1, 2. (a) Indi ambuña aYehova adiluñishaña kwiladi kutachika tuhu kunyaaka? (b) Yehova walemesha chumanyi?

KUTACHIKA tuhu kunyaaka, ambuña Yehova atiyaña kuwaha kutuña matala aletaña kalemesha hejina dindi. Chakutalilahu, aIsarela azatili neyena mudimu wakutuña tabanaka nawa ahanini yuma yakutuña nachu.—Kwi. 35:30-35; 36:1, 4-7.

² Yehova hamonaña yuma yakutuña nachu matala neyi diyi yaletaña kalemesha kudi yenaku nawa hidiyi yalemeshayi nankashiku. (Mat. 23:16, 17) Yehova walemesha yawaana yaletaña kalemesha kudi yena kubadika yuma yejima dikwila nawu kudifukula kwadifukulañawu ambuñindi kudi yena, nichadihanawu namuchima wumu nikudikita nañovu. (Kwi. 35:21; Maku 12:41-44; 1 Tim. 6:17-19) Chumichi chalema nankashi. Muloñadi? Muloña kutuña kwenzaña nawa kwamanaña. Chakutalilahu, tabanaka nitembeli yekalaku wanyi. Hela chakwila awa matala ajiya, ilaña Yehova wanukaña ambuñindi ashinshika ahanini yawaana nikuzatisha ñovu yawu hakutuña.—Tañenu 1 Akorinda 15:58; Aheberu 6:10.

3. Tukushinshikadi mukanu kapetulu?

³ Ambuña Yehova amakonu niwena azataña nañovu hakutuña matala hela maluña akudifukwilamu. Nawa yuma yitunakalakali nawunlomboli waMwanta wetu Yesu Kristu hiyuma yekomwesha chikupu. Eñañi, Yehova natukiswili chitunakudikita chikupu. (Mas. 127:1) Mukanu kapetulu tukushinshika hanyidimu yinazatiwu nichiyaleta mpuhu hadi Yehova. Tukutiya cheñi chahoshawu antu azataña mudimu wakutuña.

4. (a) Muloñadi wutunakukeñela maluña amavulu akudifukwila? (b) Muloñadi tusanji twanyitayi twashiyashana chiyatubombawu? (Talenu chikasha chinakwila nawu “Kutuña Tusanji Twanyitayi Kwesekeja naKukaankila.”)

⁴ Neyi chitwadizili muKapetulu 16, Yehova wakeñaña nindi tupompeña hamu nakudifukula. (Heb. 10:25) Bayi neyi kupompa kwetu kwakoleshaña hohu chikuhwelelu chetuku ilaña kwatukojejaña kwikala neyena mumudimu wakushimwina. Chineli mafuku akukumina hiyakuya nakumana, Yehova natwalekihu kunyakesha mudimu. Nawa chumichi  chinakuleñela antu amavulu kwinza mukuloñesha kwindi hachaaka nichaaka. (Isa. 60:22) Muloña wakwila antu akayuulañawu kudi Wanta anakuvulilaku, matala akupulintilamu nyikanda yashindamena haBayibolu anakukeñeka nankashi. Tunakukeña cheñi maluña amavulu akudifukwilamu.

5. Muloñadi ijina dakwila nawu Itala daWanta chidatelela? (Talenu cheñi chikasha chakwila nawu “Chechi yaChejeji Chachiha.”)

⁵ Hampinji yatachikili antu jaYehova nyidimu yawu, aTudizi aBayibolu amweni kulema kwakwikala namaluña awu akudifukwilamu. Chamwekana neyi itala datachi dakudifukwilamu adituñilili kuWest Virginia, U.S.A., mu 1890. Muyaaka yamuma 1930, antu jaYehova atuñili hela kuwahisha matala amavulu, ilaña matala wenawa hiyadiña namajinaku. Ilaña mu 1935, Manakwetu  Rutherford wayili kuHawaii kwatuñileñawu itala dakupompela danuñililiwu kukasanji kamutayi. Chamwihwiliwu ijina dateleleliwu kutena dina itala, Manakwetu  Rutherford wakwili nindi: “Komana kwila tuditena netu ‘Itala daWanta’ chineli diwu mudimu  wutunakuzata wakushimwina nsañu yayiwahi yaWanta nehi?” (Mat. 24:14) Idi itala nimatala amakwawu azatishaña antu jaYehova mukaayi kejima hakupompelamu atachikili kuyitena nawu Matala aWanta.

