1. Kwitiya kwamuchidinyi kwekala muAfrica?

KWAKWIHI namuntu wudi wezhima muAfrica wetezhaña nindi chekala chalema nankashi kudifukula kudi Nzambi. Ilaña, kudi kubula kutiyashana kwantesha hohu hanochatelawu kudifukulawu kudi Nzambi. Antu amakwawu adifukwilaña mumosque, amakwawu niwena ayaña nakudifukula kunyiyombu. Amakwawu niwena ayaña kuchipompelu. Ilaña chikwikala chaluwa kutoñozhoka netu muAfrica mudi hohu nyichidi yisatu yakwitiya. Hakachi kawa Moslemu, akweti nshimbi nitushidikilu twamboka-mboka. Yisemwa yakumina dakwamboka-mboka kwesekezha nakushiyashana kwamaluña. Mukachi kayipompelu yawantu aditenaña kwikala eniKrisitu, himudi kutiyashana kweneniku. Kufumishaku yipompelu yamaneni, kudi cheñi yipompelu yayivulu yadimena muAfrica yezhima.

2. (a) Chumanyi chakozhezhaña kakavulu muntu kwikala muchipompelu mwetiyayi? (b) Chumanyi chabulaña kumwekesha nawu kwitiya kwetu kwetezhewa kudi Nzambi?

² Muloñadi antu chiyadifukwilañawu neyi chiyanakwilawu? Antu amavulu etiya muyipompelu mwekala anvwali zhawu. Yuma yamwekeni kunyaka niyena yinakukozhezha antu kwitiya muyipompelu mwetiyawu makonu. Mukanda waThe Africans—A Triple Heritage wahoshaña nawu: “Amoslemu akumina dakutanda kabeta kaluwunda kaSahara kuhitila mukushinda, . . . WuKristu niwena watanda kabeta kambwela kaSahara kuhitila munzhila yoyimu. Neyi kabeta kaluwunda kaSahara kawanishewa nawa Islamu kuhitila mukuzatisha mpoku yakabali,  wuKristu niwena watanda kabeta kambwela kaSahara kuhitila mukuzatisha mata.” Chochimu, wezhima wetu twakuhwelela netu kwitiya kwetu kwamuzañaleshaña Nzambi. Ilaña kwitiya hikunateli kwikala koloka nsañu yakwila nawu anvwali zhetu dimuyayañawuku, hela nsañu yakwila nawu muza wumu wañovu wakanjikizhili ankakulula zhetu kudifukula kudi wenaku.

3-5. Chitalilwinyi chinateli kutukwasha kumona kwila nawu bayi neyi nyichidi yezhima yakwitiya yatañishaña walalaku?

³ Hela chakwila nyichidi yezhima yakwitiya yakeñaña kuhana wunlomboli washikila wakuzatila Nzambi, yitoñozhoka yawu yambuka. Atañishaña yuma yayivulu yambuka hadi Nzambi ochekalayi ninochu chakeñañayi kudi etu. Toñozhokaku ichi: Desekezhi neyi wuneñili mudimu hakampani keneni. Hefuku dakutachika kuzata, akulezha nikulezha nawu mukulumpi wamudimu hosiyi, wudi hachilazhi chakunooka. Wuya ninakwihula ankoñi asatu kulonda akulezhi chiwatela kwila. Nkoñi watachi nindi mukulumpi wamudimu nakukeña nindi wukombi. Wamuchiyedi nindi wupenti wulombu kwitala. Wamuchisatu yakulezha nindi wutwali nyikanda.

⁴ Kulondelahu, wihula niankoñi chekalayi mukulumpi wamudimu. Nkoñi watachi yahosha nindi mukulumpi wamudimu wuchidi tuhu mukwenzi, wamulehi, nawa wazuwa. Nkoñi wamuchiyedi yahosha nindi hikashinakazhi, wamwihi, nawa wekala nawushona. Nkoñi wamuchisatu yakulezha nindi mukulumpi wamudimu bayi neyi hiyalaku—ilaña himumbanda. Chakubula nikuzhinoka, wukunkulula neyi awa ankoñi asatu hiyanakushimuna mwalalaku. Neyi wunakukeña kutwalekahu namudimu weyi wawuha, watela hekwawu kusanduzhola kulonda wiluki mukulumpi wamudimu hinyi nawa chumanyi chanakukeñayi eyi kwila.

⁵ Chochimu nakwitiya. Hamuloña wakwila kunekali ndizishilu yayivulu hadi Nzambi ochekalayi nichakeñañayi kudi etu, twatela kumona kwila nawu kudifukula kwetu kudi nakwendela hamu nawalala. Hanu dinu, munzhilanyi mutunateli kudizila walala hadi Nzambi?