1, 2. (a) Wunsahwinyi wamwekeshaña nawu Mwanta wetu nakuyuula kufuma mu 1914? (b) Yumanyi yitukuhanjekahu mukanu kapetulu?

CHIKUHWELELU chetu chinakoli chikupu hampinji yitunashinshikeña hayuma yinakoñi Wanta waNzambi mukachi kawayilumbu aWanta. (Mas. 110:2) Mwanta wetu napompeshi akwakushimwina amavulu adihana. Nayitookeshi kulonda nayilwilu yayiwahi nawa adifukuleña munjila yayiwahi. Hela chakwila ayilumbu aWanta afwilaña kutwambula, twekala anuñañana nawamanakwetu mukaayi kejima. Iyi yuma niyuma yikwawu yayivulu yitunahanjekihu yinakoñi Wanta yinakuhana wunsahu wunakumwekesha nawu kutachika tuhu mu 1914, Mwanta wetu nakuyuula mukachi kawayilumbu aWanta.

² Katataka tuhu Wanta wili yuma yakuhayamisha. Wanta ‘wunakwinza’ ‘nakuhumona puchi puchi nikunoñesha’ ayilumbu aWanta ejima. (Mat. 6:10; Dan. 2:44) Ilaña henohu iyi mpinji kanda yishiki, kwakamwekana yuma yikwawu yalema. Yumanyi? Wuprofwetu wawuvulu wamuBayibolu wakula ilu lwihu. Tushinshikenu hawuprofwetu weniwu kulonda twiluki yuma yikatumwekena kumbidi.

3. Chumanyi chikatachika kumwekana chitunakutalila?

³ Kubidika nawu “Kuwunda nikukiñewa.” Hakuyisonekela Atesalonika, kapostolu Pawulu washimwini chuma chikatachika kumwekana chitunakutalila. (Tañenu 1 Atesalonika 5:2, 3.) Muniwu mukanda Pawulu watena “ifuku daYehova” nindi, dakatachika nakulukuka “Babiloni muneni.” (Chim. 17:5) Hela chochu, henohu ifuku daYehova kanda, anlomboli amukaayi akahoshaña nawu, “kuwunda nikukiñewa!” Hadaha akabidika hohu kamu indi kwiji akabidika kakavulu nawu kuwunda nikukiñewa. Komana anlomboli amunsakililu niwena akabidikaña? Chineli niwena ekala ampata yamunu mwishina, hadaha niwena akadibomba nawanlomboli amukaayi nakubidika nawu, ‘Kwamwena!’ (Yere. 6: 14; 23:16, 17; Chim. 17:1, 2) Iyi mbila yakuwunda nikumwena diyakamwekesha nawu ifuku daYehova keña ditachiki. Ayilumbu jaWanta waNzambi “hiyakapuluka nihantuku.”

4. Wulokwinyi wutukatambwila wekala muwuprofwetu waPawulu wambila yakuwunda nikumwena?

⁴ Wulokwinyi wutunateli kutambwila neyi twiluka mwatalisha iwu wuprofwetu? Pawulu wahosheli nindi: “Himwekala mumwidima chakwila odu ifuku dikayishintakeshi neyi amakombiku.” (1 Tesa. 5:3, 4) Kwambukaku nawantu ejima, twelukaña yuma yinakumwekana kuyinakuya. Indi iwu wuprofwetu wahosha hakuwunda nikumwena wukashikijewa ñahi? Twatela kutalila kulonda tukamoni yuma yikamwekana. Dichi, “tutoneña nikuhemba yitoñojoka yetu.”—1 Tesa. 5:6; Zef. 3:8.

