Munahiti dehi mafuku asatu kufuma hekalayi Nataneli hakachi kawatumbanji aYesu atachi. Yesu niatumbanji twindi amakwawu atachi anayi kukabeta kakuchimunswa kankambi yaÑaliliya, mumukala wawu. Anashiki mumbaka yaKana, mumukala waNataneli. Kana yekala mutumapidi kukabeta kakuchimunswa kaNazareta kwakuliliyi Yesu. Anayitambiki kuchawija chawulu muKana.

Mama yaYesu niyena nenzi kuchawija chawulu. Chineli hibwambu dachisaka chanawa anakudisumbula, chinamwekani neyi Mariya nakuyikwasha kwakamena antu anakwinza. Namoni chuma chinabuleni, dichi namuleji mwanindi: “Vinyu yinayimani.”—Yowanu 2:3.

Mariya nakumuleja Yesu nindi yelihu chuma chimu havinyu yinamani. Yesu nazatishi nhoshelu yankinji yinakumwekesha nawu nakaani, Yesu nakuli nindi: “Eyi mumbanda, eyi nanami ichi chuma chinatukundami ñahi?” (Yowanu 2:4) Chineli hiMwanta anatondiwu kudi Nzambi, Yesu watela kuzata nyidimu yikumulejawu kudi Tata yindi wamwiwulu, bayi chisaka hela amabwambuku. Mariya nashiyi yuma yejima mudi mwanindi, nakuleja antu anakuzata nindi: “Mwili mwejima mukuyilejayi.”—Yowanu 2:5.

Hadi nsaba 6 jamenji, yimu yinakwiñija malita kubadika 40. Yesu nayileji antu anakuzata nindi: “Inzeshenu oju nsaba namenji.” Kuhiñahu Yesu nahoshi nindi: “Tehunenumu, mumutwalili mukulumpi wachawija.”—Yowanu 2:7, 8.

Mukulumpi wachawija natiyi kuwaha navinyu yayiwahi ilaña neluki wanyi nindi anayemi muchihayamisha. Namutambiki kalemba nawa namuleji nindi: “Muntu wejima wasambilaña kwidisha vinyu yayiwahi, nawa neyi antu anatambikiyi anasheti dehi, wayinkaña vinyu yatama. Ilaña eyi wunahembi vinyu yayiwahi kushika niyinu mpinji.”—Yowanu 2:10.

Ichi dichihayamisha chakusambila chineliyi Yesu. Atumbanji twindi akatataka chinamoniwu ichi chihayamisha, anamukuhweleli nankashi. Kuhiñahu, Yesu, mama yindi niamanakwindi akuwanamu, anayi kumusumba waKaperinamu kukabeta kasumbwañesha chimunswa namujika kuchikumu chaKaluñalwiji kaÑaliliya.