1. Kwesekezha Nezu daNzambi, nyichidinyi yiyedi yakwitiya yekalaku?

“IÑILENU kuchinsu chanyanya,” dichahosheliyi Yesu, “muloña chinsu cheneni, ninzhila yabwambañana yaya kukuzhilumuka, mweñilaña amavulu. Muloña chinsu chanyanya, ninzhila yaya kuwumi, ayimonaña antesha.” (Matewu 7:13, 14) Kwesekezha Nezu daNzambi, kudi hohu nyichidi yiyedi yakwitiya: kumu kwakutwamba, kumu kwalala; kumu kwaloña, kumu hikwaloñaku; kumu kwalombolaña kuwumi, kumu kwalombolaña kukuzhilumuka.

2. Nsona zhinakumwekesha ñahi nawu bayi neyi nyichidi yezhima yakwitiya yamuzañaleshaña Nzambiku?

² Antu amakwawu atoñozhokaña nawu kwitiya kwezhima kwamuzañaleshaña Nzambi. Awa mavasi amuBayibolu analondelihu anakumwekesha nawu hidimuku:

• “Anyana kaIsarela elili cheñi chatama kumesu aYehova, apesheli aBayali, niaAshitoreti, niakishi akuSiriya, niakishi akuZidoni, niakishi akuMowabi, niakishi awanyana kaAmoni, niakishi awaFwilistinu; Yehova amulekeli, hiyamukalakeleluku. Yehova wazuwili nawaIsarela.” (Ansompeshi 10:6, 7) Neyi tukupeshaña akishi hela tunzambi twacheñi tushiya Nzambi walala, Yehova hakutwitezhaku.

• “Antu awa alemeshaña [Nzambi] nanyivumbu yawu, ilaña nyichima yawu yidi kwakulehi nanami. Komana chadifukulañawu kudami, hikudifukula kwamukunkulwayi, chalezhañawu yizhila yawantu.” (Maku 7:6, 7) Neyi antu akuditena nawu twadifukulaña kudi Nzambi ikwenda atañisha maana awu, chatela kutañisha maana amuBayibolu, kudifukula kwawu kwamukunkulwayi. Hikwetezhewa kudi Nzambiku.

• “Nzambi hiSpiritu; akudifukula kudi yena chiña adifukulaña chalala muspiritu.” (Yowanu 4:24) Kudifukula kwetu chiña kwendelaña hamu nawalala Wezu daNzambi.

3. Nzhilanyi yimu yakwambwilaku kwitiya kwalala nikwakutwamba?

³ Tunatweshi kwiluka ñahi netu kwitiya kwamuzañaleshaña Nzambi hela hikwamuzañaleshañaku? Yesu wahosheli nindi: “Dichi nyitondu yayiwahi yezhima yasoñaña nyikabu yayiwahi, ilaña mutondu watama wasoñaña nyikabu yatama . . . Dichi dinu mukuyilukila kunyikabu yawu.” Mumazu amakwawu, neyi kwitiya kwafuma kudi Nzambi kwasoñaña nyikabu yayiwahi; ilaña neyi kwafuma kudi Satana, kwasoñaña nyikabu yatama.—Matewu 7:15-20.

4. Yililunyi yamwekeshañawu akwakudifukula kudi Yehova?

⁴ Kwitiya kwalala kwamwekeshaña antu akweti kukeña mukachi kawu, amwekeshaña nawa kukeña kudi antu acheñi. Ichi chinekali ñana muloña Yehova yomweni hiNzambi wakukeña. Yesu wahosheli nindi: “Neyi mukukeñañana, dihu hakayilukilawu antu ezhima nawu mudi atumbanzhi twami.” Indi kwitiya kwashikilamu ñahi munichi chipimu chakudifukula kwalala?—Yowanu 13:35; Luka 10:27; 1 Yowanu 4:8.

