Hanyima yakwanakana Chipandakenu mu 30 C.E., mpinji yikwatuutaña, Yesu niatumbanji twindi anafumi muYerusalema. Hela chochu, hiyanafunti kumatala awu muÑaliliyaku. Anayi kuYudeya kunapapatishiwu antu amavulu. Yowanu mpapatishu wadiña nakuzata mudimu yowumu kwakwihi nachaaka nawa atumbanji twindi amakwawu achidi nayena, hamwaha muchinekineki chaKaloña Yodani.

Yesu yomweni hanapapatishihu muntuku, atumbanji twindi diwu anakupapatisha antu kwesekeja nachinayilejiyi. Haniyi mpinji yamudimu waYesu, Yesu niYowanu anakutañisha Yudeya anabalumuki nanshidi jawu kwesekeja naNshimbi jaNzambi jachitiyañenu.—Yilwilu 19:4.

Ilaña atumbanji twaYowanu anatiyi ichima, nakwaba hadi Yesu nawu: “Iyala [Yesu] iwadiña nindi . . . nakupapatisha, nawa antu ejima anakuya kudi yena.” (Yowanu 3:26) Hela chochu, Yowanu hanatiyi ichimaku. Nazañalali chinakuyilaku Yesu hambidi nawa nakukeña niatumbanji twindi niwena azañalali. Yowanu nayanukishi nindi: “Enu mudi ayinsahu amazu inahosheli nami, ‘Hiyami Kristuku, ilaña anantemeshihu dehi kumbidi yindi.’” Nalumbululi ichi chikuma munjila yikuletesha ejima atiyi, nindi: “Muntu wejima wukweti kankaña hikalemba. Ilaña ibwambu dakalemba neyi emana nakutiya chinakuhoshayi, wazañalalaña nankashi hakutiya izu dakalemba. Dichi, muzañalu wami wunasweji chikupu.”—Yowanu 3:28, 29.

Yowanu kufwana ibwambu dakalemba, wazañaleli mutukweji twahanyima hayikuyitwala atumbanji twindi kudi Yesu. Amakwawu hakachi kawu amulondeleli Yesu nawa mukuhita kwampinji akayiwahisha naspiritu yajila. Yowanu niyena nakukeña atumbanji twindi amulondeleña Yesu. Kafwampi, chuma chinakufwilayi Yowanu hikumuloñeshela Kristu njila yamudimu windi. Yowanu nalumbululi nindi: “Yenowu watela kuyaña hewulu, ilaña ami natela kufuntaña mwishina.”—Yowanu 3:30.

Yowanu wacheñi, watachikili kumulondela Yesu, chimwahitili mpinji wasonekeli hadi Yesu nimudimu wakwamwina antu nindi: “Owu wafuma mwiwulu wabadika antu ejima. . . . Tata wakeña Mwana nawa nahani yuma yejima muchikasa chindi. Muntu wamukuhwelelaña Mwana wukweti wumi wahaya nyaaka; hakwila muntu wadikañaña naMwana hakekala nawumiku, ilaña kuzuwa kwaNzambi kwakekala hadi yena.” (Yowanu 3:31, 35, 36) Dichalala chatela kwilukawu antu!

Hanashimbuli wanyi kufuma hanahosheliyi Yowanu Mpapatishi nindi yena mudimu windi wukukeha, anamukwati kudi Mwanta Herodi. Herodi nasendi Herodiya ñoda manakwindi wakuwanamu Fwilipu, nawa namusumbuli. Dichi Yowanu chinamusololiyi hawujila wuneliyi, Herodi namushi mukaleya. Chinatiyiyi nawu Yowanu anamukwati, Yesu nafumi kuYudeya hamu nawatumbanji twindi ‘nakuya muÑaliliya.’—Matewu 4:12; Maku 1:14.