Ifuku dinalondelihu, Hamulungu, Nisani 9, Yesu nafumi muBetani hamu nawatumbanji twindi nawa nayi muYerusalema. Chinakushikawu kuBetefwaji, haMpidi yaNyiolivi, Yesu naleji atumbanji twindi ayedi nindi:

“Yenu mumukala wudi mukamwihi, nawa mukuwana chimbuulu wakukasila hamu namwanindi. Muyikasununi nakuyileta kudi ami. Neyi muntu ayileja mazu adi ejima, mwatela kumuleja nenu, ‘Mwanta nakuyikeña.’ Hohenohu wukushikena dakuyinka”—Matewu 21:2, 3.

Atumbanji twindi aneluki wanyi nawu mumazu aYesu munabombeli mazu awuprofwetu wamuBayibolu. Chimwahitili mpinji, elukili kushikijewa kwawuprofwetu waZekariya. Washimwineñawu dehi nindi Mwanta akanawu kudi Nzambi wakenza muYerusalema iku “wadizoza nawa nakwendela hachimbuulu, hamwana kachimbuulu, mwana kachimbuulu mukaji.”—Zekariya 9:9.

Atumbanji chinenziwu muBetefwaji nakusenda mwana kachimbuulu nimama yindi, antu anemani mukamwihi anehuli nawu: “Munakumukasunwinadi mwana kachimbuulu?” (Maku 11:5) Ilaña chinatiyiwu nawu Mwanta diyi wunakuyikeña, anayileki atumbanji kulonda ayitwali kudi Yesu. Atumbanji anashi yakuvwala yawu yahewulu hachimbuulu nihamwanindi, ilaña Yesu nakandami hamwana kachimbuulu.

Yesu chinashikiyi kwakwihi naYerusalema antu anavuliliku. Amakwawu anakwala yakuvwala yawu mumukwakwa. Amakwawu niwena anakukotola nyitayi yanyitondu hela “akotweli yiputa” nakuyaala. Anakubidika nawu: “Tunakukulomba netu mwamwini! Wakiswilewa yowu muntu wenjilaña mwijina daYehova! Wakiswilewa wowu Wanta wunakwinza watata yetu Davidi!” (Maku 11:8-10) AFwarisi adi hadantu anatiyi kutama namazu anakubidikawu. Anamuleji Yesu nawu: “Ntañishi, yizuwili atumbanji tweyi.” Yesu nayakuli nindi: “Inakuyileja nami, neyi awa amwenahu, malola akukaluka nyitetu.”—Luka 19:39, 40.

Yesu chinatachikiyi kumona Yerusalema, natachiki kudila nakuhosha nindi: “Neyi eyi, eña yoweneyi, weluka hefuku dalelu yuma yinateli kuleta kuwunda—ilaña dinu anayijindi kumesu eyi.” Yerusalema akamujilumuna muloña wakubula kwovwahila kwindi. Yesu nashimwinihu dehi dimu nindi: “Ayilumbu jeyi mpwembu yanyitondu yasoñoloka nakukunyeñumuka nikukukuchika kumbadi jejima. Akakunata heseki hamu nawanyaneyi adi mudi eyi, nawa hiyakashiya ilola nidimu hewulu delola dikwawu mudi eyiku.” (Luka 19:42-44) Neyi chahosheliyi Yesu, Yerusalema amujilumwini muchaaka 70 C.E.

Yesu chineñiliyi muYerusalema, ‘mumusumba wejima mudi ipumba dawantu anakuhosha nawu: “Hinyi yeniwu?”’ Nawa mazaza awantu anatwalekihu kuhosha nawu: “Iwu hikaprofwetu Yesu, wakuNazareta yamuÑaliliya!” (Matewu 21:10, 11) Antu amakwawu mwizaza amumweni Yesu nakumusañula Lazaru anakuleja amakwawu ichi chihayamisha. AFwarisi anatiyi kutama nawu yuma yinataminiku chikupu. Anakudileja mulwawu nawu: “Kaayi kejima kanakumulondela.”—Yowanu 12:18, 19.

Neyi chelañayi diikalu neyi nenzi muYerusalema, Yesu nayi mutembeli nakutañisha. Kweniku, nooki mputamesu nimukakubalakata. Akulumpi jawatupristu niansoneki chinamoniwu yuma yineliyi nikutiya atwansi anakubilela nawu, “Tunakukulomba netu mwamwini Mwana kaDavidi!” anatiyi kutama chikupu. Anlomboli jakwitiya anamwihuli Yesu nawu: “Wunatiyi awa antu chinakuhoshawu?” Yena nayakuli nindi: “Komana kanda mutañeñahu dehi awa mazu akwila nawu, ‘Wunakojeji mazu akushimeka afumeña mutunwa twanyana yanyanya ninyikeki’?”—Matewu 21:15, 16.

Yesu natalitali yuma yidi mutembeli. Ilaña kuneliyi, dichi nayi nawatumbanji twindi. Henohu Nisani 10 kanda yitachiki, nafunti kuBetani, kunakaaminiyi wufuku waHamulungu.