1. Indi yaaku yakuhoña, niwulozhi nikupanda yatanda ñahi?

MUKANDA waAfrican Traditional Religion wahosha nawu, “MuAfrica, chikwikala chamukunkulwayi kuhosha nawu, kwizhi alozhi ekala kwoku tahindi nehi,” wabombelahu cheñi nawu, “nyichidi yezhima yawantu amuAfrica, wulozhi hichuma chelukishawu chikupu.” Antu akuhwelela mukuhoña, niwulozhi nikupanda, abombelamu ezhima adiza mashikola ahewulu niabula kudiza. Anlomboli amukwitiya kwawaMoslemu niaKristendomu niwena nawa akuhwelela muwulozhi.

2. Kwesekezha nayaaku yaya mpuhu, ñovu yawaña yafumaña kudihi?

² Kwesekezha nayaaku yaya mpuhu muAfrica, kwekala ñovu zhawaspiritu. Nzambi diyi wayiyulaña. Aspiritu niankakulula niwena anatweshi kuyizatisha. Antu amakwawu niwena eluka chakusendaku yeniyina ñovu nakuyizatisha chachiwahi (waña wakudikiña nachu) hela chatama (waña wakulowana nachu).

3. Indi waña wakulowana nachu hichumanyi, nawa antu awikuhwelela nawu wunatweshi kwiladi?

³ Waña wakulowana nachu, hela wulozhi, awutemeshaña kudi ayilumbu. Antu awuzatishaña elukewa kwila nawu akweti ñovu yakutemesha tutata, atuzhila, anzhinzhi, nianyama makwawu kulonda ayi nakulukuka antu. Waña wakulowana nachu welukewa nawu diwu wakozhezhaña madombu, wunshinta, yikatu, nikufwa nawa.

4. Antu amavulu akuhweleladi hansañu yawalozhi, nawa mazwinyi akudisolola ahoshañawu kudana adiñahu dehi alozhi?

⁴ Wadifwanaku chikupu hiwulozhi. Alozhi elukewa kwila nawu ashiyaña nyizhimba yawu nawufuku. Elukewa cheñi nawu atukaña nakuya kwacheñi, chikali nakuhumañana nawakwawu alozhi hela nakulowa ayilumbu zhawu. Chineli nyizhimba yawalozhi yekalaña saña yakamina hatudidi twawu, wunsahu iwu awushimunaña nankashi kudi ana antu adiñahu dehi alozhi. Chakutalilahu, magazini yimu yamuAfrica, yahosha hadi ana adiñahu dehi alozhi (swezhe-e atunkaña) nawu: “Nazhahahu dehi antu akushika ku 150 kuhitila muwubanzhi wahamukwakwa.” “Nazhahahu dehi anyana anyanya atanu kuhitila mukuyipwita mashi.” “Nazhahahu dehi atuzhila twami asatu muloña ankanini.”

5. Indi waña wakudikiña nachu hichumanyi, nawa awizatishaña ñahi?

⁵ Waña wakudikiña nachu welukewa kwila nawu waletaña ikiñu kuyuma yatama. Antu apanda waña wakudikiña nachu avwalaña tuzeya hela yikomu yakwotesha. Anwaña  yitumbu yakudikiña nachu hela kuyiwaya hanyizhimba yawu. Mumatalawu hela hamaseki, avumbikañamu yuma yakuhwelelawu nawu yikweti ñovu yakuyikiña. Akuhwelela munyikalu yikweti nsona yamuKoran hela yamuBayibolu.

6. Satana niademoni zhindi akoñelidi kunyima, nawa tunateli kutoñozhokahu ñahi hañovu zhawu?

⁶ Mwamweni, Satana niademoni zhindi hiyayilumbu zhawantu aswezha kufwana. Akweti ñovu yakuluwañesha yitoñozhoka ninshakaminu yawantu, nawa hanyaka atwesheli kwiñila nakudikañila mudi antu nianyama. (Matewu 12:43-45) Hela chakwila hitunateli kudiwula ñovu yawuku, hitwatela kuswezha kutohesha ñovu yawuku.

