Yesu nakumishi kutañisha apostolu indi awana haMpidi yaNyiolivi, nakuli lwihu lwawu kutalisha hakwikalahu kwindi kumbidi nihamba kakuma nshakaminu yamakonu.

Nisani 11 dadiña ifuku dakwililamu yuma yayivulu chikupu! Hadaha hanakufuntawu kuBetani nawufuku dihu hanalejiyi Yesu apostolu indi nindi: “Neyi chimuneluki, kunashali dehi mafuku ayedi hakwila nawu kwiikali Chipandakenu nawa Mwana kamuntu akumuhana kulonda amujahili hamutondu.”—Matewu 26:2.

Hadaha ifuku dinalondelihu, daChisatu, Yesu wudi nawapostolu indi kwakankawawu. Hachiyedi, wazuwila anlomboli jakwitiya nikusolola tufuta twawu. Anakufwila kumujaha. Dichi, namwekeni wanyi kudi antu haNisani 12 kulonda kubuli chuma chikumukañesha kwanuka Chipandakenu nawapostolu indi hanyima yakuhuma kwetena namelela, chikutachika Nisani 14.

Ilaña akulumpi jawatupristu niakulumpi jawantu anashakami hohu wanyi henohu Chipandakenu kanda chitachiki. Anabulakani mulubanza lwakapristu muneni, Kayafwasi. Muloñadi? Anahili muloña Yesu wadiña nakuyisolola hatooka. Dichi anakumukwatila kafuta kulonda “amukwati kuhitila mukumutwambila hakwila amujahi.” Akwila ñahi mwenimu nawa mpinjinyi? Anahoshi nawu: “Bayi tumukwatila hachawijaku, kulonda habuli kwikala ipumba hakachi kawantu.” (Matewu 26:4, 5) Anakuchiina muloña Yesu amukeña kudi antu amavulu.

Ilaña haniyi mpinji anlomboli jakwitiya anatambwili mwenyi. Nawu atali, kuwana hikapostolu kaYesu, Yudasi Isakaroti. Satana nashi mudi yena yitoñojoka yakumufukejela Mwanta windi! Yudasi nayihuli nindi: “Chumanyi chimukunyinka hakwila niyifukejeliyi?” (Matewu 26:15) Anatiyi kuwaha, dichi anatiyañani “kumwinka mali asiliva.”  (Luka 22:5) Mali añahi? Anatiyañani kumwinka yikunku yasiliva 30. Hakulanda nduñu amufweteleña mashekeli 30. (Kwidika 21:32) Dichi anlomboli jakwitiya anamudiwuli Yesu, nawu halemaku. Yudasi natachiki “kukeñakeña mpinji yayiwahi yakumufukejelamu kudi wena chakadi izaza dawantu kwikalahu.”—Luka 22:6.

Nisani 13 yinatachiki hakuhuma kwetena Hachisatu, nawa iwu diwufuku wamu 6 nawa wakukumishaku Yesu kwikala muBetani. Ifuku dinalondelihu, atela kumanisha kuloñesha Chipandakenu. Atela kukeña mwana kamukoku kulonda amujahi nikumwocha wamukuma neyi Nisani 14 yinatachiki. Kudihi kukudilawu, hinyi wukuyiloñeshela? Yesu nashimuni wanyi yuma yejimiyi. Nakuchina Yudasi kubula kushimuna yumiyi kudi akulumpi jawatupristu.

Hadaha Hachiwana kumamwaana, Yesu natemeshi Petulu niYowanu kufuma muBetani, nayileji nindi: “Yenu mwakaloñeshi Chipandakenu kulonda tudii.” Wena anamwakuli nawu: “Kudihi kuwunakukeña tuloñesheliku Chipandakenu?” Yesu nayilumbulwili nindi: “Tiyenu! Chimukwiñila mumusumba, mukudibulakana neyala wunasendi nsaba yewumba yamenji. Mumulondeli ndo-o nimwitala mukwiñilayi. Mumuleji mwini itala nenu, ‘Ntañishi nahoshi kudi eyi nindi: “Indi kapeka mwakukaama enyi munukudiila Chipandakenu nawatumbanji twami kadi kudihi?”’ Nawa owu iyala wukuyileja kapeka keneni kadi hewulu, kakuwahisha dehi. Muloñesheli Chipandakenu mwenomu.”—Luka 22:8-12.

Chakadi nikujina mwini itala hikambanji kaYesu. Watela nakutalila chikupu kulomba kwaYesu kwakuzatisha itala dindi kudiilamu. Apostolu ayedi chinashikiwu muYerusalema, anawani yuma yakuloñesha dehi neyi chashimunayi Yesu. Dichi anazati nañovu kulonda awani mwana kamukoku nawa aloñeshi Chipandakenu mwiluña muteli kushikila antu 13, dikwila nawu Yesu niapostolu indi 12.