NZAMBI WAÑOVU YEZHIMA diyi Mwanta wakuleña kwezhima. Nshakaminu yetu, yamakonu hela yampinji yakumbidi, yashindamena hadi yena. Wukweti ñovu yakulambula nawa wukweti ñovu yakubabesha. Wukweti ñovu yakuhana wumi nawa wukweti ñovu yakuwikisañana. Neyi twikala etezhewa kudi yena, twakashakama chachiwahi; ilaña neyi tubula kwikala etezhewa kudi yena, twakayanda. Chikwikala chabadika kulema neyi kudifukula kwetu kukwikala kwetezhewa kudi yena!

Antu adifukulaña munzhila zhazhivulu. Neyi kwitiya kudi neyi nzhila, komana nzhila zhezhima zhakwitiyilamu azhitezha kudi Nzambi? Inehi, hizhetezhewaku. Yesu kaprofwetu kaNzambi walumbulwili nindi, kudi hohu nzhila zhiyedi. Wahosheli nindi: “Ninzhila yabwambañana yaya kukuzhilumuka, mweñilaña amavulu. Muloña chisu chanyanya, ninzhila yanyanya yaya kuwumi, ayimonaña antesha.”—Matewu 7:13, 14.

Kwekala hohu nyichidi yiyedi yakwitiya: kwatachi kwalombolaña kuwumi nikukwawu kwaya kukuzhilumuka. Nkeñelu yanonu buloshuwa yidi yakukwasha eyi kuwana nzhila yaya kuwumi wahaya nyaka.