KAPETULU 1
“Wanta Weyi winzi”
1, 2. Yehova wayilejeli apostolu asatu aYesu kwiladi, nawa chumanyi cheliliwu?
NEYI Yehova Nzambi yayileja nindi mwili chuma, munateli kwila ñahi? Hela chakwila nayileji nindi mwili chuma chakala, komana kwila mwiteja namuchima wumu nehi? Chakadi nikujina mukwiteja.
2 Hanyima yaPaseka mu 32 C.E., apostolu aYesu asatu, Petulu, Yakoba niYowanu ayilejeli kwila mwenimu. (Tañenu Matewu 17:1-5.) Chapompeliwu naMwanta wawu “hampidi yayilehi,” amumweni Yesu mukulema neyi Mwanta mwiwulu kuhitila muchimwenu. Yuma yamwenuwu muchimwenu yamwekeni neyi kwiji yalala chakwila Petulu wakeñeleña nindi niyena yekalimu. Iku Petulu wuchidi kuhosha, ivu hidikudituña hadi wena. Kuhiñahu, Petulu nialundanindi adiña nakukooleka kwakutiya izu daYehova dadeni dabula kutiyahu dehi antu amavulu. Hanyima yakuhosha nindi Yesu hiMwanindi, Yehova wahosheli hatooka nindi: “Mutiyililenu.” Apostolu ovwahilili mwayilejeliyi Nzambi. Atiyilili mwayilejeliyi Yesu nawa alejeli antu amakwawu kumutiyilila.—Yil. 3:19-23; 4:18-20.
Yesu wahosheli nankashi haWanta waNzambi kubadika nsañu yikwawu
3. Muloñadi Yehova chakeñelañayi nindi tumutiyilileña Mwanindi, nawa nsañwinyi yitwatela kudiza?
3 Izu dakwila nawu “Mutiyililenu” adisonekeli muBayibolu kulonda tuhetelimu. (Rom. 15:4) Muloñadi? Muloña Yesu himukwakumuhoshelaku Yehova nawa mpinji yejima yatañishileñayi, Yesu watañishileña yuma yakeñeleñayi Tata yindi nindi twiluki. (Yow. 1:1, 14) Chineli Yesu wahosheleña nankashi haWanta waNzambi, nfulumendi yawuMesiya yamwiwulu yatuñewa naKristu Yesu nia144,000 akayuulaña hamu nindi, twatela kudiza iyi nsañu yalema nakanañachima. (Chim. 5:9, 10; 14:1-3; 20:6) Tutalenu chuma chacheni chaletesheli Yesu yahosheña nankashi haWanta waNzambi.
“Yuma Yidi muMuchima Diyi . . .”
4. Yesu wamwekesheli ñahi nindi wakeña Wanta?
4 Yesu wakeña chikupu Wanta. Muloñadi wutunahosheli mwenimu? Muloña mazu itwahoshaña amwekeshaña yuma yidi mumuchima, dikwila nawu jitwahoshaña jamwekeshaña yuma yitwalemesha. Yesu wahosheli nindi: “Yuma yidi mumuchima diyi yahoshañayi muntu.” (Mat. 12:34) Yesu wahosheleña hansañu yaWanta mpinji yejima. Munyikanda yiwana yaNsañu Yayiwahi mwekala nyikuku yamazu kubadika ha 100 yahoshaña haWanta nawa yayivulu ayihosheli kudi Yesu. Wanta diwu mutu wansañu wazatishileñayi hakushimwina nindi: “Natela cheñi kushimwina nsañu yayiwahi yaWanta waNzambi kunyisumba yikwawu, muloña ichi dichantemesheleliwu.” (Luka 4:43) Nihampinji yamusañwiliwu, Yesu watwalekelihu kuleja atumbanji twindi hansañu yaWanta. (Yil. 1:3) Chalala muchima waYesu wenzeli namuzañalu wansañu yaWanta nawa chumichi chamusañumwini kuhosha haniyi nsañu.
