1. Chumanyi chitwatela kwila hakwila nawu tumutiyishi Nzambi kuwaha?

HAKUDILUÑISHA wubwambu waweni naNzambi, hitwatela kwikala mukwitiya kwakutwambaku. Twatela kwikala mukwitiya kwalala. Makonu yihita yawantu kunyeñumuka iseki dezhima anakwila mwenimu.

2. Ayinsahu zhaYehova awanikewaña kudihi, nawa mudimu wawu wakwiladi?

² Kwesekezha nachashimwinañahu dehi Bayibolu, akwakudifula alala anekali “izaza deneni” anafumi “[kunyuza] yezhima, akunyichidi yezhima, akumatuña ezhima, akumadimi ezhima.” (Chimwekeshu 7:9) Mumatuña 235, yihita yawaYinsahu zhaYehova anadibombimu mumudimu wakukwasha antu kudiza hazhinzhila zhazhiwahi nikeñelu yaYehova.

3. Ayinsahu adifukulaña kudinyi, nawa kudikufula kwamuchidinyi kwatondolwelañawu?

³ Ayinsahu eluka kwila nawu Yehova nkawindi diyi watelela kudifukulaku. Hiyetezhaña kupesha kudi akishi hela yifwikizha yamuyipompeluku. (1 Yowanu 5:21) Hiyalemeshaña afu kuhitila mukuchisha hayipenzhi hela kwila yidika yinashali yikweti tuheka twakwitiya kwakutwamba “ninsañu zhalezhañawu ademoni[ku].” (1 Timotewu 4:1) Helachochu, akundezheña ana anafwishi kuhitila mukuyilubulwila kushika kwaNzambi kwakwila nawu, kwakekala kusañuka kwawafu muparadisa hanu heseki.—Yowanu 5:28, 29; Yililu 24:15.

4. Mbadinyi yemenawu antu zhaNzambi kutalisha hakupanda?

⁴ Ayinsahu hiyadibombaña mukuhoña, kupanda niwulozhiku, muloña eluka nawu iyi yuma yafuma kudi Diyabolu. Hiyakuhwelela nawu mepeka anatweshi kuyikiñaku—chikuhwelelu chawu enka mudi Yehova.—Yishimu 18:10.

5. Munzhilanyi aYinsahu zhaYehova muyabulilawu kwikala “ampata yamunu mwishina”?

⁵ Yesu wahosheli nindi atumbanzhi twindi “hiyampata yamunu mwishinaku.” (Yowanu 17:16) Yesu yomweni wakanini kudibomba munsañu zhamatuña nachiyulu yadiñaku mumpinji yindi. (Yowanu 6:15) Chochimu, aYinsahu hiyadibombaña munsañu zhamatuña nachiyulu, kudambula kwa nyuza nikufwilañena yifulu yadinu ituñaku. Ilaña afwetaña nyombu nikovwahila nshimbi yetuña diyashakamañamu.—Yowanu 15:19; Aroma 13:1, 7.

6. Nshimbinyi añamba zhaNzambi yalondelañawu kutalisha kumaluwi nikudiseña?

⁶ Hamuloña wakwovwahila wunlomboli wetuña, aYinsahu amonaña kwila nawu maluwi awu anetezhewi nanshimbi. (Titusa 3:1) Ovwahilaña wunlomboli waNzambi, muniyi nzhila atondolwelaña wuhadi. (1 Timotewu 3:2) Kubombelahu, hamuloña wakulondela nshimbi yaBayibolu muwumi wawu, añamba zhaNzambi hiyavula kudiseña maluwi awuku.

7. Munzhilanyi aYinsahu muyamwekeshelañawu kukeña kudi wumu namukwawu?

⁷ Ayinsahu adikeña wumu namukwawu. Kukeña kweniku, hamu nakukeña kuyakeñawu Nzambi, kwayiletaña hamu neyi anyana evumu dimu hela chakwila afuma kunyichidi ninyuza yeñi nayeñi. Neyi kunamwekani kukala hela kukeñewa wukwashu, aYinsahu anyakashanaña kuya nakukwasha akwawu. Ayinsahu amwekeshaña kukeña kuhitila munshakaminu yawu.—Yowanu 13:35.

8. Yililunyi yatama yatondolwelañawu antu zhaNzambi?

⁸ Antu zhaYehova azataña nañovu nakwikala abula muloña nawa aloña munshakaminu yawu. Atondolwelaña kwiya, kutwamba, kwila wuvumbi, kusheta, nikulanda nakulandulula kwakuswamuzhoka. Amayala hiyetaña añodizhawuku. Henohu kanda ekali aYinsahu, antu amakwawu adiña nakukoña yuma yeniyi, ilaña nawukwashu waYehova ayileka chikupu. “Ayiwelesha” kumesu aNzambi.—1 Akorinda 6:9-11.

