FWIKIJENU munakukumuna mukabu wawuwahi kumutondu. Himukwepula kadivumba kakawahi kaniwu mukabu henohu kanda muwushi mubasiketi. Munazati hadi maora amavulu ilaña munazeyi wanyi, munakukeña kutwalekahu kuzata. Amama yenu anemani kumutondu wudi kwakwihi, anazañalali nawa anakuzata chiwahi nakuhanjeka nawantaña jenu nimabwambu iku anakuyikwashaku kukumuna nyikabu. A mama yenu anakumwekana wansi neyi mwanuka chimwayimweneña kunyima himwachidiña kansi. Munahayami hakuyimona chashinakajiliwu mwituña dadiñaku. Mwayimweni chakabakeneñawu nayikatu, hadaha ayifwilili nimumakasa hampinji nawa mwadilili nankashi kumajamu. Ilaña ichi mudi hamu, nawantu amavulu, amomi nawa akola.

Tuneluki netu, mpinji yamuchidiwu yinakwinza. Tuneluki muloña Nzambi washikijaña yikaninu yindi. Muchinu chibalu, tukuhanjeka hayikaninu yaWanta yikwawu chiyakashikijewa kumbidi kushika nikunjita yaAmagedoni. Tukuhanjeka cheñi hayikaninu yikwawu yayiwahi yaWanta yakashikijewa hanyima yaAmagedoni. Twakazañalala chikupu hakumona Wanta waNzambi chiwakayuulaña iseki dejima nikubalumuna yuma yejima kwikala yayiha.