5-7. (a) Tweluka ñahi netu Yehova wakeña Wanta? Lumbululenu. (b) Tunateli kumwekesha ñahi netu twakeña Wanta?
5 Yehova niyena wakeña chikupu Wanta. Tweluka ñahi? Anukenu nenu Yehova watemesheli Mwanindi wumu hohu mukaayi, Yehova diyi wamulejeleña Mwanindi yuma yejima yahosheleñayi niyatañishileñayi. (Yow. 7:16; 12:49, 50) Yehova diyi cheñi nsoneki wansañu yekala munyikanda yansañu yayiwahi yiwana yahoshaña hachihandilu chaYesu nihamudimu windi wakushimwina. Tutalenu munatalishi awa mazu.
Wejima wetu twatela kudihula netu, ‘Komana nakeña Wanta waNzambi?’
6 Fwikijenu mudi halwendu. Mukweti yakuvwala yayivulu ilaña chola chimukweti hichinateli kwiñija yakuvwala yejimaku. Mukwila ñahi? Mukutonda yakuvwala yimunakukeña kusenda. Munjila yoyimu, Nsañu Yayiwahi yidi neyi chola chenzala nsañu yahosha hadi Yesu. Yehova hayoneneni ansoneki aNsañu Yayiwahi kusoneka nsañu yejima yahosheleñayi Yesu niyuma yelileñayi hamasekiku. (Yow. 20:30; 21:25) Ilaña spiritu yaYehova yayikwashili kusoneka mazu niyuma yatukwashaña kutiyishisha nkeñelu yamudimu waYesu niyuma yalemeshayi Yehova. (2 Tim. 3:16, 17; 2 Pet. 1:21) Chineli munyikanda yaNsañu Yayiwahi mwekala yuma yayivulu yatañishileñayi Yesu kutalisha haWanta waNzambi, tunateli kukunkulula netu Yehova wakeña chikupu Wanta. Dichi, Yehova nakukeña nindi twiluki Wanta windi.
7 Wejima wetu twatela kudihula netu, ‘Komana nakeña Wanta waNzambi?’ Neyi dimu, tukukeña nankashi kutiyilila kuyuma yahosheleñayi Yesu niyatañishileñayi haWanta, dikwila nawu chiwalemena, chiwakenza nimpinji yiwakenza.
“Wanta Weyi Winzi”—Wukenza ñahi?
8. Yesu wahosheli ñahi mukwihihisha kulema kwaWanta?
8 Tuhanjekenu hakulomba kwachitalilu. Hakukunkulula kulomba kwindi, Yesu wazatishili nyikuku yamazu yapela hakulumbulula kulema kwaWanta niyuma yikela Wanta. Mukulomba kwindi Yesu wateneni yuma yitanu nayiyedi. Yuma yisatu yatachi yateneniyi yashindamena hankeñelu yaYehova, kujilika ijina dindi, kwinza kwaWanta windi nikwila mwaya muchima waNzambi neyi chawilañawu mwiwulu. (Tañenu Matewu 6:9, 10.) Iyi yuma yisatu yateneniyi yesekana. Yehova wakazatisha Wanta wawuMesiya hakujilika ijina dindi nikwila nkeñelu yindi.
9, 10. (a) Wanta waNzambi wukenza ñahi? (b) Chikaninwinyi chamuBayibolu chimwafwilaña nenu chikashikijewi?