5. Chumanyi chikaleñela “lukadi lwasweja” kutachika?

⁵ Kulukuka nsakililu. Anukenu Pawulu wasonekeli nindi: “Mpinji chiyakashika hakahoshawu nawu, ‘Kuwunda nikukiñewa!’ hohenohu kujilumuka kwakayishikena.” Neyi chochelaña nvula neyi yinadidimi, halondelaña kukenashana, dichakekala nihakabidikawu nawu “Kuwunda nikumwena!” hohenohu “kujilumuka kwakayishikena.” Chumanyi chakajilumunawu? Akasambila kujilumuna “Babiloni Muneni,” wanta wamukaayi kejima wansakililu yakutwamba, watenañawu cheñi nawu “chivumbi.” (Chim. 17:5, 6, 15) “Lukadi lwasweja” lukatachika hakajilumunawu Kristendomu nimazanvu amakwawu ansakililu yakutwamba yejima. (Mat. 24:21; 2 Tesa. 2:8) Chumichi, chakashintakesha antu amavulu. Muloñadi? Muloña haniyi mpinji, chivumbi wukadimonaña nindi ‘himwanta wamumbanda’ ‘wakabula kumona kuneña.’ Ilaña kudisamba kwindi kwakekala kwakapinji kantesha. Akashikena dakumujilumuna, neyi kwiji “mwifuku dimu.”—Chim. 18:7, 8.

6. Hinyi wakamulukuka “Babiloni Muneni”?

⁶ Hinyi wamba kamulukuka “Babiloni Muneni”? “Kanyama” wukweti “nseñu ikumi.” Mukanda waChimwekeshu washimuna nawu iwu kanyama diyi United Nations (UN). Nseñu ikumi jemenañaku matuña ejima akweti ñovu amapolitiki amakonu anakukwasha ‘kanyama kachinana.’ (Chi. 17:3, 5, 11, 12) Kujilumuka kwindi kukekala ñahi? Matuña ahakwilañaku UN yikapupa maheta achivumbi, akamuda nawa “akamwocha wejima chikupu nakesi.”—Tañenu Chimwekeshu 17:16. *

7. Indi mazu aYesu adi haMatewu 24:21, 22 ashikijeweli ñahi mu 66 C.E. nawa akashikijewa ñahi kumbidi?

⁷ Kukehesha mafuku. Mwanta wetu washimuna yuma yakamwekana halukadi lwasweja. Yesu washimwini nindi: ‘Akayihihisha owu mafuku muloña wawantu atondewa.’ (Tañenu Matewu 24:21, 22.) Mazu aYesu ashikijeweli katachi mu 66 C.E. chelili ‘Yehova yakeheshi mafuku’ hampinji yalukukiliwu Yerusalema kudi amashidika awaRoma. (Maku 13:20) Chumichi chaleñeleli akwaKristu adiña  muYerusalema nimuYudeya apuluki. Chumanyi chikamwekana mukaayi kejima hampinji yalukadi lwasweja lunakwinza? Yehova kuhitila mudi Mwanta wetu, ‘wakamukehesha’ kulukuka kwaUnited Nations kwakulukuka nsakililu kulonda nsakililu yalala akabuli kuyijilumwina hamu nayakutwamba. Hela chakwila nsakililu yakutwamba yejima akayijilumuna, ilaña nsakililu yalala akayijilumuna wanyi. (Mas. 96:5) Tutalenu ntahi hayuma yikamwekana neyi lukadi lwasweja lunamani.

8, 9. Yesu watela watalishileña kuchumanyi chekomwesha nawa antu akeladi nayuma yakamonawu?

⁸ Wuprofwetu waYesu wahosha hamafuku akukuminina wamwekeshaña nawu kwakamwekana yuma yayivulu yamaneni henohu Amagedoni kanda yitachiki. Yuma yiyedi yatachi yitukuhanjekahu ayitena munyikanda yaNsañu Yayiwahi yaMatewu, Maku niLuka.—Tañenu Matewu 24:29-31; Maku 13:23-27; Luka 21:25-28.