7. Satana wakeñaña nindi tukuhweleli chumanyi, nawa ichi anachilumbululi ñahi?

⁷ Satana diyi mwanta wamakasu. Wadimbaña antu kulonda atoñozhokeña nawu wukweti ñovu chikupu henohu wukweti yantesha hohu. Kuchilumbulula: Mpinji yadiñaku nzhita katataka mwituña dimu damuAfrica, amashidika avumishileña yidulumina yepumba kulonda kufwisha ayilumbu zhawu mutentu. Henohu kanda ayi nakulukuka, amashidika asambilileña kuvumisha yidulumina yaswezha kuvuma yanyitenda nzumbu nimata. Akeñeleña ayilumbu zhawu kutoñozhoka nawu anayilukuki kudi amashidika akweti mata amavulu amaneni. Munzhila yoyimu, Satana wakeñaña antu akuhweleli nawu ñovu yindi yaswezha chikupu. Nkeñelu yindi yidi yakutiyisha antu woma kulonda eleña mwaya kukeña kwindi bayi mwaya kukeña kwaYehovaku. Twayenu ntahi tutali chiwahi nyichidi yisatu yakutwamba oyu Satana yakeñañayi antu nawu akuhwelelimu.

8. Kutwambanyi kumu kwanyamunañayi Satana?

⁸ Kutwamba kumu kwanyamunañayi Satana dikwiku: Kwosi chuma chatama chadimwekenaña hohuku; chuma chezhima chatama chinabuli kukozhezhawu kudi muntu chamwekanaña kuhitila muñovu yawuspiritu. Chakutalilahu, twili netu, neyi chakwila mwana nafwi nachikatu chamashika. Mama yindi watela weluka nindi chikatu chamashika achikozheshaña kudi añwenini. Ilaña watela kutoñozhoka cheñi nindi muntu wumu wazatishili wulozhi hakutemesha ñweneni kulonda yasumi mwanindi.

9. Bayibolu yamwekeshaña ñahi nawu Satana hakozhezhaña kukala kwezhimaku?

⁹ Hela chakwila Satana wudi nañovu yakukozhezha makabi, chikwikala chaluwa kutoñozhoka netu wukweti ñovu yakukozhezha makabi ezhima. Bayibolu yahoshaña nawu, “Akwalufuchi hidiwu ashiyañamu akwawuku; hela kunzhita, akwañovu hidiwu atapaña akwawuku; hela kudya, akwamaana hidiwu akumonañaku; hela maheta, akwakashinshi hidiwu ayihetañaku; hela wuselewa, akweti wukalawenu hidiwu awumonañaku; mpinji nakululakana chayilulakenaña tuhu wezhima wawu.” (Mukwakutaŋisha 9:11) Mukwakutemuka wumu natweshi kutemuka lufuchi kubadika akwawu, ilaña, hekwawu hanateli kushika kumufundaku. “Yilulakenu” yinatweshi kumukañesha. Hadaha natweshi kuhukana nakudimbuka hela wukukata hela tuhu kudichiñumuna. Iyi yuma yinateli kumwekena kumuntu wudi wezhima. Hiyayikozhezhaña kudi Satana, hela kuhitila muwulozhiku; ilaña yakuminaña dakumwekana.

10. Nsañwinyi yahoshañawu kutalisha hadi alozhi, nawa tuneluki ñahi netu hikutwamba?

¹⁰ Kutwamba kwamuchiyedi kwanyamunañayi Satana dikweniku: Alozhi ashiyaña nyizhimba yawu wufuku nakuya nakudihumañana nawakwawu alozhi hela nakupwita mashi hela nakudya mbizhi yawantu analukukiwu. Hanu  dinu dihuli eyi aweni neyi: ‘Neyi alozhi elaña mwenimu, chumanyi dinu chafumaña mumuzhimba?’ Neyi chitunamoni dehi, wumi diyi muntu, bayi neyi hichuma chinatweshi kwambuka namuzhimbaku. Kubombelahu, spiritu hiñovu yahanaña wumi wenkaña muzhimba ñovu, ilaña hiyinatweshi kukoña chuma chidi chezhima chakadi muzhimbaku.

11. Muloñadi chitunelukili netu alozhi hiyanatweshi kushiya nyizhimba yawuku, nawa wunachikuhweleli ichi?

¹¹ Wumi hela spiritu hiyinatweshi kushiya muzhimba nakwila chuma chidi chezhima, chachiwahi hela chatamaku. Dichi, alozhi hiyanatweshi kushiya nyizhimba yawuku. Hiyelaña yuma yafwilañawu kwila hela kutoñozhoka hayuma yelawu dehiku.