9 Wanta waNzambi wukenza ñahi? Neyi tulomba netu, “Wanta weyi winzi,” tunakulomba netu Wanta wunyakali kufumishahu yuma yatama. Neyi Wanta wunenzi, wukamwekesha ñovu chikupu mwahita iseki dejima. Wukafumishahu kaayi kamakonu katama, kubombelahu ninfulumendi jawantu nawa wukaleta ituña dadiha mukekala kuloña. (Dan. 2:44; 2 Pet. 3:13) Kuhiñahu, muchiyuulu chaWanta, iseki dejima dikekala paradisa. (Luka 23:43) Antu ejima ekala muchanukishu chaNzambi akayisañula nawa akashakamaña nawantaña jawu. (Yow. 5:28, 29) Antu ovwahilaña akekala awanina nawa akadiluñisha wumi wahaya nyaka. (Chim. 21:3-5) Nkumininaku, nkeñelu yaNzambi akayilaña hamaseki neyi chayilañawu mwiwulu. Komana himwafwilaña kumona chakashikijewa yikaninu yamuBayiboluku? Anukenu nenu mpinji yejima yimwalombaña nenu Wanta Nzambi winzi, mwalombaña nenu iyi yikaninu yayiwahi yishikijewi.
10 Chinamwekani hatooka nawu Wanta waNzambi kanda “winzi” nakushikija kulomba kwachitalilu. Nfulumendi jawantu jichidi kuyuula nawa ituña dadiha mukekala kuloña kanda dishiki. Ilaña kudi nsañu yayiwahi. Wanta waNzambi watachika dehi kuyuula, neyi chitukuhanjeka mukapetulu kanalondelihu. Tuhanjekenu chahosheliyi Yesu hampinji yikatachika kuyuula Wanta nimpinji yiwukenza.
Wanta waNzambi Wukatachika Kuyuula Mpinjinyi?
11. Yesu wahosheli nindidi kutalisha hampinji yakatachika kuyuula Wanta waNzambi?
11 Yesu wahosheli hatooka nindi Wanta hiwakatachika kuyuula mumpinji yawapostoluku, hela chakwila atumbanji twindi amakwawu atoñojokeleña nawu wukutachika kuyuula mumpinji yawapostolu. (Yil. 1:6) Shinshikenu yuma yahosheliyi muyishimu yiyedi yashiyashana, chimu mu 31 C.E., chikwawu mu 33 C.E.
12. Chishimu chatidiku namatawu chamwekeshaña ñahi nawu Wanta hiwatachikili kuyuula mumpinji yawapostoluku?
12 Chishimu chatidiku nimatahu. (Tañenu Matewu 13:24-30.) Hanyima yakuhosha ichi chishimu, hadaha muchaaka cha 31 C.E., Yesu wayilumbulwilili atumbanji twindi muchatalisha. (Mat. 13:36-43) Ichi chishimu chatalisha mukwila nawu: Chafwiliwu apostolu, Diyabolu wakuwilimu matahu (akwaKristu akutwamba) mutidiku (“anyana kaWanta,” hela akwaKristu awayishewa). Tidiku nimatahu akayileka akulili hamu kushika nimpinji yakumuna, dikwila nawu ‘kukuma kwanshakaminu yamakonu.’ Neyi kumuna kunatachiki dehi, matahu akayikuñwila hamu. Kuhiñahu tidiku akayikuñwila hamu. Dichi, ichi chishimu chamwekeshaña nawu Wanta hiwatachikili kuyuula mumpinji yawapostoluku, ilaña neyi tidiku nimatahu anakuli dehi. Chakulili tidiku nimatawu, chilaka chakumuna chatachikili mu 1914.
13. Yesu walumbulwili ñahi nindi hiyakashikena dakumuswanyika haWanta wawuMesiya neyi nayi mwiwuluku?
13 Chishimu chamamina. (Tañenu Luka 19:11-13.) Yesu watili ichi chishimu mu 33 C.E. hayileñayi kuYerusalema kakukumishaku. Antu amakwawu amutiyilileña atoñojokeli nawu wukutachika kuyuula muWanta windi neyi anashiki muYerusalema. Hakwila nawu yayololi nikumwekesha nawu kuchidi mpinji hakwila nawu Wanta wukatachiki kuyuula, Yesu wadesekejeli ‘namuntu wumu’ wayili “kwituña dakwakulehi nakutambula ñovu jawanta.” * Kudi Yesu, “kwituña dakwakulehi” himwiwulu, mwadi kutambwilayi ñovu kudi Tata yindi nakwikala Mwanta. Hela chochu, Yesu welukili nindi hiyakashikena dakumuswanyika haWanta wawuMesiya chakafuntayi mwiwuluku. Ilaña wakashakama kuchikasa chachidiilu chaNzambi nakuhembelela mpinji yatoñolawu. Yesu wahembeleleli hadi yaaka yayivulu nankashi.—Mas. 110:1, 2; Mat. 22:43, 44; Heb. 10:12, 13.
