Chinafumiyi kuYeriku Yesu nayi kuBetani. Iluña dakwenda makilomita 20 nakukanduka mpidi. Yeriku yekala kwakwihi namamita 250 mwishina kufuma hakaluñalwiji nawa Betani yekala mamita kwakwihi na 610 kufuma hakaluñalwiji. Lazaru niahelindi ashakamaña mukamukala kanyanya kaBetani, hakwenda makilomita asatu kufuma kuYerusalema nawa wekalila kukabeta kakumusela kaMpidi yaNyiolivi.

AYudeya amavulu anashiki dehi muYerusalema kuChipandakenu. Anashiki swayi kulonda “akaditookeshi kwesekeja nanshimbi” hamwaha akwata chibimbi hela chuma chidi chejima chikuletesha ekali amajilu. (Yowanu 11:55; Kuchinda 9:6-10) Amakwawu ashika dehi anapompi hatembeli. Anakutoñojoka neyi kwiji Yesu wukwinza kuChipandakenu hela nehi.—Yowanu 11:56.

Antu akweti yitoñojoka yambuka hadi Yesu. Anlomboli jakwitiya amakwawu anakukeña kumukwata kulonda amujahi. Kafwampi, analeji antu nawu neyi atiya kudiyi Yesu, atela kushimuna “kulonda amukwati.” (Yowanu 11:57) Awa anlomboli akeñeleñahu cheñi kumujaha Yesu hanyima yakumusañula Lazaru. (Yowanu 11:49-53) Antu amakwawu niwena anakutoñojoka neyi Yesu wukwinza hadi antu amavulu hela nehi.

Yesu nashiki muBetani haChitanu, henohu kunashali “mafuku 6 naChipandakenu.” (Yowanu 12:1) Ifuku dinalondelihu (Sabata, Nisani 8) dinatachiki hakuhuma kwetañwa. Dichi, nashiki henohu Sabata kanda. Wadi kwenda wanyi kufuma muYeriku haSabata, kufuma haChitanu namelela kushika haMposu namelela, muloña nshimbi jawaYudeya jetejaña wanyi kwenda haniyi mpinji. Hadaha Yesu nayi kwitala daLazaru, neyi chelañayi diikalu.

Shimona, niyena washakamaña muBetani, namutambiki Yesu nimabwambu jindi, kushilahu niLazaru, namutambiki kwinza nakuda Hamposu namelela. Shimona amutenaña cheñi nawu “mukambumba,” hadaha wadiña nambumba nawa amukili kudi Yesu mpinji yimu. Chananukiyi chekalayi wadikita, Mata natachiki kuyikalakela enyi. Mariya yena nakutiyilila kudi Yesu, nawa haniyi mpinji chinaleti kanwa.

Mariya nashinkuli ibotolu daalabasita, mudi “pawundi yamanji evumba dadiwahi, naradi yayeni.” (Yowanu 12:3) Awa manji awuseya nankashi, wuseya wachu (madenari 300) wunateli kwesekana namali afweteleñawu muntu chaaka chamukuma! Mariya nahuñununi manji hamutu waYesu nikunyendu yindi nawa natachiki kuyiwayisha nansuki jindi. Ivumba dadiwahi dinepuki mwitala dejima.

Atumbanji anahili nawa anehuli nawu: “Muloñadi awa manji evumba dadiwahi chinakukisikilawu?” (Maku 14:4) Kuchinka Yudasi Isakaroti yena nindi: “Muloñadi chabulilawu kulandisha awa manji  evumba dadiwahi namadenari 300 nakuyinka atuzweñi mali?” (Yowanu 12:5) Yudasi bayi neyi nakwakamena atuzweñiku. Yena weyaña muchikasha chahembañayi mali awatumbanji.

Yesu namuhakwiliku Mariya, nahoshi nindi: “Munakumukabishiladi iwu mumbanda? Nankoñeli chuma chachiwahi. Muloña enu mwekalaña nawatuzweñi mpinji yejima, ilaña ami hinakekalaña nenu mpinji yejimaku. Chinanhuñunwiniyi awa manji evumba dadiwahi hamujimba wami, neli mwenimu kulonda anloñesheli chadimu chakunjiika. Inakuyileja chalala nami, kwejima kwakashimwinawu iyi nsañu yayiwahi mwahita kaayi kejima, nichuma chinakoñiyi iwu mumbanda akachihoshañahu hakumwanuka.”—Matewu 26:10-13.

Nashakami muBetani ifuku dimu nikubadikahu, nawa antu aneluki nawu Yesu wudi mwiluña. AYudeya amavulu anenzi kwitala daShimona bayi nakutala hohu Yesuku ilaña ninakumona Lazaru “asañwiliyi [Yesu] mudi afu.” (Yowanu 12:9) Dichi akulumpi jawatupristu anakukeña kuyijaha wejima wawu Yesu niLazaru. Awa anlomboli jakwitiya anakutoñojoka nawu chineli Lazaru wamumi dichinakuletesha antu amavulu amukuhweleleña Yesu. Awa anlomboli jakwitiya kutamawu!