⁹ Yuma yikamwekana mwiwulu. Yesu washimwineñahu dehi nindi: “Itena dakeyila bwi-i, kakweji kakatoñeka wanyi, tutumbwa twakaholoka kufuma mwiwulu.” Antu hiyakayaña kudi akulumpi jansakililu nawu ayileji mwakwililaku, muloña hiyakayikuhwelela cheñiku. Komana Yesu watalishili mukwila nindi mwiwulu nimwena mwakamwekana yinjikijilu? Hadaha. (Isa. 13:9-11; Yoweli 2:1, 30, 31) Antu akela ñahi nayuma yikamonawu? “Akekala muyihuñu” muloña “hiyakeluka mwakwililaku.” (Luka 21:25; Zef. 1:17) Eña, ayilumbu jaWanta waNzambi, kutachikila kudi ‘anyanta kushika nikudi anduñu,’ “akahwidijela nawoma, nakutalila yuma yidi nakwinza” nawa akatemuka nawu abatami. Ilaña hiyakawana iluña dakuswama kuzuwa kwaMwanta wetuku.—Luka 21:26; 23:30; Chim. 6:15-17.

10. Yesu wakasompesha ñahi, nawa antu ahakwilañaku niadikañaña naWanta waNzambi akela ñahi?

¹⁰ Mbila yakusompesha. Ayilumbu jaWanta waNzambi ejima akayikanjikija kulonda akadimweni yuma yikayileñela akakabi nankashi. Yesu wahosheli nindi: “Akamona Mwana kamuntu nakwinza mumavu nañovu yasweja nikulema.” (Maku 13:26) Yinjikijilu yakamwekesha nawu Yesu nenzi nakusompesha. Muwuprofwetu wowumu wahosha hamafuku akukuminina, Yesu wahosheli nsañu yayivulu kutalisha hawunsompeshi wakashimunawu haniyi mpinji. Iyi nsañu twayiwanaña muchishimu chawanyikoku niampembi. (Tañenu Matewu 25:31-33, 46.) Antu ahakwilañaku Wanta waNzambi akayisompesha nawu “anyikoku” nawa ‘akabandula nyitu yawu,’ nakwiluka nawu ‘wamwinu wawu wunaswini kwakwihi.’ (Luka 21:28) Ilaña antu adikañaña naWanta akayisompesha nawu “ampembi” nawa ‘akadineña makumbu’ chakelukawu nawu ‘akayijilumuna haya nyaka.’—Mat. 24:30; Chim. 1:7.

11. Yumanyi yitwatela kwiluka kutalisha hayuma yikamwekana kumbidi?

 ¹¹ Yesu chakasompeshayi “nyuza yejima,” kwakamwekana yuma yameneni yayivulu henohu njita yaAmagedoni kanda yitachiki. (Mat. 25:32) Tukuhanjeka haniyi yuma yiyedi: kulukuka kwaGogi nikupompesha awayishewa. Chitukuhanjekaña haniyi yuma yiyedi, twatela kwiluka netu Izu daNzambi hidashimuna mpinji yayeni yikamwekana yumiyiku. Kafwampi, chinamwekani neyi chuma chikwawu chikatachika henohu chikwawu kanda chimani.

12. Chumanyi chikamwekana hampinji yikalukukayi Satana Wanta?

¹² Kulukuka. Gogi wakuMagogi wakalukuka awayishewa ashalahu niakwawu anyikoku acheñi. (Tañenu Ezekeli 38:2, 11.) Satana chakalukukayi Wanta wunakuyuula, diyi njita yikalwayi yakukumishaku kufuma hampinji yatachikiliyi kulukuka awayishewa kufuma hamunatiliwu hamaseki. (Chim. 12:7-9, 17) Sweje-e hampinji yatachikiliwu kupompeshawu awayishewa muchipompelu chawakwaKristu chatookesheliwu, Satana wafwilileña kukisañana kunuñañana kwawu, kukeñañana kwawu nikuyikañesha kwiluka Izu daNzambi, ilaña wakañanya. (Mat. 13:30) Hela chochu, hampinji yakajilumunawu nsakililu yakutwamba yejima, antu jaNzambi akamwekana neyi “ashakama chakadi mpwembu hiyakweti hela nyikomenu hela yenzeluku,” Satana wakakoolekela aka kapinji. Wakasañumuna nfulumendi jawantu kulonda jakalukuki antu ahakwilañaku Wanta.

