Hanyima yakwila Yesu anamupapatishi kudi Yowanu, spiritu yaNzambi yinamutwali mwisaña daYudeya. Wukweti yuma yayivulu yakutoñojokahu. Hachipapatishu chaYesu, “mawulu enzunukili.” (Matewu 3:16) Chumichi chamukwashili kwanuka yuma yadiziliyi niyeliliyi mwiwulu. Eña wukweti yuma yayivulu yakutoñojokahu chikupu!

Yesu nashakami mwisaña mafuku 40 mwana niwufuku. Hadi mpinji yejimiyi kwosi nichuma chinadiyiku. Kuhiñahu, Yesu chinatiyiyi nankashi nzala, Satana Diyabolu nenzi nakumweseka nindi: “Neyi wudi mwana kaNzambi, lejaku awa malola abalumuki mankendi.” (Matewu 4:3) Yesu neluki nindi chatama kuzatisha ñovu yindi muchihayamisha kulonda aditiyishi kuwaha, dichi nakaani kweseka.

Diyabolu naleki wanyi. Neseki cheñi njila yikwawu. Nakumuleja Yesu nindi yadinati hewulu datembeli. Ilaña Yesu nakaani kwila chumichi chikumwekesha adimwekeshi kudi antu. Yesu nazatishi mazu amuNsona nakumwekesha nindi chaluwa kumweseka Nzambi muniyi njila.

Dichi mukweseka kwamuchisatu, Diyabolu namuleji Yesu “mawanta ejima amukaayi nikulema kwawu” nawa nahoshi nindi: “Nukukwinka yuma yejimiyi neyi wukudibuka heseki nakudifukula kudi ami kamu hohu.” Cheñi Yesu nakaani chikupu nakuhosha nindi: “Fumaku aha, eyi Satana!” (Matewu 4:8-10) Nakaani kweseka kwakwila yuma yatama, muloña neluki nindi twatela kudifukula kudi Yehova hohu. Natwalekihu kwikala washinshika kudi Nzambi.

Kudi yuma yitunateli kudizila kunawa makweseka nichayikaaniniyi Yesu. Iku kwadiña kweseka kwalala, chinakumwekesha nawu Diyabolu wekala kwoku bayi neyi yilwilu hohu yakutama neyi chahoshaña antu amakwawuku. Wekala kwoku, hamwekanaña hohuku. Iyi nsañu yinakumwekesha cheñi nawu jinfulumendi jamukaayi hiyuma yaDiyabolu; yena diyi wayiyuulaña. Chamwinkeleñawu Kristu chamwekesheli ñahi nawu iku kweseka kwalala?

Kubombelahu, Diyabolu wahosheli nindi wukumufweta Yesu kristu neyi adifukula kamu kudi yena, chakwila wukumwinka Yesu mawanta ejima amukaayi. Diyabolu nateli kutweseka munjila yoyimu, hadaha kufwila kwikala namaheta amukaayi, ñovu hela chifulu. Twatela kwikala asoñama kulonda tumwimbujoleña Yesu kuhitila mukwikala ashinshika kudi Nzambi hichikweti muloña nakweseka kutukumonaku. Ilaña anukenu nenu Diyabolu wamushili Yesu “sampu nimpinji yikwawu yatelela.” (Luka 4:13) Chumichi chinateli kutumwekena ninetu, dichi twatela kwikala ababala.