5. Indi encyclopedia yimu yalumbulula ñahi hansañu yakulanda nakulandulula kwawanduñu muAfrica?

⁵ Toñozhokenu hakulanda nakulandulula kwa wanduñu muAfrica. The New Encyclopædia Britannica yahosha nawu: “Kwakwihi nawantu 18,000,000 eniAfrica ayitwalili muwuduñu kuIslāmic trans-Saharan nikukaluñalwizhi kaIndian Ocean hakachi kayaaka ya 650 na 1905. Hakumana kwa nkulakazhi yanyaka 15, Akaputu atachikili kulanda nakulandulula kwawanduñu kumuzhika waAfrica. Hakumana kwachaka cha 1867 eniAfrica akushika hakachika 7,000,000 na 10,000,000 ayisendeli neyi anduñu kumatuña akuAmerica.”

6. Kwitiya kwadibombelimu ñahi munsañu yakulanda nakulandulula kwawanduñu?

 ⁶ Mbadinyi yazatili kwitiya hampinji yikwadiñi kukala muAfrica hasendeliwu amayala, ambanda, ninyana kufuma munyikala niyisaka yawu iku anayikasi mumaleñi, nakuyifundizheka yinjikizhilu nayikuñu yitaata, nikuyiladisha nakuyilanda neyi añombi? Bethwell Ogot wasonekeli muDaily Nation yaku Nairobi, Kenya nindi: “Ezhima wawu eniKristu niaIslamu atañishaña nakwitezha nawu antu atela kudikwata, hela chochu wezhima wawu diwu atachikili nsañu yawanduñu nakuyitandisha mudi antu nachambu. . . . Twatela kwitezha kuluwa kwadibombelimu aMoslemu nieni Kristu, hakachi kamatuña aKumuzhika niaKumusela, hayililu yatama yaletesheli kukala kweneni mudi eniAfrica hayaaka yayivulu.”

7. Antwamina zhayipompelu akoñeli mudimwinyi mumpinji yanzhita?

⁷ Kwitiya kwakutwamba kunamwekeshi nyikabu yachu yatoka munzhila zhikwawu. Chakutalilaku, henohu Bayibolu yahosha nawu “keñaku mukwenu,” ilaña antwamina zhayipompelu kunyeñumuka kaayi kezhima adibombamu chikupu nakunyamuna nikukwasha zhinzhita.—Matewu 22:39.

8. (a) Akulumpi zhayipompelu akolesheli ñahi kuzhahañana muAfrica mumpinji yanzhita? (b) Kapristu wumu wahosheli nindidi kutalisha hadi akulumpi zhayipompelu hampinji yadiñaku yikonkozhola mwituña daNigeria?

⁸ Chelukewa nawu muchaka cha 1994, ambanda adibomba muzha kwitiya niatupristu adibombelimu mukuzhaha antu mu Rwanda. Kwitiya nikwena kwazatili mudimu weneni mukukala kwekwawu kwamuAfrica. Chakutalilahu, hampinji kwadiña nzhita yamazanvu ambuka amwituña daNigeria, kwitiya kwakolesheleña tubadi twezhima tuyedi kulonda antu azuñeña. Nzhita chiyatwalekelihu, kapristu wumu wahosheli nindi akulumpi zhayipompelu “analeki mudimu wayinkawu  kudi Nzambi.” Wahosheli cheñi nindi: “Etu twaditenaña netu tuyankoñi zhaNzambi tunekali dehi ankoñi zhaSatana.”

9. Bayibolu yahoshahu nawudi kutalisha hadankoñi zhaSatana?

⁹ Bayibolu yahoshaña zhazhivulu kutalisha hayuma yoyimu nawu: “Satana wadifwikizhaña neyi kañelu kachezhezhi. Dichi neyi añamba zhindi akudifwikizha neyi akalakalaña nyidimu yaloña, hichuma chakalaku.” (2 Akorinda 11:14, 15) Neyi chochadifwikizhañawu antu atama kwikala chiwahi, Satana wadimbaña antu kuhitila mudi ankoñi amwekanaña neyi aloña ilaña nyidimu yawu yatama ninyikabu yawu yatoka.

