Hanyima yakushakama mafuku 40 mwisaña nawa henohu kanda afunti kuÑaliliya, Yesu nafunti kudi Yowanu wamupapatishili. Yesu chinakushikayi, Yowanu namwinyikindi nakubidika kudi owu adiyi nindi, nindi: “Talenu, Mwana kaMukoku waNzambi owu wafumishaña nshidi yakaayi! Iwu diyi ona inashimwini nami: ‘Muntu wunakwinza hanyima yami wambadika ami, muloña yena wadiñaku dehi henohu ami kanda.’” (Yowanu 1:29, 30) Hela chakwila Yowanu wamubadikamu Yesu muyaaka yakusemuka, neluki nindi Yesu wadiña kwoku namujimba waspiritu mwiwulu henohu yena kanda.

Hanyilungu yantesha yinahitihu henjiliyi Yesu nindi amupapatishi, chidi neyi Yowanu welukili wanyi nindi diyi wakekala Mesiya. Yowanu nahoshi nindi: “Ninami hinamwilukiliku, ilaña nenjili nakupapatisha mumenji kulonda akamwiluki kudi aIsarela.”—Yowanu 1:31.

Yowanu natwalekihu kuyileja antiyilili jindi chuma chamwekeni hamupapatishiliyi Yesu nindi: “Namweni spiritu yenjileña kufuma mwiwulu neyi kapompa, nawa yawilili hadi yena. Ninami hinamwilukiliku, ilaña Owu wantemesheli nindi nipapatisheña mumenji wanlejeli nindi: ‘Yowu iwakamona spiritu yinakwinza nakuwila hadi yena, yenowu diyi wakapapatishaña naspiritu yajila.’ Nawa nadimweneni ami aweni, dichi nashimuni wunsahu nami, iwu hiMwana kaNzambi.”—Yowanu 1:32-34.

Yowanu wudi nawatumbanji twindi ayedi ifuku dinalondelihu hanenziyi Yesu. Yowanu nahoshi nindi: “Talenu, Mwana kaMukoku waNzambi!” (Yowanu 1:36) Atumbanji twaYowanu ayedi anamulondeli Yesu. Wumu hakachi kawu diyi Anderi. Hadaha mukwawu diyi wasonekeli ayinu nsañu, niyena diyi Yowanu. Chinamwekani neyi iwu Yowanu himusonyi aYesu mwana kaSalomi. Hadaha himuhela aMariya nawa nfumwindi ijina dindi diyi Zebedewu.

Chinabalumukiyi nindi atali aAnderi naYowanu anakumulondela Yesu nayihuli nindi: “Munakukeñadi?”

Wena anamwili nawu: “Rabi, wunakushakama kudihi?”

Yesu nayakuli nindi: “Inzenu mutali.”—Yowanu 1:37-39.

Mpinji yinashiki kuma 16:00 aAnderi naYowanu anashakami naYesu nichinahumi itañwa. Anderi natiyi cheñi kuwaha chinawaniyi manakwindi atenañawu cheñi nawu Shimona, namuleji nindi: “Tunawani Mesiya.” (Yowanu 1:41) Anderi namutwali Petulu kudi Yesu. Kuhiñahu nsañu yinakumwekesha nawu Yowanu niyena nawani manakwindi Yakoba nawa namuleti kudi Yesu; hela chochu, Yowanu anamubombeli munsañu yasonekeliyiku.

Ifuku dinalondelihu, Yesu nawani Fwilipu wakuBeteseda. Yekala kwakwihi nakabeta kakuchimunswa chachikumu chaKaluñalwiji kaÑaliliya nawa dikumukala waAnderi niPetulu. Yesu namwili Fwilipu nindi: “Ikalaku mukakunlondela.”—Yowanu 1:43.

Kuhiñahu Fwilipu niyena nawani Nataneli, atenañawu cheñi nawu Batolomewu, namuleji nindi:  “Tunawani muntu ashimwiniwu kudi Mosi muNshimbi nawa asonekeliwu kudi aTuprofwetu nawu: Yesu wakuNazareta, mwana kaYosefu.” Ilaña Nataneli nakujinoka nawa namwihuli Fwilipu nindi: “Komana muNazareta munateli kufuma chuma chachiwahi?”

Fwilipu namuleji nindi: “Inzaku wutali.” Yesu namoni Nataneli nakwinza nawa nahoshi nindi: “Talenu, kaIsarela walala wabula makudi.”

Nataneli namwihuli nindi: “Wunañiluki ñahi?”

Yesu namwakuli nindi: “Henohu Fwilipu kanda akutambiki, nadiña nakumona dehi hiwadiña mwishina damutondu wachikuyu.”

Nataneli nahoshi iku nahayami chikupu nindi: “Rabi, yeyi Mwana kaNzambi, yeyi Mwanta waIsarela.”

Yesu namwihuli nindi: “Wuneteji muloña nakuleji nami nakumona hiwadiña mwishina damutondu wachikuyu tahindi? Wakamona yuma yamaneni kubadika iyi.” Kuhiñahu, nayikani nindi: “Inakuyileja chikupu nami, mwakamona iwulu dinenzunuki niañelu aNzambi anakukandama mwiwulu nikusuluka nakwinza kudi Mwana kamuntu.”—Yowanu 1:45-51.

Chimunahiti hohu kampinji kanti hanyima yachumichi, Yesu niatumbanji twindi amaha anatondiyi, anafumi muChinekineki chaYodani nawa anayi kuÑaliliya.