Yowanu Mpapatishi amukasa kufuma tuhu mpinji yanukiliyi Yesu chipandakenu chamu 30 C.E. Yowanu wakeñeleña atumbanji twindi ekali akakumulondela Yesu, ilaña bayi neyi ejima ekala akakumulondelaku, hanahiti tukweji kufuma hamukasiliwu Yowanu.

Dichi, chineli Chipandakenu chamu 31 C.E. chinaswini mukamwihi, atumbanji twaYowanu amakwawu anenzi nakumwihula Yesu nawu: “Muloñadi etu niaFwarisi chitwashakaminaña chakadi kuda, ilaña atumbanji tweyi hiyashakamaña chakadi kudaku?” (Matewu 9:14) Afwarisi ashakamaña chakadi kuda muloña alondelaña kashidikilu kamunsakililu. Kufumahu, Yesu nazatishi chakutalilahu chakaFwarisi wumu wadimweneña kuloña nakulomba nindi: “Eyi Nzambi, nakusakilili muloña hinidi neyi antu ejimaku . . . Nashakamaña kayedi mumulungu chakadi kuda.” (Luka 18:11, 12) Munjila yoyimu, atumbanji twaYowanu hadaha ashakamaña chakadi kuda muloña alondeleleña kashidikilu. Hela, hadaha ashakamineña chakadi kuda muloña wachineñi chineli Yowanu anamukasi. Antu niwena anakuhosha muloña wabulilañawu atumbanji twaYesu kushakama chakadi kuda, hadaha kulonda amwekeshi chineñi hachuma chinamumwekeni Yowanu.

Yesu nayaakuli kuzatisha chakutalilahu nindi: “Komana amabwambu jakalemba anateli kuneña neyi kalemba wudi hamu nawu? Ilaña mpinji yakashika yakamusendawu kalemba kufuma hakachi kawu nawa diyi mpinji yakashakamawu chakadi kuda.”—Matewu 9:15.

Yowanu yomweni wamuteneni Yesu nindi kalemba. (Yowanu 3:28, 29) Dichi, chineli Yesu wudi hohu, atumbanji twaYesu hiyatela kushakama chakadi kudaku. Mukuhita kwampinji, neyi Yesu nafwi, atumbanji twindi akamudilaña nakushakama chakadi kuda. Yuma yikuhimpika neyi anamusañuli! Hiyakadilaña nakushakama chakadi kudaku.

Kuhiñahu, Yesu nashimuni yakutalilahu yiyedi, nindi: “Kwosi muntu wachiminaña chikamba chehina dadiha hachakuvwala chahewulu chachikuluku, muloña chitabu chachiha chikudikoka nawa chakuvwala chikusweja kutabuka. Nawa antu hiyaloñaña vinyu yayiha mumapakumuna amakulu ayitembi avinyuku. Neyi aloñamu, mapakumuna ayitembi avinyu abalukaña nawa vinyu yamwañikaña nimapakumuna ayitembi avinyu akisikaña. Ilaña antu aloñaña vinyu yayiha mumapakumuna amaha ayitembi avinyu.” (Matewu 9:16, 17) Yesu natalishi mudihi?

Yesu nakuyikwasha atumbanji twaYowanu mpapatishi kwiluka nawu kwosi watela kukanjikija akakumulondela Yesu kulondela tushidikilu twawaYudeya, chidi neyi kushakama chakadi kuda. Wenjili wanyi nakukolesha kudifukula kwakunyima, kudifukula kuyenjileña nakufumishahu. Kudifukula kunakukeñayi Yesu nindi antu adifukuleña bayi kudifukula munabombeli tushidikilu twawaYudeya twadiña nanshimbi nankashiku. Nawa hanakukeña kusha chikamba chachiha hachakuvwala chachikulu hela kusha vinyu yayiha mumapakumuna ayitembi avinyu amakuluku.