudikita chikupu, mwafumini yuma yayiwahi. Chayinu mpinji, muJapan mudi akwakushimwina aWanta akubadika ha 216,000, nawa kwakwihi nachikunku ekala apayiniya ampinji yejima. *

14. Mashikola amakwawu awakwaKristu amwekeshaña wunsahwinyi? (Talenu cheñi chikasha chinakwila nawu “Mashikola Adizishaña Akwakushimwina aWanta,” ifu 188)

¹⁴ Mashikola Amakwawu awakwaKristu. Shikola yaMudimu wawuPayiniya, Shikola yaKudiza Bayibolu yawakwaKristu Adisumbula, niShikola yaKudiza Bayibolu yawaManakwetu Ajiki yinakwashi antu ahitamu kukolesha wubwambu wawu  naNzambi nikuzata nañovu mumudimu wakushimwina. * Awa mashikola ejima hiwunsahu wunakumwekesha nawu Mwanta nakwashi atumbanji twindi kukalakala mudimu wawu nakuwimanisha chikupu.—2 Tim. 4:5.

15. Amayala alombolaña atela kumwimbujola Yesu munjilanyi?

¹⁵ Anukenu wuprofwetu waIsaya washimuna nawu Yesu anakumudizisha kudi Nzambi. Muyina “shikola” yamwiwulu, Mwana ‘wadizili mazu akukolesha nachu muntu wunazeyi.’ (Isa. 50:4) Hampinji yadiñayi hamaseki, Yesu wazatishili yuma yadiziliyi kuhitila mukunookesha ejima ‘akabakeneña nawa asendeli yiteli yalema.’ (Mat. 11:28-30) Hakumwimbujola Yesu, amanakwetu alombolaña atela kukwasha amanakwetu niahela kulonda azateña namuzañalu. Dimuloña wunaloñesheliwu mashikola amavulu kulonda amanakwetu ashikahu akwasheña chiwahi akwawu.

16, 17. Shikola yaMudimu waWanta yekala nankeñelwinyi? (Talenu cheñi tumazu twaheshina.)

¹⁶ Shikola yaMudimu waWanta. Iyi shikola yatachikili haMarch 9, 1959, kuSouth Lansing, muNew York. Ankoñi  endaña kushilahu niankoñi achipompelu (atenañawu makonu nawu anloñeshi ezanvu dawaeluda) ayitambikileña kuya nakudiza hadi kakweji kamu. Iyi shikola yadiñi hohu muChizungu, mukuhita kwampinji yekalili nimumadimi amakwawu, nawa amanakwetu mukaayi kejima atachikili kuyidizisha. *

¹⁷ Kuhosha hankeñelu yaShikola yaMudimu waWanta, mukanda waYearbook of Jehovah’s Witnesses wamu 1962, wahosheli nawu: “Mukanu kaayi mudi yuma yayivulu yakwila, nkoñi wamuchipompelu chawaYinsahu jaYehova watela kuloñesha chiwahi nyidimu yindi, kulonda yakameneña chiwahi antu ejima muchipompelu nikuyikwasha. Hampinji yoyimu hatela kudiwula chisaka chindi muloña wakufwila kwakamena chipompeluku, ilaña watela kwikala wawundisha mumesu. Aeluda amuyipompelu yamukaayi kejima akweti kukooleka kwakwinza hamu kuShikola yaMudimu waWanta kulonda ayidizishi kwesekeja nachahosha Bayibolu nawu dichi chatela kuzata mukwakutala akwawu.”—1 Tim. 3:1-7; Tit. 1:5-9.

18. Indi antu jaNzambi ejima ahetelañamu ñahi muShikola yaMudimu waWanta?

 ¹⁸ Antu jaNzambi ejima anahetelimu muniyi Shikola yaMudimu waWanta. Munjilanyi? Kufwana Yesu, neyi aeluda niankoñi akuzatila azatishaña yuma yadizawu mushikola, akwashaña akwawu akwakwitiya kuzata namuzañalu. Komana mwahamekaña wanyi neyi eluda hela nkoñi wakuzatila wakamenaña yayendela, yahosha mazu akuyikolesha hela kuyitiyilila? (1 Tesa. 5:11) Amayala ashikahu amuchidawa akwashaña chikupu yipompelu.

19. Kometi Yatañishaña yalombolaña mashikolanyi nawa awa mashikola ekalilaku kwodi?

¹⁹ Mashikola amakwawu awakwaKristu. Kometi Yatañishaña Yezanvu Dalombolaña yalombolaña mashikola amakwawu adizishaña amanakwetu ekala nanyidimu yashiyashana mukuloñesha. Awa mashikola ekalaku kulonda akwasheña amanakwetu alombolaña chidi neyi aeluda amuchipompelu, ankoñi endaña nimamembala amuKometi yaMutayi kulonda azateña chiwahi nyidimu yikwetiwu. Nsañu yadizañawu yashindamena haBayibolu yakwashaña amanakwetu kukolesha wubwambu wawu naNzambi nikuzatisha nshimbi jamuNsona hakuzata nanyikoku yaYehova yalemeshayi yayinkawu kuhemba.—1 Pet. 5:1-3.

20. Muloñadi Yesu chahosheleliyi nindi, ejima wetu ‘akatwidizisha kudi Yehova’ nawa munakufwila kwiladi?

²⁰ Mwamweni, Mwanta wawuMesiya nazati nañovu hakudizisha atumbanji twindi. Yuma yejima yatudizishawu yafuma kudi Yehova muloña wamudizishili Mwanindi, Mwanindi niyena nadizishi atumbanji twindi. Dichi chahosheleliyi Yesu nindi, ejima wetu ‘akatwidizisha kudi Yehova.’ (Yow. 6:45; Isa. 54:13) Dichi, wejima wetu tuzateña hakumina ñovu jetu kulonda atudizishi kudi Mwanta wetu munawa mashikola. Nawa twatela kwanuka netu nkeñelu yanawa mashikola yekala yakutukwasha kulonda tutwalekihu kumushindamena Yehova hampinji yitunakukalakala mudimu wetu nakuwumanisha chikupu.