6, 7. Indi Matala aWanta atuñañawu swayi-swayi ahanaña wunsahwinyi?

⁶ Muyaaka yamuma 1970, kwakeñekeleña Matala aWanta amavulu nankashi. Chumichi chaleñeleli amanakwetu muUnited States kuwana njila yakutuñilamu Matala aWanta alubanji mumafuku antesha hohu. Chashikileña chaaka cha 1983, atuñili Matala aWanta akushika ku 200 muUnited States nimuCanada. Hakwila azati chiwahi iwu mudimu, amanakwetu atuñili makomiti akutuña mwiluña. Iyi njila yazatikili chiwahi chakwila mu 1986, Izanvu Dalombolaña detejeli iyi ntanjikilu nawa chashikileña chaaka cha 1987, kwadiña Makomiti Akutuña Mwiluña akushika ku 60 muUnited States. * Mu 1992, atondeli makometi amakwawu muArgentina, Australia, France, Germany, Japan, Mexico, South Africa, nimuSpain. Awa amanakwetu anakudikita nañovu hakutuña Matala aWanta niMatala Akupompelamu, twatela kuyihameka muloña mudimu wunakuzatawu wekala himudimu wajila.

⁷ Awa Matala aWanta atuñileñawu swayi-swayi ahanini wunsahu mumaluña muyadiña nakuyituñilawu. Chakutalilahu, hachipapilu chansañu chamuSpain, hadiñi mutu wakwila nawu “Chikuhwelelu chinatuntululi jimpidi.” Kuhosha hamudimu wakutuña Itala daWanta mumbaka yaMartos, china chipapilu chehwili nawu: “Chumanyi chaleñela akwakuzata  mukudikeñela afuma kumaluña amboka [muSpain] ayi kuMartos nakutuña itala dinatuñiwu swayi-swayi munjila yayiwahi, mukanu kaayi mudi antu asweja kudikeña?” Achina chipapilu chakwili ilu lwihu namazu aChinsahu wazatiliku mukudikeñela wahosheli nindi: “Tunazati mudimu wamuchidiwu muloña wakwila Yehova diyi watudizishaña.”

8. Progiramwinyi yayiha yetejeli Izanvu Dalombolaña mu 1999, nawa muloñadi?

⁸ Chamanineña yaaka yamuma 1900, antu ahwilili mukuloñesha kwaYehova mumaluña mwekala amanakwetu ahutwa. Yipompelu yamumaluña wenawa yazatili hakumina ñovu jawu hakutuña matala akupompelamu. Mumatuña amakwawu aYinsahu adiña nakuyidiwula nikuyisekesha muloña wakwila Matala aWanta adiña ashikilamu wanyi kwesekeja namatala amakwawu akudifukwilamu. Hela chochu, mu 1999, Izanvu Dalombolaña detejeli progilamu yakutuña Matala aWanta mumatuña ahutwa. Matuña aheta aheni mali kulonda kwikali “kwesekana.” (Tañenu 2 Akorinda 8:13-15.) Nawa amanakwetu nihela akumatuña acheñi adiheni kuzata iwu mudimu mukudikeñela.

9. Mudimwinyi wamwekeni kukola, ilaña awuzatili ñahi?

⁹ Hatachi iwu mudimu wamwekeni kukola. Chileji chamu 2001 chamwekesheli nawu mumatuña ahutwa akushika ku 88, mwakeñekeleña Matala aWanta akubadika 18,300. Iwu mudimu wakala wanyi muloña spiritu yaNzambi niMwanta wetu Yesu Kristu nakutukwasha. (Mat. 19:26) Muyaaka 15 hohu, kufuma mu 1999 nakushika mu 2013, antu  jaNzambi atuña Matala aWanta akushika ku 26,849 muniyi progilamu. * Yehova natwalekihu kukiswila mudimu wakushimwina chakwila mu 2013, kwakeñekeleña Matala aWanta akushika ku 6,500 mumatuña ahutwa, nawa chayinu mpinji kunakukeñeka Matala aWanta amavulu nankashi hachaaka nichaaka.