10. Anlomboli zhayipompelu amukanaña Nzambi munzhilanyi?

¹⁰ Kunyeñumuka kaayi kezhima, akulumpi zhayipompelu atañishaña kukeña, kuwunda, nikuwaha, ilaña adibomba mukuhelañana, munzhita, nimukusekesha Nzambi. Bayibolu yayilumbulula chiwahi. Yahoshaña nawu: “Ahoshaña nawu twamwiluka Nzambi, ilaña [amukana, NW] [na]nyidimu yawu.”—Titusa 1:16.

11. Kwitiya kwakutwamba akwilumbulula ñahi muBayibolu?

¹¹ Twatela kwiluka chatoñozhokañayi Yehova hansañu yakwitiya kwakutwamba kuhitila mukutaña Bayibolu mumukanda waChimwekeshu. Kwitiya kwakutwamba akwilumbulula neyi mumbanda wachifwikizha, “Babiloni Muneni.” (Chimwekeshu 17:5) Talenu ochu Nzambi chamulumbululayi:

• “Chivumbi muneni . . . Anyanta ankanu aheseki aneli nindi wuvumbi.” (Chimwekeshu 17:1, 2) Chatela kumukuhwelela Nzambi, kwitiya kwakutwamba kwadiñizha munsañu zhamatuña nachiyulu nawa kakavulu kwalezhaña nfulumendi chakwila.

• “Mudi yena awenumu mashi awatuprofwetu niawakwakuzhila niawantu ezhima azhahiluwu hanu hamaseki.” (Chimwekeshu 18:24) Kwitiya kwakutwamba kwakabisha nikuzhaha ankoñi zhaNzambi amukuhwelela nawa kunazhahishi yihita yawantu munzhita.

• “Mwezhima mwadilemeshelañayi, nimwadiluñishilañayi [chakadi nsonyi, NW].” (Chimwekeshu 18:7) Kwitiya kwakutwamba kukweti maheta amavulu azatishañawu anlomboli zhindi mukudiluñisha.

• “Muloña wadimbili nyunza yezhima nakupanda [kwindi].” (Chimwekeshu 18:23) Muloña wakutañisha kwindi kwakutwamba nindi wumi hiwafwañaku, kwitiya kwakutwamba kunezununi chenzelu chanyichidi yezhima yakupanda niwulozhi. Kwitiya kwakutwamba nawa kwakoleshaña kuchina afu nikupesha ankakulula.

12. Kubabeshanyi kwahana Bayibolu kutalisha hansañu yakwitiya kwakutwamba?

¹² Bayibolu yahosha hakubilela kwakubabesha kwatiyakana kudi antu kulonda afumi mukwitiya kwakutwamba, nawu: “Enu antu ami, fumenumu muñadoyo, mubuli kutiyañana nanyiloña yindi, mubuli kutambula nindi yipupu.”—Chimwekeshu 18:4, 5.

13. Chumanyi chikamwekena kwitiya kwakutwamba ninowu ekalamu?

¹³ Katatakichi, Babiloni Muneni mwanta wetuña dakwitiya kwakutwamba, akamukisañana shitu. Bayibolu yahosha nawu: “Dichi chakenzhila yipupu yindi mwifuku dodimu, nikufwa, nikuneña, ninzala; akamushita nakesi bwi, muloña Yehova Nzambi wukumusompesha himukwañovu.” (Chimwekeshu 18:8) Hakwila nawu tubuli kutambwila nindi hamu yipupu yindi, twatela kwambukaku kuyililu yezhima yakwitiya kwakutwamba. Kuleka kudibomba muyililu yafwana neyi yidika niyaaku yikwawu yamuneñeshaña Nzambi. Iwu muloña wudi mukunyakashana. Wumi wetu wudi muwubanzhi!—2 Akorinda 6:14-18.