9. Mukanda wumu wahosheli nawudi hasañu yayipompelu yikweti zhispiritu muAfrica?

⁹ Mwamweni, kwitiya kwakuvulu kwahoshaña  nawu akweti walala. Anatweshi kuhosha hanyidimu yawu yiyakoñañawu yayiwahi kulonda kumwekesha nawu muyahoshañawu mwalala. Chakutalilahu, kutalisha kudi owu atenañawu nawu yipompelu yikweti zhispiritu muAfrica, mukanda wumu wahosha nawu: “Mudimu wawa akwakuhoña niayimbuki anawiswani kudi [izavu dadiha dawa kaKwitiya]. . . . Ahoshaña nawu aprofwetaña nikumwekesha yihayamisha. Atuprofwetu mukachi kawu ahanaña yimwenu nikulumbulula yilota. Azatishaña menzhi amalombu, manzhi azhila, wuti, twandulu, incensi hakuka nihakukañesha nyisoñu.”

10, 11. Muloñadi yihayamisha makonu chiyabulilaña kumwekeshaña nawu kwitiya kwafuma kudi Nzambi?

¹⁰ Antu ekala muniku kwitiya, ahoshaña nawu yihayamisha yamwekeshaña kwila nawu kwitiya kwawu akukiswila kudi Nzambi. Ilaña, yihayamisha hiyamwekeshaña kwila nawu kwitiya akwitezha kudi Yehovaku. Satana wenkaña ñovu akwakudifukula akutwamba amakwawu kulonda kukoña ‘nyidimu yañovu.’ (2 Atesalonika 2:9) Kubombelahu, Bayibolu yashimwineñahu dehi nawu, yawana yayihayamisha yakufuma kudi Nzambi yamuchidi neyi kuprofweta, kuhosha mumadimi nikwiluka kwabadika “kwamba kahita.”—1 Akorinda 13:8.

¹¹ Yesu wababesheli nindi: “Antu ezhima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu. Amavulu amba kañila hefuku odu nawu, Mwanta, Mwanta, hitwaprofweteli mwizhina deyuku? Hitwafumishili ademoni mwizhina deyuku? Hitwakoñeli nyidimu yañovu yayivulu mwizhina deyuku? Henohu nakayakula nami, Hinayilukili hela ifuku nidimuku; fumenu kudami enu mwakoñaña yakuluwa.”—Matewu 7:21-23.

12. Anyi akeñila muwanta wamwiwulu?

¹² Anyi komana akeñila muWanta wamwiwulu? Wowu elaña mwaya kukeña kwaYehova.

13. Nzambi nakulombola antu zhindi kukoña mudimwinyi makonu, nawa anyi anakuwikoña?

¹³ Nkeñelu yaNzambi kudi antu zhindi makonu yakwila ñahi? Yesu wahosheli nindi: “Ninsañu iyi yawanta yayiwahi akayishimwañena mwahita matuña ezhima mwashakamawu antu, kulonda yakayilili nyuza yezhima wunsahu.” (Matewu 24:14) Iwu diwu mudimu wunakukoña aYinsahu zhaYehova nañovu.

14. Wanta waNzambi hichumanyi, nawa anyi akayula muniwu Wanta?

¹⁴ Kunyeñumuka “matuña ezhima mwashikamawu antu,” aYinsahu zhaYehova ashimwinaña haWanta waNzambi neyi hinfulumendi yakwiwulu yamba kayula adinu iseki mukuloña. Atañishaña nawu Yehova watonda Yesu Kristu kwikala Mwanta waniwu Wanta, hamu nawa 144,000 akwakumuyulishaku owu asakulayi kufuma mukachi kanyichidi yawantu.—Danyeli 7:14, 18; Chimwekeshu 14:1, 4.

15. Wanta wukakisañana chumanyi?

¹⁵ Ayinsahu azatishaña Bayibolu hakulezha antu nawu, Wanta waNzambi wukakisañana dinu ituña daSatana. Kwitiya kwakutwamba nintañishilu yachu yaletaña nsonyi hadi Nzambi nakulemesha Diyabolu akayifumishahu! (Chimwekeshu 18:8) Zhinfulumendi zhawantu ozhu zhemenañaku kukañesha Nzambi nizhena nawa akazhifumishahu!—Danyeli 2:44.

16. Anyi akayulañawu kudi Yesu Kristu, nawa akashakamaña kudihi?

¹⁶ Kubombelahu, aYinsahu zhaYehova atiyakeshaña nawu Yesu Kristu wakaleta wufwetu wawuwahi kudi owu elaña chakeñañayi Nzambi. Akekala antu zhindi akayulañayi hanu hamaseki. Bayibolu yashika nawu: “Muloña wakamupulwisha wabula yuma hakadilayi, wakapulwisha nikazweni wabula wakumukwashaku. Niwazeya niwabula yuma wakayitiyila wushona, wakaamwina abula yuma.”—Masamu 72:12, 13.

17. Anyi nkawawu anakushimwina haWanta waNzambi?

¹⁷ Kwosi izavu dikwawu dawantu delaña mwaya kukeña kwaNzambi kuhitila mukushimwina nsañu yayiwahi yaWanta. Ayinsahu zhaYehova diwu hohu anakutiyakesha Wanta waNzambi kunyeñumuka iseki dezhima.