12. Indi Satana wakozhezhaña ñahi antu kukuhwelela nawu akoñahu dehi yuma yabulawu kwilawu?

¹² Tunatweshi kulumbulula ñahi nsañu yashimunañawu kudana adiñileñahu dehi alozhi? Satana wakozhezhaña antu kukuhwelela nawu akoñahu dehi yuma yabulawu dehi kwilawu. Kuhitila mukuzatisha yimwenu, Satana natweshi kuhuñumuna antu kutoñozhoka nawu amonahu dehi, atiyahu dehi nawa elahu dehi yuma oyu yiyabulawu dehi kwila. Muniyi nzhila, Satana wafwilaña kubalumuna antu ezhima kufuma kudi Yehova nakuyilisha atoñozhokeña nawu Bayibolu yaluwa.

13. (a) Komana waña wakudikiña nachu wawuwahi? (b) Indi Nsona zhahoshahu nawudi kutalisha kukuhoña?

¹³ Kutwamba kwamuchisatu dikwiku: Waña wakudikiña nachu—hiwaña welukewa nawu wakañeshaña waña wakulowana nachu—weniwu waña nawu wawuwahi. Bayibolu hiyamwekeshaña chambu hakachi kawaña wakulowana nachu nawaña wakudikiña nachuku. Yakanisha kupanda waña wudi wezhima. Toñozhokeku hanshimbi yaheniyi Yehova kumuza waweni Isarela kutalisha kukuhoña nikudi akwakupanda:

• “Kuhoña chinzhila.”—Alevi 19:26.

• “Hela iyala hela mumbanda wukuzakukaña mukishi, indi kwizhi wukwikala katepa, chiña kumuzhaha hohu.”—Alevi 20:27.

• “Kudeyi bayi kwakamwekana muntu . . . mukwakuhoña, hela mukwakuhoña natutumbwa,  hela wasansa[ña] nyiseñu, hela mukwakupanda, hela mukwakukaya[ku].”—Kuhituluka 18:10-14.

14. Muloñadi Yehova chatuñililiyi nshimbi yakukanisha kupanda waña?

¹⁴ Nshimbi zhenizhi zhalumbulwili hatooka to-o nawu Nzambi hakeñeleña antu zhindi kupanda wañaku. Yehova waheni izhi nshimbi kudi antu zhindi muloña wayikeñeli nawa hakeñeleña antu zhindi kwikala nachisenda chakutiyaña woma nikuchina wañaku. Hakeñeleña antu zhindi kuyandishewa kudi ademoniku.

15. Bayibolu yamwekeshaña ñahi nawu Yehova wukweti ñovu kubadika Satana?

¹⁵ Bayibolu hiyashimuna yuma yezhima kutalisha kuyuma oyu ademoni yatweshañawu kwila niyuma yakañanyañawu kwilawuku. Hela chochu, yamwekeshaña nawu Yehova Nzambi waswezha kutakalala ñovu kubadika Satana niademoni zhindi. Yehova wamunatili Satana kufuma mwiwulu. (Chimwekeshu 12:9) Anukenu nenu, Satana walombeli lusesa kulonda yomweseki Yoba, nawa wovwahilili kukonkomwena kwaYehova kwakubula kumuzhaha Yoba.—Yoba 2:4-6.

16. Kudinyi kutwatela kuwana kukiñewa?

¹⁶ Yishimu 18:10 yahoshaña nawu: “Izhina daYehova hikaposhi kakola, mukwakuloña hakutemukilamu, amwenenamu nizo-o.” Komana twatela kutala kudi Yehova kulonda yotwikiñi. Antu zhaNzambi hiyashindamena mumepeka hela muyitumbu yakudikiña nachu kuyililu yatama yaSatana niademoni zhindiku. Hiyatiyaña woma nyikayi yawalozhiku. Antu zhaNzambi akuhwelela chahoshaña Bayibolu nawu: “Muloña mesu aYehova adi nakutalatala mwahita iseki dezhima, kulonda akwashuku nañovu adi nanyichima yalala, yindi chikupu.”—2 Kushindulula 16:9.

17. Yakoba 4:7 yatukonkomwenañadi, helachochu, chumanyi chitwatela kwila?

¹⁷ Aneyi nawa wunatweshi kwikala nachikuhwelelu chochimu neyi wukumukalakela Yehova. Yakoba 4:7 yahoshaña nawu: “Dichi mwovwahilenu Nzambi, [hakwila] Diyabolu dikañenu nindi, niyena wukuyitemuka.” Neyi wukumukalakela Nzambi walala nakumwovwahila, wunateli kukuhwelela neyi Yehova wukakukiña.