Chimunahiti mafuku 10 kufuma hayililiyi Yesu mwiwulu, spiritu yajila yahuñunukili hefuku daPentekosta yamwekesheleña nawu mwamweni Yesu wudi mwiwulu. Nawa kubombelahu, kudi chuma chikwawu chadi kumwekesha nawu wudi mwiwulu. Henohu kambanji Stefwanu kanda amwasi malola muloña wakushimwina yuma yamweniyi, wahosheli nindi: “Talenu! Namoni mawulu anenzunuki nawa Mwana kamuntu nemani kuchikasa chaNzambi chachidiilu.”—Yilwilu 7:56.

Hampinji yidiyi naTata yindi mwiwulu, Yesu watela kuhembelela chuma chatela kwilayi neyi chashimwineñahu dehi Izu daNzambi. Davidi amoneneni kusoneka nawu: “Yehova wamulejeli Mwanta wami [Yesu] nindi: “Shakamaku kuchikasa chami chachidiilu sampu nelishi dehi ayilumbu jeyi kwikala chitwamu hakudata nyendu yeyi.’” Chamanini iyi mpinji yakuhembelela, ‘watwalekelihu kuyuula hakachi kawayilumbu jindi.’ (Masamu 110:1, 2) Chumanyi chikelayi Yesu mwiwulu iku nakuhembelela mpinji yakubabesha ayilumbu jindi?

HaPentekosita 33 C.E., chipompelu chawakaKristu chinatachiki. Haniyi mpinji Yesu natachiki kuyuula atumbanji twindi awahishiliwu naspiritu yajila. (AKolosi 1:13) Wayilombweli mumudimu wakushimwina nawa wayikwashili kwiluka mudimu wakazatañawu kumbidi. Mudimwinyi? Ana akatwalekahu kwikala ashinshika kushika nikukufwa akayisañula nawa akazata neyi anyanta hamu naYesu muWanta windi.

Chakutalilahu chamuntu wumu wakekala mwanta hiSawulu, elukiliwu nejina dachiRoma nawu Pawulu. Wadiña kaYudeya wakeñeli Nshimbi jaNzambi, ilaña amuluwañesheli kudi akulumpi jakwitiya kwawaYudeya chakwila wetejeli nawu Stefwanu amwasi malola. Kufumahu, Sawulu “wachidiña nandulu yakukabisha atumbanji twaMwanta,” nawa wayili kuDamakasa. Amwinkeli wuswa wakukwata atumbanji twaYesu nakuyifuntisha kuYerusalema kudi Kapristu Muneni Kayafwasi. (Yilwilu 7:58; 9:1) Hela chochu, hampinji yadiñayi munjila chejeji cheneni chamutoñekeleli nawa wadimbukili hamaseki.

Watiyiliyi izu dinakumutambika nawu: “Sawulu, Sawulu, muloñadi chiwunakunkabishila?” Sawulu wehwili nindi: “Yeyinyi Mwanta?” Yena waakwili nindi: “Yami Yesu iwunakukabisha.”—Yilwilu 9:4, 5.

 Yesu wamulejeli Sawulu kwiñila muDamakasa nakuhembelela chikumulejawu, ilaña kwateleli kwikala muntu wakumulombola mumusumba muloña chejeji chamuputishili mesu. Muchimwenu chikwawu, Yesu wamwekeni kudi Ananiya, wumu hadi atumbanji twindi washakamaña muDamakasa. Yesu wamulejeli kuya kwiluña dimu kulonda amuwani Sawulu. Ananiya watiyili woma wakuya, ilaña Yesu wamulejeli nindi: “Yaña, muloña iwu iyala namutondi kulonda ashimuni ijina dami kunyuza, kushilahu nikudi anyanta nianyana kaIsarela.” Sawulu watachikili cheñi kumona, nawa hadiñayi kweniku kuDamakasa “watachikili kushimwina mumasinagogi hadi Yesu nindi, iwu diyi Mwana kaNzambi.”—Yilwilu 9:15, 20.

Nawukwashu waYesu, Pawulu niakwawu akakushimwina atachikili mudimu wakushimwina watachikiliyi Yesu. Nzambi wayikiswilili nawa mwafumini yuma yayiwahi. Kwakwihi nayaaka 25 yahitilihu kufuma hamwekeniyi Yesu munjila yaya kuDamakasa, Pawulu wasonekeli nindi nsañu yayiwahi “[ayishimwinini] kuyuma yejima yekala mwishina dewulu.”—AKolosi 1:23.

Chimwahitili yaaka, Yesu wamumwekesheleli ibwambu dindi Yowanu akeñayi yimwenu yekala mumukanda waChimwekeshu. Kuhitila muniyi yimwenu, Yowanu washakamini nakumona Yesu chafuntiliyi muñovu muWanta. (Yowanu 21:22) “Chamoneneniwu, [Yowanu wakashimukili wudi] mwifuku daMwanta.” (Chimwekeshu 1:10) Himpinjinyi yeniyi?

Wuprofwetu wamuBayibolu wamwekeshaña nawu ‘ifuku daMwanta’ datachikili mumpinji yetu. Mu 1914, njita yatenañawu nawu njita yaMukaayi Yatachi yatachikili. Nawa yaaka yayivulu kufuma tuhu yina mpinji kunakumwekana majita, yipupu, nzala, nyitentanshi niwunsahu wunakumwekesha kushikijewa ‘kwayinjikijilu’ yalejeliyi Yesu apostolu kutalisha kumpinji ‘yakwikalahu’ kwindi ‘nikukuma.’ (Matewu 24:3, 7, 8, 14) Nawa antu anakushimwina nsañu yayiwahi yaWanta bayi hohu mwiluña mwayulilaña Wanta waRoma hohuku, ilaña mukaayi kejima.

Yowanu amoneneni kulumbulula mwatalisha chumichi nindi: “Ichi wamwinu niñovu niWanta waNzambi yetu niwuswa waKristu windi wunashiki.” (Chimwekeshu 12:10) Eña, Wanta waNzambi wamwiwulu, washimwinineñayi Yesu wudi kwoku.

Iyi hinsañu yayiwahi kudi atumbanji twaYesu ashinshika. Anateli kwanukaña mazu akwila nawu: “Dichi muloña wachumichi, enu mawulu ninenu mwashakamamu zañalalenu! Oyihuñu yiwukumona eyi iseki nikaluñalwiji, muloña Diyabolu nayisulukili dehi, nahili chikupu nanochu chinelukiyi nindi nashali dehi nakapinji kantesha.”—Chimwekeshu 12:12.

Dichi, ichi Yesu hanashakami kuchikasa chachidiilu chaTata yindi nakuhembelelaku. Ichi hiMwanta wunakuyuula nawa katataka afumishihu ayilumbu jindi ejima. (AHeberu 10:12, 13) Yumanyi yayiwahi yitunakuhembelela?