13. Indi Yehova wakamwina ñahi antu jindi?

¹³ Ezekeli walumbulula chuma chikamwekana. Hakumutena Gogi, wuprofwetu wahosha nawu: “Wakafuma muchipela cheyi oku kukabeta kakuchimunswa kwakweni, nineyi ninyuza yawantu yayivulu hamu naneyi, wejima wawu adi nakwendela hatuwalu hohu, chendu cheneni nanjita yasweja kuvula. Wakakanduka nakulwa nawantu ami.” (Ezek. 38:15, 16) Indi Yehova wakeladi chakalukukawu antu jindi akamwekana neyi hiyadi mumpwembuku? Yehova nindi, “kulendumuka kwami kwakamwekana nikumesu ami. Nakamutambikila mpoku yakabali.” (Ezek. 38:18, 21; tañenu Zekariya 2:8.) Yehova wakamwina ambuñindi ahamaseki. Kwamwina kweniku diyi njita yaAmagedoni.

14, 15. Chumanyi chikwawu chikamwekana henohu Satana kanda yalukuki?

¹⁴ Henohu kanda tuhoshi nsañu yayivulu yahosha hadi Yehova chikamwinayi antu jindi hanjita yaAmagedoni, tusambilenu kushinshika hachuma chikwawu cheneni. Chumichi chikamwekana hampinji yikatachikayi Satana kulukuka antu jaNzambi nihampinji yakatachikayi Yehova kwamwina antu jindi hanjita yaAmagedoni. Neyi chitwamona muparagilafu 11, ichi chuma chamuchiyedi hikupompesha awayishewa ashalahu.

¹⁵ Kupompesha awayishewa. Mwayedi wawu aMatewu niMaku asonekeli nsañu yahosheli Yesu hadi “atondewa,” dikwila nawu akwaKristu awayishewa naspiritu nawu akekala  hakachi kayuma yikamwekana henohu Amagedoni kanda yitachiki. (Talenu paragilafu 7.) Hakuditena yomweni hakekalayi Mwanta, Yesu waprofweteli nindi: “Wakatemesha añelu nawa akapompesha hamu antu indi atondewa kufuma kuyibalu yiwana, kufumisha kunsa yeseki ndo-o kushika nikunsa yewulu.” (Maku 13:27; Mat. 24:31) Yesu nakutena kupompesha kwamuchidinyi? Bayi neyi nakutena kulamika kwakukumisha kwawakwaKristu awayishewa ashalahu, kwamba kazatika henohu lukadi lwasweja kanda lutachikiku. (Chim. 7:1-3) Ilaña Yesu nakutena chuma chikamwekana, hampinji yalukadi lwasweja lunakwinza. Dikwila nawu hampinji yikatachikayi Satana kulukuka antu jaNzambi, awayishewa akekala hamaseki akayipompesha nakuyitwala mwiwulu.

16. Awayishewa akasañulawu akazataku mudimwinyi hampinji yanjita yaAmagedoni?

¹⁶ Indi kupompesha awayishewa ashalahu kwakundama ñahi kunjita yaAmagedoni? Mpinji yakayipompeshawu awayishewa ejima nakuyitwala mwiwulu yamwekeshaña nawu njita yaNzambi yaAmagedoni yikekala kanda yitachiki. Chakayawu mwiwulu, awayishewa a 144,000 akayuulaña hamu naKristu akayinka ñovu yakwasa hamu naYesu “mbwechi yachikuñu” yakujilumuna nachu ayilumbu jaWanta waNzambi ejima. (Chim. 2:26, 27) Kuhiñahu, añelu asweja ñovu hamu nawawayishewa akasañulawu akamulondela Kristu, Mwanta Wanjita, hampinji yakalukukayi ‘amashidika asweja kuvula,’ ayilumbu anakukeña kulukuka antu jaYehova. (Ezek. 38:15) Yesu chakayilukukayi ayilumbu, diyi mpinji yakatachika njita yaAmagedoni.—Chim. 16:16.