10-12. Indi mudimu wakutuña Matala aWanta wunakuleta ñahi kalemesha hejina daYehova?

¹⁰ Indi kutuña Matala aWanta amaha kwaleta ñahi kalemesha hejina daYehova? Chileji chafumini kukasanji kamutayi kakuZimbabwe chashimwini nawu: “Chimwahita kakweji kamu kufuma hakutuña Itala daWanta dadiha, antu enzaña nakupompa avulilañaku.” Mumatuña amavulu antu akeñaña wanyi kwinza nakupompela hamu nanetu ilaña enzaña neyi tunatuñi itala dadiwahi dakudifukwilamu. Ilaña chatuñawu Itala daWanta, denzalaña chakwila kwakeñekaña cheñi dikwawu. Hela chochu, antu hiyenzaña kudi Yehova muloña walubanji lwetalaku. Kukeña kwalala kwawakwaKristu kwamwekeshañawu antu atuñaña awa matala dikwaleñelaña antu kwinza mukuloñesha kwindi. Shinshikenu yakutalilahu yantesha.

¹¹ Indonesia. Iyala wumu wamweneña chatuñileñawu Itala daWanta chelukiliyi nindi akwakutuña hiyakwakudihana hohu, wahosheli nindi: “Enu antu mwahayamishaña chikupu! Namoni wejima wenu chimwazataña namuchima wumu namuzañalu hela chakwila hiyayifwetañaku. Namoni kwosi kuloñesha kukwawu kwawakwakwitiya kudi neyi kwenu.”

¹² Ukraine. Mumbanda wumu wadiñi nakuhita munjila yatuñilileñawu Itala daWanta ifuku nifuku wamweni nindi akwakuzata hiyaYinsahu jaYehova nawa adiña nakutuña Itala daWanta. Dichi wahosheli nindi: “Natiyili nsañu yawaYinsahu jaYehova kudi mwanyikami wamumbanda wekala Chinsahu chaYehova. Chinamweni iwu mudimu wakutuña, nafuukwiluhu nami inakukeña kudiza hadi Nzambi munidi itala. Namoni antu chamwekeshañawu kukeña.” Iwu mumbanda wetejeli kudiza Bayibolu nawa amupapatishili mu 2010.

13, 14. (a) Chumanyi chimunadizili kuchuma cheliluwu antu adisumbula hanyima yakumona yuma yamwekeneña hampinji yatuñileñawu Itala daWanta? (b) Chumanyi chimunateli kwila kulonda itala denu dakudifukwila dileteña kalemesha hejina daYehova?

¹³ Argentina. Antu adisumbula amuwanini manakwetu wadiñi nakulombola mudimu wakutuña Itala daWanta. Iyala wahosheli nindi, “Twadiñi nakutala mudimu wakutuña Itala daWanta, dichi . . . tunafuukuli netu tudizi hadi Nzambi munidi itala.” Dichi wehwili nindi, “Chumanyi chitwatela kwila kulonda twinzeña nakupompa hanu?” Awa antu adisumbula etejeli kudiza Bayibolu nakuhosha nawu chiña chisaka chejima nichena achidizisheña. Amanakwetu atiyili kuwaha hakuyileja mwenimu.

¹⁴ Hadaha himwadiña nakukooleka kwakutuña Itala denu daWantaku, ilaña munateli kwila chuma chinateli kukwasha Itala denu daWanta nawa chumichi chinateli kuleta  kalemesha hejina daYehova. Chakutalilahu, munateli kuzata nañovu chikupu kutambika atudizi enu aBayibolu, antu imwafuntilañaku niantu amakwawu amwiluña denu kwinza nakupompa nenu Mwitala daWanta. Mukweti cheñi kukooleka kwakuzataku mudimu wakuwahisha iluña denu dakupompela. Neyi mutanjika chiwahi, munateli kuhana yawaana yakuzatisha hakwakamena Itala denu daWanta hela kuhana yawaana yakutuñila Matala aWanta mumaluña amakwawu amukaayi kejima. (Tañenu 1 Akorinda 16:2.) Nyidimu yejimiyi yashimekaña ijina daYehova.