Wanta waNzambi Wukenza Mpinjinyi?
14. (a) Yesu wakwili ñahi lwihu lwamwihwiliwu kudi apostolu indi awana? (b) Kushikijewa kwawuprofwetu waYesu kwatukwashaña kwiluka yumanyi hakwinza kwindi niWanta?
14 Henohu kunashali dehi mafuku antesha nakumujaha Yesu, atumbanji twindi awana amwihwili nawu: “Chinjikijilwinyi chikamwekesha kwikalahu kweyi nikukuma kwanshakaminu yamakonu?” (Mat. 24:3; Maku 13:4) Yesu wayakwili kuhitila mukuyileja wuprofwetu mwekala yuma yayivulu wasonekawu haMatewu kapetulu 24 ni 25. Yesu walumbulwili yuma yayivulu yikamwekana mukaayi yikamwekesha chinjikijilu nimpinji ‘yakwinza kwindi.’ Iyi mpinji yatachikili hatachikili Wanta kuyuula, nawa yikamana neyi Wanta wunenzi. Kudi yuma yayivulu yinakumwekesha nawu wuprofwetu waYesu wunakushikijewa kutachika mu 1914. * Dichi, Yesu wenjili munichi chaaka nawa dihatachikili Wanta kuyuula.
15, 16. Mazu akwila nawu “idi ikiñu” atenaña anyi?
15 Hanu dinu Wanta waNzambi wukenza mpinjinyi? Yesu hashimwini mpinji yikenza Wantaku. (Mat. 24:36) Ilaña wahosheli yuma yikutukwasha kwiluka nawu wudi kwakwihi nakwinza. Yesu wahosheli nindi Wanta wukenza hanyima yakwila “idi ikiñu” dinamoni kushikijewa kwachinjikijilu chamuwuprofwetu. (Tañenu Matewu 24:32-34.) Indi nhoshelu yakwila nawu “idi ikiñu” yatenaña anyi? Tushinshikenu chikupu mazu aYesu.
16 “Idi ikiñu.” Komana Yesu wateneneña antu abula kwitiya? Inehi. Anukenu antu adiñayi nawu. Yesu walejeleña apostolu indi iwu wuprofwetu, “enjili nakumuwana kwakankawawu.” (Mat. 24:3) Kwashalili hohu kampinji kantesha nakuyiwayisha apostolu naspiritu yajila. Talenu mazu amakwawu ahosheliyi. Henohu kanda yahosha hanidi “ikiñu,” Yesu wahosheli nindi: “Ichi dinu dizilenu kunichi chakutalilahu chamutondu wachikuyu: Neyi tunyitayi tutachika kumena nimafu atachika kusapuka, mwelukaña nenu mayinza adi kwakwihi. Ninenu nawa, neyi mumona yuma yejimiyi, mwakeluki nenu wudi kwakwihi, wudi kuyiisu.” Atumbanji twaYesu awayishewa diwu akamona yuma yashimwiniyi nawa akeluka kulema kwayu, dikwila nawu Yesu wudi “kwakwihi, wudi kuyiisu,” bayi antu abula kwitiyaku. Dichi, Yesu chahosheliyi nindi “idi ikiñu,” wateneneña atumbanji twindi awayishewa.
