1. Chumanyi chikumwekana neyi “tukundama kwakwihi naNzambi”?

YEHOVA wakeña owu amukalakelaña. Neyi wukudifukula kudi Yehova wukukiswila hayinu mpinji nawa wukakukiswila nikumpinji yakumbidi. Bayibolu yahosha nawu: “Kundamenu kwakwihi naNzambi, niyena wukukundama kwakwihi nanenu.”—Yakoba 4:8.

2. Munzhilanyi mutwatela kuswila kwakwihi naNzambi, nawa ichi chinatweshi kukuma ñahi kukulomba kwetu?

² Hakukudama kwakwihi naNzambi, watela kudiza nakwila mwahoshaña Izu dindi. Neyi wukulomba kwesekezha namwaya kukeña kwaYehova, niyena wukutiya nakukwakula kulomba kweyi. Kapostolu waweni Kristu Yowanu wasonekeli nindi: “Dichi chitukubula kumutiya woma [Nzambi], tukwiluka netu neyi tukulomba chuma chamwaya muchima windi, wukututiya. Neyi tuneluki netu watutiyaña mutukulomba mwezhima, tuneluki netu tunatambuli dehi yitunamulombi.”—1 Yowanu 5:14, 15.

3-7. Tunatweshi kuheta ñahi maana awuNzambi, nawa anatweshi kutukwasha munzhilanyi?

³ Kubombelahu, chiwakundama kwakwihi naNzambi, niyena wukukwinka maana akukwashaku hakukoña yuma yiwahumañanaña nayu mpinji yezhima muchihandilu cheyi. Bayibolu yashimuna nawu: “Mwinenu nabuli maana, alombi kudi Nzambi.”—Yakoba 1:5.

⁴ Maana akufuma kudi Nzambi anateli kukwasha ñahi? Chuma chimu, atela kukwashaku kwiluka yuma yabulaña kumuzañalesha Yehova. Cheñi wunateli kudiza muloña waweni iyi yuma chiyatamina nichiwatela kwila hakubula kuyikoña. Kwiluka kweniku kukuzhikilila kufuma kukukala kwakuvulu oku kwabulakanañawu antu ezhima. Chakutalilahu, kovwahila nshimbi yaNzambi yakwikala nayililu yayiwahi, yazhikililañaku antu zhaNzambi kubula kutambula mavumu akubula kukeña, nyisoñu yakusambula muwuvumbi, nimaluwi akadi muzañalu hela kudiseña.

⁵ Yumanyi yekwawu maana akufuma kudi Nzambi chiyanatweshi kukwilila? Anateli kukuhetesha muwumi weyi. Anateli kukwashaku kusakula kufukula kwakuwahi muyuma yiwafwilaña kwila, yafwana neyi chakuzatisha mali. Wukatwesha kwila yuma yalumbwa nakuleka kufukula kwila yuma yamukunkulwayi.

⁶ Maana awuNzambi anatweshi kukwashaku cheñi chiwatela kudikunda nawantu acheñi. Wunatweshi kwikala nachisaka chamuzañalu mukuhanda kweyi. Wunatweshi kutwalekahu kukolesha wubwambu walala nawantu, nawa anatweshi nikukwinka kalemesha kudi owu abulaña kumuzatila Nzambi.

⁷ Kubombelahu, kwikala namaana awuNzambi kukahimpa nshakaminu yamuchihandilu cheyi. Akukwashaku kushinda makabi muwumi weyi nisonyi yakutiyishañawu. Cheñi nawa, wakekala nakashinshi kashikilamu kakushinshika hayuma mumpinji yakumbidi. Kushinshika kwakuwahi kunatweshi kubombelahu yitoñozhoka yeyi yayiwahi nimuzhimba wakadi kukata-kata.—Yishimu 14:30; Isaya 48:17.

8. Neyi wakalakelaña Nzambi, chumanyi chuwukubula kuchina?

⁸ Neyi wukukalakela Nzambi walala, wukwikala wakasunuka kuwoma owu wakabishaña antu abulaña kumukalakela Nzambi.  Hamuloña wakwiluka nawu afu hiyakweti wumi mwizhamuku, hiwunatweshi kutiya woma afuku. Muloña wukweti chikuhwelelu hakushika kwaNzambi kwakusañula afu, hiwamba kachina kufwaku. Hakwiluka nawu Nzambi diyi mukwa ñovu-zhezhima, hiwunatweshi kuchina alozhi hela apandaku.—Yowanu 8:32.