17. Yumanyi yikayimwekena antu akasompeshawu neyi “ampembi” hampinji yaAmagedoni?

¹⁷ Mpinji yakujilumuna. Chakatachika njita yaAmagedoni dihakamana lukadi lwasweja. Hayina mpinji, Yesu wakakoña mudimu wukwawu. Kubombela hamudimu wakwikala Nsompeshi “wanyuza yejima,” Yesu wukekala cheñi Mukwakujilumuna nyuza, dikwila nawu antu ejima akasompeshayi nindi “ampembi.” (Mat. 25:32, 33) Mwanta wetu wakazatisha “mpoku yakabali yayilehi yatwa” “yakutapa nachu akwanyuza.” Antu ejima adi neyi ampembi, kutachika tuhu ‘nawanyanta’ kushika nikudi “anduñu” “akayijilumuna haya nyaaka.”—Chim. 19:15, 18; Mat. 25:46.

18. (a) Yuma yikahimpa ñahi kudi antu akasompeshawu neyi “anyikoku”? (b) Yesu wakamanisha ñahi kushinda?

¹⁸ Yuma yikahimpa chikupu kudi antu akasompeshawu neyi “anyikoku.” Chatela ayishindi kudi amashidika aSatana amavulu adi neyi “ampembi,” “izaza deneni” ‘dawanyikoku’ dikamwekana neyi didana wakuyikiña, dakapuluka hampinji yakadilukukawu kudi ayilumbu nawa ‘dakafuma mulukadi lwasweja.’ (Chim. 7:9, 14) Kuhiñahu, neyi Yesu nashindi nawa nafumishihu dehi ayilumbu jaWanta waNzambi ejima,  wakamumbila Satana niandemoni jindi mwikela. Akayihembela mwikela mwakekalawu neyi anafwi, hadi yaaka 1,000.—Tañenu Chimwekeshu 6:2; 20:1-3.

19, 20. Tunateli kuzata ñahi yuma yitwadizilaña kumazu ekala haIsaya 26:20 ni 30:21?

¹⁹ Twatela kudiloñesha ñahi kumona yuma yekomwesha yikamwekana heseki? Yaaka yinahituhu, Kaposhi Kakutalila kahosheli nawu: “Kupuluka kukashindamena hakwovwahila.” Muloñadi? Twawanaña ñakwilu mukusoñamisha kwayisoñamishiliyi Yehova aYudeya adiñi muwuduñu muBabiloni wakunyaaka. Yehova washimwineñahu dehi nindi Babiloni akamulukuka, hanu dinu antu jaNzambi ateleleli kwiladi kulonda adiloñeshi nachuma chikamwekana? Yehova wayilejeli nindi: ‘Enu antu ami inzenu, mwiñili mumatalenu, mudenzelelimu; batamenu kampinji kanti, sampu ndombu yinahiti.’ (Isa 26:20) Talenu nhoshelu yakwila nawu: “Inzenu,” “mwiñili,” ‘enzelenu,’ “batamenu,” nhoshelu yejimiyi yinakumwesha nawu hinshimbi jatela kulondelewa. A Yudeya ovwahilili iyi nshimbi ashakamini mumatalawu chakubula kuya munyikwakwa mwadiñi amashidika alukukileña. Mwamweni, apulukili muloña ovwahilili nshimbi jayilejeliyi Yehova. *

²⁰ Yumanyi yitunadiziliku? Ninetu twamba kapuluka muyuma yikamwekana kumbidi neyi tukwovwahilaña nshimbi jaYehova neyi chovwahililiwu ambuña Nzambi akunyima. (Isa. 30:21) Atulejaña nshimbi jeniji kuhitila muyipompelu. Dichi twatela kwovwahila wunlomboli wutwatambwilaña chakufuma hanyichima. (1 Yow. 5:3) Neyi tukwovwahilaña chayinu mpinji, chikekala chaswayi kumbidi nawa akatukiña kudi Tata yetu, Yehova, niMwanta wetu Yesu. (Zef. 2:3) Nzambi chakatukiñayi muniyi njila, twamba kadimwena Wanta waNzambi chiwakafumishahu ayilumbu jaWanta. Hitwamba kavulamena chumichiku!