17. Nhoshelu yakwila nawu “idi ikiñu” ‘niyuma yejimiyi’ yatalisha mudihi?
17 “Dikahita wanyi, sampu yuma yejimiyi yinamwekani dehi.” Indi awa mazu akashikijewa ñahi? Hakwila nawu tuwani ñakwilu, twatela kwiluka yuma yiyedi: chalumbuluka “ikiñu” ‘niyuma yejimiyi.’ Izu dakwila nawu “ikiñu” kakavulu datalisha kudi antu ashiyashana yaaka yakusemuka atwalekañahu kuhanda hampinji yimu. Ikiñu hidatwalekañahuku, damanaña. (Kwid. 1:6) Mazu akwila nawu “yuma yejimiyi” abombelamu yuma yejima yashimwiniyi yikamwekanaña hakwinza kwaYesu, kutachika mu 1914 kushika nimpinji ‘yalukadi lwasweja.’—Mat. 24:21.
18, 19. Mazu aYesu akwila nawu “idi ikiñu,” atalisha mudihi, nawa tunateli kukunkulula netudi?
18 Indi mazu aYesu akwila nawu “idi ikiñu” atalisha mudihi? Munidi ikiñu mwekala mazanvu ayedi awakwaKristu awayishewa, mwizanvu datachi mwekala awayishewa amweni chatachikili kushikijewa kwachinjikijilu mu 1914, damuchiyedi mwekala awayishewa adiña amomi henohu amwizanvu datachi achidi amomi. Amakwawu ekala mwizanvu damuchiyedi akekala amomi hampinji yikatachika lukadi lwasweja. Awa mazanvu ayedi ekala ikiñu dimu muloña akwaKristu awayishewa ahandiliku hampinji yimu. *
19 Tukukunkulula netudi? Tuneluki netu chinjikijilu chakwinza kwaYesu nañovu muWanta chinakumwekana mukaayi kejima. Tunakumona cheñi awayishewa achidi amomi ‘amunidi ikiñu’ anakushinakaja, ilaña ejima wawu akamana wanyi kufwa sampu lukadi lwasweja lunatachiki. Dichi tunateli kuhosha netu, Wanta waNzambi keña winzi nakutachika kuyuula hamaseki. Tukazañalala hakumona chikashikijewa kulomba kwatudizishiliyi Yesu nindi: “Wanta weyi winzi.”
20. Nsañwinyi yalema yitukudiza muwunu mukanda nawa tukahanjeka hansañwinyi mukapetulu kanalondelihu?
20 Dichi, bayi tuvulamena mazu ahosheliyi Yehova mwiwulu hadi Mwanindi nindi: “Mutiyililenu.” Chineli tudi akwaKristu alala, twafwilaña kwovwahila wunlomboli waNzambi. Tunakukeña kwiluka chikupu yuma yejima yahosheliyi niyatañishiliyi Yesu haWanta waNzambi. Muwunu mukanda tukudiza yuma yalema yinakoñi iwu Wanta niyuma yiwukakoña kumbidi. Chibaaba chinalondelihu chikuhosha hayuma yamwekeni hampinji yatachikili Wanta waNzambi kuyuula mwiwulu.
^ para. 13 Antu chatiyiliwu chishimu chaYesu hadaha anukili Akelawusi, mwana kaHerodi Muneni. Henohu kanda yafwi, Herodi wamutondeli Akelawusi kwikala nswana yindi kulonda yakayuuleña muYudeya nimaluña amakwawu. Dichi henohu kanda yatachiki kuyuula, Akelawusi wayili kuRoma kulonda yakatambuli lusesa kudi Agusitusi Kesari.
^ para. 14 Neyi munakukeña nsañu yikwawu, talenu kapetulu 9 kamukanda waChumanyi Chacheni Chatañishaña Bayibolu?
^ para. 18 Ejima awayishiliwu hanyima yakwila ejima awayishewa amwizanvu datachi anafwi dehi, dikwila nawu ana amweni ‘chatachikili yihuñu’ mu 1914, hiyakekala ‘munidi ikiñuku.’—Mat. 24:8.