9-11. Anyi akashakama muParadisa, nawa anyi akabula kushakamamu?

⁹ Neyi wuswila kwakwihi naNzambi hiwamba kachina mbidiku. Neyi chitunamoni, Bayibolu yashimwineñahu dehi kukala kwakuvulu kutunakumona hanu heseki hayinu mpinji. Yehova watulezhaña nawu iyi yuma yakapinji kantesha hohu; Wanta waNzambi wukunyakashana kwilisha dinu ituña kwikala paradisa.—Luka 21:10, 11, 31; 23:43.

¹⁰ Antu akundama kudi Yehova hohu nakumukalakela diwu akashakama muParadisa. Bayibolu yashimuna nawu: “Hakuleha chanti muntu watama hakekala nawa mwokuku; mwalala, wakakeñakeña hindi hadiñilañayi, hihakamwekanaku. Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:10, 11.

¹¹Antu oma nyichima akanaña kovwahila kuloña kwanshimbi yaNzambi akazhimbesha wumi wawu haya nyaka. (2 Atesalonika 1:8, 9) Hiyakamwekana cheñiku. Akadibomba naSatana niademoni zhindi mukufwa kwahaya nyaka. (Chimwekeshu 20:10, 14) Hakwila ana adizaña hadi Yehova nikumukalakela akatiya kuwaha muParadisa hanu heseki.

12. Bayibolu yashimuna nawudi kutalisha kumpinji yakumbidi?

¹² Yehova wudi nayuma yayiwahi yatentekelayi antu amukeña! Talaku Izu dindi chidahosha hawumi muParadisa hanu heseki:

• Yakudya yayivulu: “Hanu hamaseki hansa zhampidi zhamaneni hakavula kabaka [hela yakudya].”—Masamu 72:16.

• Matala amawahi: “Akatuña matala, akashakamamu.”—Isaya 65:21.

• Nyindimu yakuzañalesha: “Antu ami inatonda akaluña luñe-e nanyidimu yamakasawu. Hiyakakambakana chamukunkulwayiku.”—Isaya 65:22, 23.

• Hikwakekala kukataku: “Mwenimbu hakahosha nindi, Ami nakataku.”—Isaya 33:24.

• Hikwakekala wufwayiku: “Henohu dihu hakatoneshawu mesu awamputamesu, dihu hakazhikulawu matu awazhika matu. Henohu dihu hakakilukayi mukwakubalakata neyi nkayi, niidimi dakamama dakemba tumina.”—Isaya 35:5, 6.

• Hikwakekala kukata, kudila, hela kufwaku: “[Nzambi] wakayikombola madilu ezhima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:4.

• Hikwakekala Nzhitaku: “[Nzambi] diyi wakumishaña mazhita mwakumina iseki dezhima.”—Masamu 46:9.

• Wumi wahaya nyaka: “Akwakuloña akaswana ituña, akashakamamu haya nyaka.”—Masamu 37:29.

13. Hinyi hohu wunatweshi kwilisha adinu iseki kwikala paradisa, nawa muloñadi?

¹³ Muntu hanatweshi kuleta yuma yamuchidiwuku, hakwila Yehova wudi nañovu yakwila chidi chezhima chinahoshiyi nindi wakachikoña. Kwosi chuma nichimu chinatweshi kumukañesha kwila chuma chinakukeñayi kukoñaku. Bayibolu yahosha nawu: “Muloña kudi Nzambi hikwafumaña izu dabula ñovuku.”—Luka 1:37.

14. Wunateli kuwana ñahi nzhila yaya kuwumi wahaya nyaka?

¹⁴ Kuhitila mudi aYinsahu zhindi Yehova nayinki antu kudi kwezhima mpinji “[ya]kwiñila muchisu chanyanya” nikwenda munzhila yaya kuwumi wahaya nyaka. Aneyi nawa ikalaku hakachi kawantu amuzañalu owu anetezhi iku kutambikewa. Ikalaku mukwitiya kwalala nakudiluñisha nkisu yaYehova haya nyaka!—Matewu 7:13, 14.