“Nzambi . . . wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.”—Chimwekeshu 21:3, 4.

Mukwiluka nenu Nzambi hidiyi watuletelaña yihuñuku.—Yakoba 1:13.

Muchima wenu wukuwunda chimweluka nenu Nzambi watutiyilaña wushona neyi tunaholokeli muyihuñu.—Zekariya 2:8.

Mukwikala namuchima wakuchiñeja nenu yihuñu yamba kamana.—Masamu 37:9-11.

Eña, hamuloña wayuma yiyedi:

• Nzambi wahela yihuñu nikutama kwejima. Talenu chatiyileñayi Yehova Nzambi kumuchima kunyima hampinji yayikabishileñawu antu jindi. Bayibolu yahoshaña nawu waneñeli muloña ‘ayimwesheleña yihuñu.’—Ansompeshi 2:18.

  Antu akabishaña antu jindi Nzambi wayitiyaña kumuchima bwi-i. Chakutalilahu, Bayibolu yahoshaña nawu Yehova wamonaña “makasa apwekeshaña mashi akadi muloña” nindi hiyishimashima kumesu indi.—Yishimu 6:16, 17.

• Nzambi watwakamenaña hamuntu hamuntu. Bayi neyi muntu wudi wejima ‘weluka yipupu yawu hamuntu hamuntu niyihuñu yawuku’ ilaña niYehova weluka.—2 Kushindulula 6:29, 30.

  Kuzatisha Wanta windi, Yehova keña yamanishi yihuñu yinakumonawu antu hamuntu hamuntu. (Matewu 6:9, 10) Chayinu mpinji, Yehova wakundejaña antu enzaña kudi yena namuchima wumu.—Yililu 17:27; 2 Akorinda 1:3, 4.