Hanyima yakwila Yesu nasañuki dehi, naloñeshi adibulakani nawapostolu indi 11 kumpidi muÑaliliya. Atumbanji amakwawu adi kweniku niwena, akushika ku 500, nawa amakwawu adiña nakumujinooka. (Matewu 28:17; 1 AKorinda15:6) Ilaña yuma yinahoshiyi yinayileteshi wejima wawu kwiteja nawu mwamweni Yesu wamumi.

Yesu nalumbululi nindi Nzambi namwinki dehi wuswa wejima mwiwulu nihamaseki. Yesu nayileji nindi: “Yenu mwakelishi antu akunyuza yejima ekali atumbanji, muyipapatisheña mwijina daTata nidaMwana nidaspiritu yajila, muyidizisheña ahembeña yuma yejima yinnayileji enu.” (Matewu 28:18-20) Eña, Yesu hiyanamusañuli hohuku, ilaña nakukeña nindi nsañu yayiwahi ayishimwini.

Akakumulondela Yesu ejima, amayala, ambanda nianyana, anayinki mudimu wowumu wakwilisha atumbanji. Akakudimbulula anateli kukañesha mudimu wawu wakushimwina nikutañisha, hela chochu Yesu nayikoleshi nindi: “Ananyinki wuswa wejima mwiwulu niheseki.” Chumichi chinatalishi mudihi kudi akakumulondela? Nayileji nindi: “Tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.” Yesu hanakuhosha nindi antu ejima akashimwinaña nsañu yayiwahi akakoña yihayamishaku. Hela chochu, akayikwasha kudi spiritu yajila.

Mapampa ejima amwekeniyi Yesu kudi atumbanji twindi kufuma hamusañwiliwu adiña “mafuku 40.” Wadibalumwini mumujimba wawuntu nawa wadimwekesheli “kudi apostolu iku wamumi nawunsahu walala wawuvulu,” nakuyileja “nsañu yaWanta waNzambi.”—Yilwilu 1:3; 1 AKorinda 15:7.

Chinamwekani hatooka nawu henohu apostolu achidi muÑaliliya, Yesu nayileji kufunta kuYerusalema. Chinakuhanjekayi nawu mumusumba nayileji nindi: “Bayi mufuma muYerusalemaku, ilaña hembelelenuña chuma chakaniniyi Tata, chimwatiyili kudi ami; muloña Yowanu wapapatishileña namenji, ilaña enu hakuhita mafuku antesha hohu akuyipapatisha naspiritu yajila.”—Yilwilu 1:4, 5.

Chimunahiti mpinji Yesu nadibulakani cheñi nawapostolu. Nayilomboli “ndo-o nikuBetani,” yekala kumunkukumuki waMpidi yaNyiolivi yekala kumusela. (Luka 24:50) Hela chakwila Yesu nayileji yuma yayivuli hakuya kwindi, anakuhweleli nawu Wanta windi wakekala heseki.—Luka 22:16, 18, 30; Yowanu 14:2, 3.

Apostolu anamwihuli Yesu nawu: “Mwanta, wunakufuntisha wanta kudi Isarela chochenichi?” Nayakuli munjila yapela nindi: “Kwiluka mpinji hela yilaaka yashayi Tata muñovu yindi chinayikundami wanyi.” Kuhiñahu, hakukonkomwena cheñi hamudimu watela kuzatawu nayileji nindi: “Mwakatambula ñovu neyi spiritu yajila yinenzi hadi enu, nawa mwakekala ayinsahu jami muYerusalema, muYudeya nimuSamariya mwejima nikwakumina iseki dejima.”—Yilwilu 1:6-8.

Apostolu adi kuMpidi yaNyiolivi naYesu asañulawu hampinji yinakuyayi mwiwulu. Hanashimbuli wanyi ivu dinamujiki wi-i chakwila analeki nikumumona. Hanyima yakumusañula, Yesu wabalumukaña mumujimba wawuntu. Ilaña ichi Yesu nabalumuki kufuma mumujimba wawuntu nakuya mwiwulu namujimba wakuspiritu neyi chileñaleña chakuspiritu. (1 AKorinda 15:44, 50; 1 Petulu 3:18) Chinakumutalawu apostolu ashinshika “amayala ayedi avwalili yakuvwala yitooka” kukashimuka adi nawena. Awa hiyañelu anadibalumuni munyijimba yawuntu, anehuli nawu: “Enu amayala amuÑaliliya, munemenidi nakutala mwiwulu? Iwu Yesu anafumishiwu kudi enu nakumutwala mwiwulu, wakenza munjila yoyimu neyi chimunamumoni chinakuyayi mwiwulu.”—Yilwilu 1:10, 11.

Yesu wayili chakadi antu amavulu kumumona chiña hohu akakumulondela indi ashinshika diwu amumweni. Wakafunta “munjila yoyimu” chakadi antu amavulu kumumona, akakumulondela indi  ashinshika hohu diwu akeluka nawu nekali dehi nañovu muWanta.

Apostolu anafunti kuYerusalema. Mafuku analondelihu, anapompi hamu nawatumbanji amakwawu, kushilahu “niMariya mama yaYesu niana kwaYesu.” (Yilwilu 1:14) Idi izanvu dinakulomba chikupu. Chuma chimu chinakulombawu nankashi hikutonda kambanji wakumusinsa Yudasi Isakaroti kulonda apostolu 12 afunti neyi chadiñawu. (Matewu 19:28) Anakukeña kambanji wamweni nyidimu yaYesu nikusañuka kwindi. Ipampa dakukumishaku dashimunawu muBayibolu dakusakula nachinjikijilu, anazatishi chinjikijilu chakusakula nachu kulonda eluki nkeñelu yaNzambi. (Masamu 109:8; Yishimu 16:33) Matiyasi watela wadiña hadi atumbanji 70 atemesheliyi Yesu anamutondi nawa “amuchindilili hadi apostolu 11.”—Yilwilu 1:26.

Hanyima yakwila munahiti mafuku 10 kufuma hayililiyi Yesu mwiwulu, Chawija chaPentekosta 33 C.E. chekaliliku. Atumbanji kwakwihi 120 anapompi mukapeka kahewulu muYerusalema. Kukasumuka, lushindu neyi lwampepela yinakukunka nañovu, lunatiyakeni mwitala mwejima munashakamiwu. Madimi anakumwekana neyi nyizuzu yakesi, nawa anenzi nakuwila hanyitu yawu. Ejima wawu anatachiki kuhosha madimi amboka-mboka. Iyi diyi spiritu yajila yayikaniniyi Yesu nindi akayihuñunwinayu!—Yowanu 14:26.