15-17. (a) Hiyanyi azataña mudimu weneni wakutuña? (b) Chumanyi chimunadizili kumazu ahosheluwu antu adisumbula adihana kuzatila kumatuña acheñi?

¹⁵ Amanakwetu niahela amunowu maluña diwu azataña mudimu weneni wakutuña Matala aWanta, Matala Akupompelamu kupompa kwamaneni, nitusanji twanyitayi. Hela chochu, avula kuyikwasha kudi amanakwetu niahela akumatuña ambokamboka akuluka yitembi mumudimu wakutuña. Awa akwakuzata mukudikeñela amakwawu aloñeshaña chiwahi chihandilu chawu kulonda ayi nakuzatila kumatuña acheñi hanyilungu yayivulu. Amakwawu adihanaña kuzata hayaaka yayivulu kufuma kwiluña dimu nakuya kudikwawu.

¹⁶ Kuzata mudimu wakutuña kwiluña dacheñi hikwapelaku ilaña mwafumaña nkisu. Chakutalilahu, Timo naLina, azatahu dehi mudimu wakutuña Matala aWanta, Matala Akupompelamu kupompa kwamaneni, nitusanji twanyitayi kumatuña amuAsia, muEurope, nimuSouth America. Timo wahosheli nindi, “Hayaaka 30 yinahitihu, anhimpaña hanyima yakuzatila mwiluña dimu hayaaka yiyedi.” Lina, wunashakami muwulu naTimo hayaaka 25 wahosheli nindi:  “Tunazati naTimo mumatuña ambokamboka akushika kwiikumi. Mwahitaña mpinji yeneni hakwila winjilili yakuda yambukaku, iluña dadiha, idimi dadiha, iluña dakushimwinamu dadiha nikukwata mabwambu acheñi.” * Komana mudi yuma yayiwahi yafumamu? Lina wahosheli nindi: “Iku kukala kwekalaña nkisu yasweja chikupu. Tunamoni kukeña kwamwekeshañawu akwaKristu nikukeña kunamwekeshiyi Yehova hadetu. Tunadimweni cheñi chikaninu chaYesu chekala haMaku 10:29, 30 chakaniniyi atumbanji twindi chichinashikijewi. Tukweti amanakwetu, ahela niamama jetu amavulu.” Timo wahosheli nindi, “Twazañalalaña chikupu hakuzatisha wuswa wetu wutukweti hakukalakala mudimu wakutwala hambidi maheta aMwanta wetu.”

¹⁷ Darren naSarah, anazati mudimu wakutuña mumatuña amuAfrica, Asia, Central America, Europe, South America, nihayitutu yakuSouth Pacific, amona nawu anahetelimu chikupu. Hela chakwila amweni kukala, Darren washimwini nindi: “Hikukooleka kwakweni kwakuzatila hamu nawamanakwetu amumatuña ashiyashana mukaayi kejima. Namoni nami kukeña kutwamukeña Yehova kudi neyi mwonji watukasa wonsu wetu nakwikala anuñañana mukaayi kejima.” Sarah niyena wahosheli nindi: “Nadizi yuma yayivulu nankashi kudi amanakwetu akuyitachi yashiyashana. Chinamonaña kudihana kwadihanañawu kwankoleshaña kutwalekahu kumuzatila Yehova hakumina ñovu jami.”

18. Indi wuprofwetu wasonekawu haMasamu 110:1-3 wunakushikijewa ñahi?

¹⁸ Mwanta Davidi waprofweteli nindi hela chakwila antu akayuulañawu kudi Wanta akamona kukala kwakuvulu, ilaña ‘akadihana namuchima wumu’ hakuzata yuma yaWanta. (Tañenu Masamu 110:1-3.) Ejima azataña muniwu mudimu wakukwasha Wanta, anakushikija awa mazu awuprofwetu. (1 Kor. 3:9) Tusanji twanyitayi twatuvulu, Matala Akupompelamu Kupompa Kwamaneni amavulu, niMatala aWanta amavulu atuñawu mukaayi kejima hiwunsahu wunakumwekesha nawu Wanta waNzambi walala nawa wunakuyuula. Tukweti kukooleka kweneni kwakumuzatila Mwanta Yesu Kristu mumudimu waletaña kalemesha hadi Yehova.