Hanyima yakwila Yesu napapatishewi hohu, chilumbu chindi, wakeñeleña kumukañesha kulonda akañanyi, henohu kanda atachiki kuzata mudimu windi. Eña, Diyabolu wamwesekeli Yesu kakavulu. Chimwahitili mpinji, Yesu wahosheli hadi ona watama nindi: “Nyuuli wakaayi nakwinza nawa hakweti ñovu hadi amiku.”—Yowanu 14:30

Kapostolu Yowanu wamweneni chadimu yuma yikamumwekena kumbidi “chanzañombi muneni, kapela wakushankulu atenañawu nawu Diyabolu nawa Satana.” Chilumbu wafwana wawantu akamunatila heseki, nawa “[wukahila] chikupu nanochu chinelukiyi nindi nashali dehi nakapinji kantesha.” (Chimwekeshu 12:9, 12) AkaKristu makonu atela kukuhwelela nawu anakushakama munaka “kapinji kantesha,” nawa nawu “chanzañombi, kapela wakushankulu,” akamunatila mwikela nawa wakekala wanyi nañovu hadi yaaka 1,000 iku Yesu nakuyuula muWanta waNzambi.—Chimwekeshu 20:1, 2.

Hayina mpinji, chumanyi chikamwekana heseki, mukala wetu? Anyi akashakama hanu, nawa yuma yakekala ñahi? Yesu yomweni nashimuni yuma chiyakekala. Muchakutalilahu chindi chanyikoku niampembi, nashimuni yuma yikamwekena antu aloña kumbidi adi neyi anyikoku, ovwahilaña nawa elilaña yuma yayiwahi amanakwaKristu. Nashimuni cheñi hatooka yuma yikayimwekena antu elaña yuma yambukaku, adi neyi ampembi. Yesu nahoshi nindi: “Awa [ampembi] akayijilumuna haya nyaaka, ilaña aloña [anyikoku] akekala nawumi wahaya nyaaka.”—Matewu 25:46.

Chumichi chikutukwasha kutiyishisha mazu alejeliyi Yesu ona kapondu adiñayi nindi hamutondu. Yesu hamwinkeli kuchiñeja kwokumu neyi kwenkeliyi apostolu indi ashinshika, kwakwikala muWanta wamumawuluku. Ilaña Yesu wamukanini ona mukanshidi wabalumukili mumuchima nindi: “Inakukuleja chalala dalelu nami, wakekala nanami  muParadisa.” (Luka 23:43) Dichi iwu iyala wekalili nakuchiñeja kwakushakama muParadisa, iluña dadiwahi didi neyi itempa. Kwesekeja nachumichi, antu adiku makonu adi neyi nyikoku nawa akekala ‘nawumi wahaya nyaaka’ niwena akekala muParadisa.

Chumichi chinesekani nachalumbulwiliyi kapostolu Yowanu kutalisha hayuma chiyakekala kumbidi hamaseki. Wahosheli nindi: “Itenti daNzambi didi hamu nawantu, nawa yena wakashakama nawu, niwena akekala antu jindi. Nawa Nzambi yomweni wakekala nawu. Wakakombola madilu ejima kumesu awu, nikufwa hikwakekalaku cheñiku, hikwakekala cheñi kudishona, kudila hela kuyeñaku. Yuma yakunyima yinahiti dehi.”—Chimwekeshu 21:3, 4.

Hakwila nawu ona kapondu akadiluñishi wumi muParadisa atela ntahi kumusañula mudi afu. Nawa bayi neyi yena nkawindi hohu diyi akasañulawuku. Yesu washimwini chumichi hahosheliyi nindi: “Mpinji yinakwinza hakatiyawu antu ejima adi mumajamu achanukishu izu dindi nakufumamu, owu akoñeleña yuma yayiwahi akasañukila kuwumi wahaya nyaaka, nawa akoñeleña yuma yatama akasañukila kukuyisompesha.”—Yowanu 5:28, 29.

Indi apostolu ashinshika ninaamba yawantu antesha akekala naYesu mwiwulu? Bayibolu yahosha nawu: “Akekala atupristu aNzambi niaKristu, nawa akayuula neyi anyanta hamu nayena hadi yaaka 1,000.” (Chimwekeshu 20:6) Awa akayuula hamu naKristu adiña amayala niambanda ashakaminihu heseki. Dichi akekala nawushona nawa atiyaña neyi chitwatiyaña akayulaña mwiwulu antu akekala heseki.—Chimwekeshu 5:10.

Yesu wakazatisha mulambu windi kudi antu akekala hamaseki nakufumishahu ishiñu danshidi yaswaniniwu. Yena niantu akayulañayi nawu akakwasha antu ashinshika kwikala awanina. Eña, antu akadiluñisha wumi wakeñeleñayi Nzambi hampinji yamulejeliyi Adama niEva kusemununa nakwinzesha iseki. Nikufwa kwekalaku hamuloña wanshidi yaAdama hikwakekalaku cheñiku.

Dichi, Yesu wakela yuma yejima yamulejeliwu kudi Yehova. Nawa hakukuma kwaYaaka Ikombakaji, Yesu wakafuntisha Wanta niantu awanina kudi Tata yindi. Kutalisha hakudizoza kwasweja kwaYesu, kapostolu Pawulu wasonekeli nindi: “Neyi anamwovwahishili dehi yuma yejima, Mwana niyena wakadovwahisha yomweni kudi Owu wamwovwahishilili yuma yejima, kulonda Nzambi akekali yuma yejima kudi antu ejima.”—1 AKorinda 15:28.

Chakadi nikujina, Yesu wazataña mudimu walema mukushikija yuma yafuukulayi Nzambi. Nawa chikatwalekayi kushikija iyi yuma haya nyaaka, wakela neyi mwaya nhoshelu yaditeneniyi yomweni nindi: “Ami yami njila, chalala niwumi.”—Yowanu 14:6.